1 Nkene tu na okuyanda omaupyakadhi

OKULONGITHA NAYI IIKOLITHA

Delphine, ngoka a tumbulwa moshitopolwa sha tetekele, okwa li u uvite kutya iimpwiyu ye oye mu ningitha a kale a hala okunwa iikolitha sha pitilila. Ombiimbeli inayi indika okunwa pandjele, ihe oya ti: “Ino kala mokati kaanwi yomaviinu.” (Omayeletumbulo 23:20) Okunwa iikolitha sha pitilila ohaku etitha okwaanuukolele, ohaku teya nokuyona po omakwatathano naantu nohaku etitha omaso gompiya ogendji omumvo kehe. Ogendji gomomaupyakadhi ngaka otaga vulu okuyandwa, ngele aantu oya landula omayele gOmbiimbeli gopandunge.

Delphine osho a ningi. Ngashingeyi ota ti: “Onda mona kutya iikolitha inayi kutha po iimpwiyu yandje. Onda li nda tula miilonga uunongo mboka wu li mAafilippi 4:6, 7, mboka taya ti: ‘Inamu kala mu na oshimpwiyu shasha, ihe shi tseyithileni Kalunga momagalikano.’ Ongulohi kehe uuna nda tameke okudhiladhila nokwiipula sha pitilila, onda li handi galikana kuJehova. Onda li handi mu lombwele omaiyuvo gandje, ngaashi shoka sha geyitha ndje, sha alula ndje komwenyo nosha gwilila ndje po. Onda li handi mu indile a kwathele ndje ndi mone nkene tandi vulu okukala nda pepelelwa. Ngele kwa shi, onda li handi shilipaleke kutya kandi na omaiyuvo ngoka. Okugalikana aluhe kuJehova okwa kwathele ndje ndi kale nda pepelelwa. Onda tokola kaandi nwe we iikolitha. Oshoka ombili ndjoka nda mono oya simana kungame noonkondo, kanda li nda hala okuninga sha shoka tashi vulu oku yi yona po.”

OLUHONDELO

Oluhondelo olwo shimwe shomiinima mbyoka hayi etitha oluhodhi. Ihe omakotampango gOmbiimbeli otaga vulu oku tu kwathela tu henuke omaupyakadhi ngoka mokupopya yimwe yomiinima mbyoka hayi ge eta, ngaashi okudhana nomaiyuvo gagulwe nokutala omathano giipala. Omugundjuka gumwe Samuel ota ti: “Osha li oshipu kungame okudhana nomaiyuvo gagumwe. Omathimbo gamwe omuntu inandi mu hokwa, ihe ngele onda mono kutya okwa hokwa ndje, osha li hashi ningitha ndje ndi dhane nomaiyuvo ge.” Samuel olundji okwa li hi iyadha ta lundilwa kutya okwa dhana nomaiyuvo gayalwe, nuuna inee shi ninga, nokuli okwa ka tokola ngaa nee e shi ninge. Eihumbato ndyoka olya kala tali mu nyenyetele. Ota ti: “Olya li lya nika oshiponga, molwaashoka ohali ningitha omuntu a kale i ihole mwene.”

Samuel okwa li a lesha oshitopolwa sha nuninwa aagundjuka kepandja lyokointaneta, jw.org. Okwa dhiladhila kOmayeletumbulo 20:11, ngoka taga ti: “Nokuli okamati otaki iholola miilonga yako, ngele omikalo dhako omiwanawa nodhu uka.” Ovelise ndjoka oya li ye mu kwathele ngiini? Okwa mono kutya okudhana kwe nomaiyuvo gayalwe kaku shi okuwanawa noinaku yogoka. Ota ti: “Ondi ilongo wo kutya omugundjuka ngoka ha dhana nomaiyuvo gayalwe oha kala e na omaukwatya ngoka tage mu ningi a kale kuume kopandjokana kee li nawa. Onda tameke okudhiladhila nkene omukulukadhi gwandje gwomonakuyiwa ta ka kala u uvite ngele okwa mono tandi dhana nomaiyuvo gomukiintu gulwe. Shoka osha ningitha ndje ndi mone kutya iikala mbyoka oya nika oshiponga. Itashi ti kutya shaashi oshipu okuninga, oshi li mondjila.” Samuel okwa lundulula iikala ye. Okuhenuka okudhana nomaiyuvo gayalwe okwe mu kwathele wo a yande oluhondelo.

Antonio okwa li nokuli moshiponga oshinene shokuya moluhondelo: Okwa li a pikwa komathano giipala. Nonando okwa li a hokana omukulukadhi ngoka e hole noonkondo, okwa li hi iyadha ta tala lwiikando omathano ngoka. Ota ti kutya okudhiladhila kuPetrus gwotango 5:8 okwe mu kwathela lela. Ovelise ndjoka otayi ti: “Kotokeni ne mu tonate! Oshoka omutondi gweni Satana ohe mu kundukidha, ta ndunduma a fa onime, ta kongo ngoka, te mu ninagula po.” Antonio ota ti: “Omathano giipala oge li shaa mpono muuyuni, nomathano ngoka ihaga zi mo momadhiladhilo gomuntu. Ovelise ndjoka oya kwathela ndje ndi dhiladhile kombinga yaangoka he etele ndje omamakelo ngoka. Onda li ndi na okwiilonga okukala handi dhimbulukwa kutya omathano ngoka ogaSatana. Ngashingeyi ondi shi kutya Jehova oye owala ta vulu okukwathela ndje ndi kale nda ‘kotoka nonda tonata,’ opo ndi vule okukondjitha omutondi ngoka ta ponokele omadhiladhilo gandje, omutima gwandje nondjokana yandje.” Antonio okwa mono ekwatho ndyoka a li a pumbwa, nokonima okwe etha po okutala omathano giipala. Shoka osha li she mu kwathele a yande omaupyakadhi galwe ga kwata miiti.

Osha yela kutya Ombiimbeli otayi gandja omayele ge na oshilonga ngoka tage tu kwathela tu yande omaupyakadhi ga kwata miiti. Ihe ongiini kombinga yomaupyakadhi ngoka ga mena omidhi notaga tsikile? Natu taleni nkene Oohapu dhaKalunga tadhi vulu oku tu kwathela tu kandule po omaupyakadhi ngoka.