‘Onda ningi ashihe shoka tandi vulu, omolwaayehe’

ONDA kala nale nda hokwa oshili yOmbiimbeli, manga oshinima shoka inaashi ningwa. Meme okwa li e na iileshomwa yopaMbiimbeli nonda li ndi yi hole, unene tuu omathano. Tate ka li a hala meme a lombwele ndje shoka ti ilongo. Nonando ongawo, onda li nda hala okutseya oshindji nonda kala handi mu pula omapulo. Onkee ano, otwa kala hatu konakona Ombiimbeli nameme, uuna tate a za mo megumbo. Oshizemo, nangame onda tokola okwiiyapulila Jehova. Onda ninginithwa mo 1943, mondoolopa Blackpool, moIngilanda. Pethimbo mpoka, onda li ndi na omimvo omulongo.

SHO NDA TAMEKE OKULONGELA JEHOVA

Otwa kala hatu uvitha olundji nameme, konima sho nda ninginithwa. Opo tu lombwele aantu kombinga yOmbiimbeli, otwa li hatu longitha oongalamathona. Odha li oonene nondhina ondjundo yookilograma 4,5. Kala ando wa fa wu wete ndje te kikimba ongalamathona, sho nda li okamatyona.

Sho ndi na omimvo 14, onda li nda hala okukokola ondjila. Meme okwa lombwele ndje ndi popye tango nomumwatate ngoka a tumwa kehangano (ngashingeyi ohi ithanwa omutonatelishikandjo). Omumwatate ngoka okwa lombwele ndje ndi mone ontseyo yokulonga iilonga yasha, mbyoka tayi ka kwathela ndje, uuna tandi kokola ondjila. Shoka osho nda ningi. Konima sho nda longo uule womimvo mbali, onda ka popya ishewe nomutonatelishikandjo gulwe kombinga yuukokolindjila. Okwa lombwele ndje a ti: “Ka kokole ondjila.”

Onkee ano, muApilili 1949, tse nameme otwa gandja po nokulanditha po iinima mbyoka ya li megumbo ndyoka twa li hatu futu tu kale mo. Otwa tembukile koshilando shedhina Middleton, shi li popepi noshilando Manchester, notwa tameke okukokola ondjila hoka. Konima yoomwedhi ne, onda hogolola omumwatate gumwe tu kokole ondjila pamwe naye. Aamwatate koshitambelwa oye tu lombwele tu tembukile kegongalo ndyoka opo lya totwa po, li li mokalando kedhina Irlam. Meme okwa kala ta kokola ondjila pamwe nomumwameme gumwe, megongalo lilwe.

Nonando onda li owala ndi na omimvo 17, tse nomumwatate ngoka hatu kokola ondjila naye, otwa pewa oshinakugwanithwa shokukwatela komeho okugongala, oshoka megongalo ndyoka epe, omwa li aamwatate aashona taya vulu oku shi ninga. Konima yethimbo, onda pulwa ndi tembukile kegongalo li li mondoolopa yedhina Buxton, ndyoka lya li li na aauvithi aashona nolya li lya pumbwa ekwatho. Onda tala ko iinakugwanithwa mbyoka nda pewa petameko kutya oya dheulila ndje mbyoka nda ka pewa monakuyiwa.

Mo 1951, ondu udhitha ofooloma ndi ye kOsikola yOmbiimbeli yoWatchtower yaGilead. MuDesemba 1952, ondi ithanwa ndi ka ninge omukwiita. Onda kambadhala oku ya lombwela kutya itandi vulu, oshoka ondi li omuuvithi gwethimbo lyu udha, ihe ompangu inayi shi zimina. Onkee ano, onda tulwa mokakuma uule woomwedhi hamano. Manga ndi li mokakuma, onda hiywa ndi ka hite ongundu onti-22 yosikola yaGilead. Sho nda mangululwa muJuli 1953, onda londo mosikepa yedhina Georgic, ndu uka koNew York.

Sho nda thiki, onda yi koshigongi shi na oshipalanyolo Uulipamwe wUuyuni Uupe, shoka sha li sha ningilwa moNew York mo 1953. Konima yoshigongi, onda yi neshina kondoolopa yedhina South Lansing, moNew York, moka mwa li tamu ningilwa osikola. Sho nda zi meshina, onda londo ombesa yi fale ndje posikola popwene. Molwaashoka opo nda zi mondholongo, kanda li ndi na iimaliwa oyindji nonda pula gumwe gwomaafaalelwa oshimaliwa ndi fute ombesa.

ONDA PEWA OSHINAKUGWANITHWA KONDJE YOSHILONGO

Osikola yaGilead oye tu pa edheulo ewanawa, ndyoka lye tu kwathele tu ‘ninge ashihe shoka tatu vulu omolwaayehe,’ sho tu li miilonga yuutumwa. (1 Kor. 9:22) Otwa li twa tuminwa koFilipine tu li yatatu, ngaye, omumwatate Paul Bruun nomumwatate Raymond Leach. Otwa tegelele uule woomwedhi dhontumba, opo tu ziminwe tu ye ko. Sho twa pitikwa tu ye, otwa yi nosikepa koRotterdam notwa taaguluka Efuta lyoPokati, Okanala kaSuez, Efuta lyaIndia, Malesia nosho wo Hong Kong. Konima yomasiku 47, otwa thiki moshilandopangelo shaFilipine shedhina Manila, mo 19 Novomba 1954.

Otwa li tu na okuninga omalunduluko, opo tu igilile aantu, oshilongo nosho wo elaka epe. Nonando ongawo, atuhe yatatu otwa tuminwa kegongalo li li moshilando shedhina Quezon City, moka mu na aantu oyendji haya popi Oshiingilisa. Onkee ano, konima yoomwedhi hamano, otwa li owala tu shi iitya iishona melaka lyOshitagalog. Oshinakugwanithwa shetu sha ka landula ko, oshe tu kwathele tu ilonge elaka ndyoka nawa.

Esiku limwe sho twe ya megumbo okuza muukalele, tse nomumwatate Leach otwa adha ondumba yoombilive mondunda yetu. Shoka osha li sha ningwa muMei 1955. Moombilive moka omwa li mwa nyolwa kutya otwa ninga aatonatelishikandjo. Pethimbo mpoka onda li owala ndi na omimvo 22, ihe oshinakugwanithwa shika osha pendje ompito ndi ‘ninge ashihe shoka tandi vulu omolwaayehe,’ momikalo omipe.

Pashiholelwa, oshipopiwa shotango shoka nda gandja ndi li omutonatelishikandjo, onde shi gandjele pondje yokasitola ke li momukunda gumwe. Konima onda ka tseya kutya pethimbo ndyoka osha li omukalondjigilile moFilipine, oshipopiwa shomontaneho shi ningwe montaneho yaantu. Sho tandi talele po omagongalo ga yoolokathana moshikandjo, onda li nda gandja iipopiwa puutala wokuthuwila, pomahala gomalandithilo, komeho yiinyanga yamuni, muupale wokatanga komokambamba, mooparka nolundji omomapandaanda. Esiku limwe sho nda li moshilando shedhina San Pablo, omvula yepoola oyi imbi ndje ndi gandje oshipopiwa pehala lyomalandithilo. Onkee ano, onda pula aamwatate mboka ye na oshinakugwanithwa ndi ke shi gandjele kOshinyanga shUukwaniilwa. Konima yoshipopiwa, aamwatate oya pula ndje ngele okugongala hoka otaku vulu okwiithanwa okugongala kwomontaneho, oshoka inaku ningilwa pehala lyaayehe.

Onda li handi lala aluhe momagumbo gaamwatate. Nonando oga li omashona, ohaga kala aluhe ga yela. Onda li handi lala poshiyala pevi. Molwaashoka onda li handi iyogele pondje, ondi ilongo okwiiyoga nda zala oonguwo. Uuna tandi yi kuuntuntu wulwe, onda li handi ende muumbesa hawu ithanwa jeepney, moombesa oonene nomathimbo gamwe omombautu. Uule womimvo adhihe ndhoka nda kala miilonga yethimbo lyu udha, inandi landa nando ohauto.

Okuuvitha nokutalela po omagongalo, okwa kwathela ndje ndi ilonge elaka lyOshitagalog. Inandi kala handi yi kootundi dhokwiilonga elaka, ihe onde li ilongo mokupulakena kaamwatate muukalele nopokugongala. Aamwatate oya li ye na ehalo lyokukwathela ndje ndi ilonge Oshitagalog. Onde ya pandula, omolweidhidhimiko lyawo nomaetopo gawo taga zi komutima.

Mokweendela ko kwethimbo, iinakugwanithwa iipe mbyoka nda ka pewa, oya ningitha ndje ndi ninge omalunduluko galwe ishewe. Sho omumwatate Nathan Knorr e tu talele po mo 1956, onda li nda pewa oshinakugwanithwa shokukala omukwatakanithikalelipo poshigongi shopashigwana. Kanda li ndi na ontseyo yasha, onkene, aamwatate yalwe oya kwathele ndje. Konima yoomwedhi dhontumba, opwa li ishewe pu unganekwa oshigongi shilwe shopashigwana, nomumwatate Frederick Franz, ngoka a za koombelewa dhetu oonene, oye e tu talele po. Ongame nda li omutonateli gwoshigongi shoka, nondi ilongo komumwatate Franz ndi kale handi ningi omalunduluko shi ikolelela konkalo yaantu. Aamwatate yomoshitopolwa oya li ya nyanyukwa noonkondo, sho ya mono omumwatate Franz ta gandja oshipopiwa, a zala oonguwo dhomuthigulwakalo gwAafilipine.

Onda li ndi na okuninga omalunduluko galwe ishewe, sho nda ningi omutonateli gwoshitopolwa. Pethimbo mpoka, otwa li hatu ulukile aantu ofilima yedhina The Happiness of the New World Society nolundji otwa li hatu shi ningile pomahala gaayehe. Omathimbo gamwe, otwa li hatu piyaganekwa kuupuka. Owa li hawu kala wa tsika kuuyelele weshina lyokuulika omathano nowa li hawu kakatele ko. Otwa li hatu li opaleke nuudhigu. Okuninga omalongekidho gokutala ofilima kasha li oshipu. Nonando ongawo, otwa li hatu kala tu uvite nawa okumona nkene aantu ya nyanyukwa, sho tayi ilongo kombinga yehangano lyaJehova muuyuni awuhe.

Aasita yaKatoolika oya tsu omaminimini aakwanepangelo yamwe yomoshitopolwa, opo kaaye tu pitike tu ninge iigongi yetu. Oya li haya dhenge oongendjo dhawo muule, uuna tatu gandja iipopiwa popepi noongeleka dhawo, opo aantu kaayu uve ko. Shoka inashi imba iilonga yetu yi pule komeho. Aantu oyendji miitopolwa mbyoka otaya longele Jehova ngashingeyi.

IINAKUGWANITHWA MBYOKA YE ETA OMALUNDULUKO GALWE

Mo 1959 onda yakula ontumwafo tayi popi kutya otandi ka longa koshitayimbelewa. Uuthembahenda mbuka owa pendje ompito yokwiilonga iinima yilwe oyindji. Konima yethimbo, onda pulwa ndi kale handi ka talela po iitayimbelewa kiilongo yilwe. Esiku limwe sho nda ka talela po koshilongo shimwe, onda tsakanene nomumwameme Janet Dumond, ngoka a li omutumwa koTailand. Otwa kala hatu nyolelathana oontumwafo uule wethimbo, nokonima otwa hokana. Otwa kala tatu longele Jehova nenyanyu uule womimvo 51.

Onda tyapula okutalela po aamwatate naamwameme miilongo 33. Onda pandula iinakugwanithwa mbyoka nda pewele petameko, oshoka oya dheula ndje ndi kale ndi shi okuungaunga naantu ya yoolokathana. Omatalelopo agehe ngoka oga patulula omadhiladhilo gandje noga kwathela ndje ndi mone nkene Jehova e hole aantu yomiigwana ayihe. —  Iil. 10:34, 35.

NATANGO OTATU NINGI OMALUNDULUKO

Otwa nyanyukwa lela sho twa kala tatu longo naamwatate naamwameme moFilipine. Omwaalu gwaauvithi ogwi indjipala lwiikando omulongo lwaampono, okuyelekanitha pethimbo sho opo twe ya mo. Tse naJanet otatu longo natango koshitayimbelewa shaFilipine, moQuezon City. Onda kala tandi longo koshilongo shilwe uule womimvo dhi vulithe 60, ihe ondi ilongekidha natango okuninga omalunduluko ngoka Jehova ta pula ndi ninge. Omalunduluko ngoka opo ga ningwa mehangano oge tu ningitha tu kale hatu tifuka, sho tatu longele Jehova nokukwathela aamwatate.

Kehe shimwe shoka Jehova e tu pula tu longe otwe shi ninga, noshe tu etela onkalamwenyo ombwanawa. Otwa kambadhala wo okuninga omalunduluko ngoka ga pumbiwa nokukwathela nawa aamwatate. Otwa tokola toko ‘okuninga ashihe shoka tatu vulu, omolwaayehe,’ ngele Jehova e shi hala.