IITOPOLWA YI IKOLELELA KOSHIPALANYOLO SHOKOMBANDA | MBELA OTO KA TAAMBA KO NGAA OMAGANO GAKALUNGA GE NA ONDILO?

Omagano gaKalunga ge na ondilo, oge na oku ku inyengitha wu ninge shike?

“Oshoka ohole yaKristus otayi tu pangele . . . Kristus okwa sile aantu ayehe, opo mboka ye na omwenyo yaa ikalele we yo yene, ihe ya kalele nguka a si molwawo.” — 2 Aakorinto 5:14, 15.

OMAGANO ga dhenga mbanda oge na oku tu inyengitha tu ulike olupandu. Jesus okwa tsu omuthindo oshinima shoka, konima sho a aludha aalumentu omulongo mboka ya li ye na omukithi gwoshilundu, ngoka kaagwa li gu na epango pethimbo ndyoka. Gumwe gwomaalumentu mboka “okwa galukile kuJesus, ye ta hambelele Kalunga newi lyopombanda.” Jesus okwa pula a ti: “Aalumentu mboka ya aludhwa kaya li omulongo? Omugoyi oye li peni?” (Lukas 17:12-17) Oshike tatu ilongo mo? Otatu ilongo mo kutya oshipu okudhimbwa iinima iiwanawa mbyoka yalwe haye tu ningile.

Ekulilo omagano ngoka itaaga vulu okuyelekwa nasha. Olyo omagano dhingi kaaku na we, ngoka wa pewa kuKalunga. Oshike wu na okuninga po, omolwomagano ngoka?

Tseya Omugandji gwekulilo. Opo omuntu a ka mone omwenyo gwaaluhe, omolwekulilo, oku na okuninga po sha. Jesus okwa galikana kuKalunga a ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Ngele owa lombwelwa kutya omulumentu gwontumba okwa li a hupitha omwenyo gwoye sho wa li okanona, mbela ito ka kala wa hala okutseya oshindji kombinga ye nonokutya omolwashike e ku hupitha? Jehova Kalunga ngoka e ku pa omagano gekulilo, ngoka taga hupitha omwenyo gwoye, ina hala owala wu tseye kutya oye lye. Okwa hala wo wu kale wu na ekwatathano lyopothingo naye. Ombiimbeli otayi tu lombwele tayi ti: “Hedheni kuKalunga, ye nota hedha kune.” — Jakob 4:8.
Kala wu na eitaalo tali longo mekulilo. Ombiimbeli otayi ti: “Oongoka i itaala Omwana, oku na omwenyo gwaaluhe.” (Johannes 3:36) Okukala wu na eitaalo tali longo otashi ti shike? Otashi ti eitaalo mekulilo oli na okuulikwa miilonga. (Jakob 2:17) Iilonga mbyoka oyini? Omagano ohaga ningi owala goye, ngele owe ga pewa e to ga taamba. Onkee ano, owu na okutaamba omagano gekulilo. Ngiini mbela? Omokutseya nkene Kalunga a hala wu kale monkalamwenyo e to katuka metsokumwe nasho.a Galikana Kalunga e ku dhimine po nowu kale wu na eiyuvo lya yela. Kala wu na einekelo kutya ekulilo otali ke etela ayehe mboka ye na eitaalo tali longo mulyo, ombili yaaluhe, egameno nehepuluko. — Aahebeli 11:1.
Kala pEdhimbuluko lyeso lyaJesus. Jesus okwa toto po oshiningwanima shoka hashi ningwa omumvo kehe, opo e tu dhimbulukithe omagano gekulilo. Okwa popi kombinga yasho a ti: “Shi ningeni nokudhimbulukwa ndje.” (Lukas 22:19) Oonzapo dhaJehova otadhi ka dhimbulukwa eso lyaJesus mEtiyali, 11 Apilili 2017, konima yeningino lyetango. Opolohalama ndjoka ohayi ningwa uule wowili. Oya kwatela mo wo oshipopiwa tashi yelitha esimano lyeso lyaJesus nankene tali etele aantu uuwanawa kunena nomonakuyiwa. Omumvo gwa zi ko, aantu omamiliyona 20 lwaampono muuyuni awuhe, oya li pEdhimbuluko. Otatu ku hiya wu ye wu gongale pamwe natse, opo wu ulike kutya owa pandula omagano gaKalunga ge na ondilo.

a Omukalo dhingi moka to vulu okutseya Kalunga nokuhedha popepyeelela naye, ogwo okukonakona Ombiimbeli. Pula gumwe gwomOonzapo dhaJehova e ku kwathele nenge wu ye kepandja lyetu lyokointaneta, www.jw.org/ng.