Kala netaloko lyu uka kombinga yiikolitha

TONY ngoka a tumbulwa moshitopolwa shopetameko, okwa li ta vulu okunyanyukilwa onkalamwenyo yi li nawa, andola okwa ziminine kutya oku na uupyakadhi wiikolitha. Ihe molwaashoka okwa li ha longitha iikolitha sha pitilila noinayi mu etela uupyakadhi washa, okwa li e wete onkalamwenyo ye yi li nawa. Omolwashike etaloko lye lya li lya puka?

Omolwaashoka okwa li ha longitha iikolitha sha pitilila. Kutya nduno Tony okwa li e shi shi nenge kee shi shi, uuluyi we, oshitopolwa shoka hashi pangele olutu nomadhiladhilo ge, owa li itaawu longo nawa omolwokunwa kwe iikolitha sha pitilila. Mpoka pu thike okunwa kwe, opo ngaa pu thike uuluyi we itaawu longo nawa.

Epuko etiyali, Tony ka li a hala okweetha po iikolitha. Allen ngoka a tumbulwa miitopolwa ya tetekele okwa li a tindi okwiitaala kutya oku na uupyakadhi niikolitha. Okwa ti: “Onda li handi holeke iikolitha mbyoka handi nu nokwiiningitha nda fa ihaandi nu sha pitilila. Elalakano lyandje olya li okuholeka kutya ohandi nu nayi.” Nonando yalwe oya li ye shi wete kutya Tony naAllen oya pikwa komalovu, yo yene oya li owala ye wete ye li nawa. Ayehe yaali oya li ya pumbwa okukatuka onkatu opo ya pangele okunwa kwawo. Onkatu yini mbela?

Onkatu ndjoka wu na okukatuka

Oyendji mboka ye etha po okunwa sha pitilila oya katuka metsokumwe noohapu dhaJesus tadhi ti: “Eho lyoye lyokolulyo ngele tali ku hongolola, li tsipula mo, ngu u li ekelehi. Oshoka oshe ku opalela okukanitha shimwe shomiilyo yoye, shi vule okukala nolutu olundjolowele, e to umbilwa [muGehenna, NW].”—Mateus 5:29.

Jesus ka li ta popile nando okwiiyehameka mwene. Pehala lyaashono, okwa li ta popi pathaneko kutya otu na okukala nehalo okweetha po kehe shimwe shoka tashi yono po uupambepo wetu. Eeno, otashi vulika shi kale oshidhigu okukatuka onkatu. Ihe otashi ke tu gamena komadhiladhilo nokoonkalo ndhoka tadhi ke tu fala mokulongitha nayi iikolitha. Onkee ano, ngele yamwe taye ku lombwele kutya oho nu sha pitilila, katuka onkatu wu nwe pandjele.a Ngele iho vulu okupangela okunwa kwoye, ku etha po thiluthilu. Nonando otashi vulika shi kale oshidhigu, oshi li hwepo oku shi ninga shi vulithe okuyona po onkalamwenyo yoye.

Nonando ku shi ombwiyi, mbela oho kala wa hala okunwa sha pitilila? Ngele osho, oto ka ninga po shike opo wu kale netaloko lyu uka kombinga yiikolitha?

Mpoka to adha ekwatho

1. Kala wi inekela kutya oto vulu okumona oonkondo okupitila mokugalikana aluhe tashi zi komutima. Ombiimbeli oya gandja omayele ngaka kwaayehe mboka ya hala okunyanyudha Jehova Kalunga tayi ti: “Ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Aafilippi 4:6, 7) Owu na okugalikana kombinga yashike opo wu mone ombili ndjika yopamadhiladhilo?

Zimina kutya owa pikwa kiikolitha, uupyakadhi mboka wu na okuungaunga nawo mwene. Lombwela Kalunga shoka wa hala okuninga opo wu sinde uupyakadhi mboka nota ka yambeka oonkambadhala dhoye waaha ye muudhigu wu vule oonkondo dhoye. “Oongoka ta holeke iilonga ye iiwinayi, oye ke na elago, ihe ngoka te yi hempulula note yi etha, oye ta silwa ohenda.” (Omayeletumbulo 28:13) Jesus okwa ti ishewe omu na okugalikana ngeyi: “Ino tu fala mehongololo, aawe, tu hupitha muuwinayi.” (Mateus 6:13) Ongiini to vulu okukala metsokumwe negalikano ndyoka nopeni to vulu okwaadha omayamukulo komaindilo goye?

2. Mona oonkondo okuza mOohapu dhaKalunga. “Oohapu dhaKalunga odhi na omwenyo nodhi na oonkondo dhokulonga sha. . . . Otadhi holola puuyelele omahalo nomadhiladhilo gomomitima dhaantu.” (Aahebeli 4:12) Oyendji mboka ya li oonkolwi oya kwathelwa kokulesha nokutedhatedha oovelise dhOmbiimbeli esiku kehe. Omupisalomi omutilikalunga okwa nyola a ti: “Aanelago oomboka ihaaya landula oondunge dhaagoyoki, . . . ndele ohaa nyanyukilwa okuvulika kompango yOMUWA nohaye yi ilongo omutenya nuusiku. . . . Ashihe shoka taye shi longo, otashi eta eyambeko.”—Episalomi 1:1-3.

Allen ngoka a konakona Ombiimbeli nOonzapo dhaJehova okwa li a kwathelwa a sinde uupyakadhi wokulongitha nayi iikolitha. Okwa ti: “Ondi na uushili kutya ando kapwa li Ombiimbeli nomakotampango ngoka ga kwathela ndje, andola onda sa nale.”

3. Kala ho ipangele mwene. Ombiimbeli otayi ti kutya yamwe mboka ya li oonkolwe megongalo lyopaKriste oya yogwa noya yelithwa ‘kombepo ondjapuki yaKalunga.’ (1 Aakorinto 6:9-11) Ngiini mbela? Omukalo gumwe moka ya li ya kwathelwa ye ethe po uunkolwe nuufukedhi, okukala hayi ipangele yo yene, uukwatya mboka hawu kokekwa kekwatho lyombepo ondjapuki yaKalunga. “Inamu kolwa komaviinu, oshoka uunkolwi otau mú etele oshiponga, ihe udheni Ombepo Ondjapuki.” (Aaefeso 5:18; Aagalati 5:21-23) Jesus Kristus oku uvaneka kutya “Ho yeni yomegulu ota gandja Ombepo Ondjapuki kumboka taye mu indile.” Onkee ano, “indileni, e ta mu pewa.”—Lukas 11:9, 13.

Mboka ya hala okulongela Jehova momukalo ngoka a hokwa, otaya vulu okukala neipangelo mokulesha nomokukonakona Ombiimbeli nomokugalikana aluhe tashi zi komutima. Pehala lyokukala wa teka omukumo, kala wi itaala meuvaneko ndika li li mOohapu dhaKalunga tali ti: ‘Ngoka ta kunu mombepo, nena ota ka teya omwenyo gwaaluhe mombepo. Ano inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.’—Aagalati 6:8, 9.

4. Hogolola eendathano ewanawa. “Enda pamwe naanawino, u likole owino, ihe ngoka ta kala paagoya, ota likola uuwinayi.” (Omayeletumbulo 13:20) Lombwela ookuume koye kombinga yetokolo lyoye lyokulongitha iikolitha pandjele. Oohapu dhaKalunga otadhi londodha kutya ngele owe etha ‘uunkolwi, uufukedhi nomanwino,’ yamwe mboka ya li nale ookuume koye otaya ka kala ya ‘kumwa notaye ke ku sheka nokuli.’ (1 Petrus 4:3, 4) Kala wa tokola okuhulitha po eendathano naamboka taya ka ya moshipala oonkambadhala dhoye dhokulongitha iikolitha pandjele.

5. Itulila po omangambeko gokondandalunde. “Inamu faathana nonkalo yuuyuni mbuka, aawe, Kalunga ne mú shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.” (Aaroma 12:2) Oto ka nyanyukilwa onkalamwenyo ndjoka Kalunga a hokwa, ngele owa pitike omakotampango ngoka ge li mOohapu dhe ge ku wilike mokwiitulila po omangambeko pehala lyokweetha ookuume koye nenge ‘onkalo yuuyuni mbuka’ oyo yi ku wilike. Ongiini to vulu okutokola kutya oto ka nwa shi thike peni?

Ngele iikolitha ohayi yono po oondunge dhoye dhokuyoolola nohayi ku imbi wu dhiladhile nawa, nena oyindji unene kungoye. Onkee ano, ngele owa hogolola okukala ho nu, oshi li nawa wu kale wu shi eyooloko pokati kokunwa she eleka nuunkolwe. Ino ipwililika ngele owu na uupyakadhi wokunwa sha pitilila. Tula po ongamba opo wu kale ho nu pandjele, shoka tashi ke ku kwathela opo waaha nwe sha pitilila.

6. Ilonga okutya aawe. “Onkee oohapu dheni nadhi tye: ‘Eeno, eeno,’ nenge ‘aawe, aawe.’” (Mateus 5:37) Ilonga okutinda iikolitha momukalo omwaanawa ngele kuume koye ngoka e ku hiya ote ku thiminike wu nwe, nonando ite shi ningi momukalo omwiinayi. ‘Oohapu dheni nadhi kale aluhe oombwanawa, dha toyala omongwa, ne mu kale mu shi shi nkene mu na okuyamukula omuntu kehe.’—Aakolossa 4:6, OB-1954.

7. Konga ekwatho. Pula ookuume koye mboka taya vulu oku ku kwathele wu pangele okunwa kwoye notaya vulu oku ku kwathela pambepo. “Yaali ye vule gumwe, oshoka oye na ondjambi ombwanawa yomaipyakidhilo giilonga yawo. Oshoka gumwe ngele ta punduka, mukwawo ota vulu oku mu toola po.” (Omuuvithi 4:9, 10; Jakob 5:14, 16) Ehangano lyOpaigwana ndyoka hali ungaunga nOonkolwe nosho wo Oombwiyi mIilongo yaHangana olya gandja omayele tali ti: “Otashi vulika shi kale oshidhigu omathimbo gamwe wu ethe po thiluthilu okunwa. Pula uukwanegumbo nookuume koye ye ku kwathele wu adhe elalakano lyoye.”

8. Kala petokolo lyoye. “Mokupulakena kweni oohapu dhaKalunga inamu ifundjaleka, ihe okupulakena kweni naku mú fale miilonga. Ihe ngoka ti italele mompango ya gwana yokumangulula, te yi pulakene noite yi dhimbwa, ihe ote yi gwanitha, oye ota yambekwa moku shi ninga.”—Jakob 1:22, 25.

Nkene to vulu okumanguluka muupika wiikolitha

Hakehe omuntu ha nu sha pitilila ha ningi ombwiyi. Ihe yamwe ohaya tameke okunwa unene nenge iikando oyindji e taya ningi aapika yiikolitha. Molwaashoka iikunwa ohayi piki omuntu palutu nopamadhiladhilo, mboka ya pikwa kuyo oye na okutokola toko opo ya manguluke ko kuyo noya pumbwa wo ekwatho lyopambepo. Allen okwa ti: “Sho nde etha po iikolitha onda li muudhigu shili. Onde ke shi mona mo kutya onda pumbwa ekwatho lyopaunamiti li gwedhe ekwatho lyopambepo ndyoka nda mona nale.”

Aanwi oyendji oya pumbwa ekwatho lyopaunamiti opo li ya kwathele molugodhi lwawo lwopambepo ya manguluke muupika wokulongitha nayi iikolitha.b Yamwe oya pumbwa okutulwa moombete opo ye ethe po okunwa nenge ya pewe omiti opo yaaha kale we nomwamwa gwokunwa noyi ingambeke okunwa iikolitha. Omwana gwaKalunga ngoka a li a longo iikumithalonga okwa ti: “Aandjolowele inaa pumbwa omwaaludhi, ihe aavu tuu ayeke.”—Markus 2:17.

Uuwanawa mboka hawu zi mokupulakena kelongo lyopaKalunga

Omayele ngoka ge li mOmbiimbeli kombinga yiikolitha oga za kuKalunga kashili, ngoka e tu halela uuwanawa waaluhe, ihe hakwiinyanyudha owala pakathimbo. Allen okwa popi konima yomimvo 24 sho e etha po iikolitha a ti: “Osha li oshiwanawa okutseya kutya otandi vulu okukala omuntu i ili nokwiilonga kutya Jehova okwa hala okukwathela ndje ndi opaleke onkalamwenyo yandje nokwe shi ningila ndje . . . ” Sho Allen ta pulwa okwa li ta popi ta mwena po, molwaashoka okwa li ta hala kulila sho ta dhimbulukwa onkalo ye yonale. Okwa ti: “O!, . . . okutseya kutya Jehova ohu uvu ko omaudhigu getu noku na ko nasha natse noha gandja wo ekwatho ndyoka lya pumbiwa, otashi kumitha noonkondo.”

Onkee ano, ngele oho longitha iikolitha nayi nenge ye ku pika, ino teka omukumo nenge wu thike pehulithodhiladhilo kutya ku na we siku noka lunduluka. Allen nosho wo yalwe oyendji osho ya li ngaaka, ihe ngashingeyi ohaya nu pandjele nenge ye etha po iikolitha thiluthilu. Aantu mboka inayi ipa uusama mokuninga ngaaka, nangoye ito ki ipa uusama.

Kutya nee owa hogolola okukala ho nu pandjele iikolitha nenge okukala ihoo nu sha, kaleka oohapu dhaKalunga momadhiladhilo ndhoka tadhi ti: “Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tookele kungoye wa fa omakuthikuthi gomefuta.”—Jesaja 48:18.

[Omanyolo gopevi]

[Oshimpungu/Ethano pepandja 8]

Mbela onda pikwa kiikolitha?

Ipula mwene to ti:

• Mbela ohandi nu iikolitha oyindji shi vulithe shito?

• Mbela ohandi nu olundji shi vulithe nale?

• Mbela ohandi nu unene?

• Ohandi longitha iikolitha opo ndi ungaunge niimpwiyu nokuhenuka omaupyakadhi?

• Ookuume kandje niilyo yuukwanegumbo mbela ohaya popi shi na ko nasha nokunwa kwandje?

• Ohandi iyadha ndi na oonkalankongo naantu megumbo, kiilonga nongele ndi li molweendo omolwokunwa kwandje?

• Ohandi vulu ngaa okupititha po oshiwike inaandi nwa iikolitha?

• Mbela ohandi mono oshidhigu ngele yalwe yi idhilika iikolitha?

• Mbela ohandi holeke yamwe kutya ohandi nu iikolitha yi thike peni?

Ngele owa yamukula kutya eeno, kulimwe nenge kugamwe gomomapulo ngaka, owa pumbwa okukatuka onkatu opo wu nwe pandjele.

[Oshimpungu/Ethano pepandja 9]

Ninga omatokolo gopandunge ngele tashi ya piikolitha

Manga inoo tameka okunwa ipula ngeyi:

• Mbela oshi li pandunge kungame okunwa nenge inandi nwa?

Omayele: Ngele ito vulu okunwa pandjele etha po iikolitha.

• Ondi na okunwa shi thike peni?

Omayele: Itulila po ongamba omanga iikolitha inaayi yona po oondunge dhoye dhokuyoolola.

• Uunake ndi na okunwa?

Omayele: Ino nwa uuna to ka hinga nenge to ka longa iilonga mbyoka tayi ku pula wu kale wa tonata, uuna to ka kutha ombinga miinima yopalongelokalunga, uuna wu li metegelelo nuuna to nu omiti dhokoshipangelo ndhoka ihaadhi kwatathana niikolitha.

• Openi ndi na okunwina?

Omayele: Nwina pehala tali opalele, ino nwa meholamo noino nwina montaneho yaamboka taya ka pundukithwa kiikolitha.

• Ondi na okunwa noolye?

Omayele: Nwa nookuume tayo opalele nenge niilyo yuukwanegumbo, ihe hanoonkolwe.

[Oshimpungu/Ethano pepandja 10]

Nkene Oohapu dhaKalunga dha kwathela ngoka a li onkolwe

Omulumentu gwedhina Supot Omuthailand okwa li onkolwe. Okwa ziilile ko owala ha nu uusiku. Mokweendela ko kwethimbo, okwa kala ha nu ongula onene nopomwiha. Olundji oha nu nelalakano lyokukolwa. Ihe okwa tameke okukonakona Ombiimbeli nOonzapo dhaJehova. Supot okwe etha po okunwa, sho i ilongo kutya Jehova Kalunga ina hokwa oonkolwe. Konima yokathimbo, okwa li a tameke ishewe nokunwa kwe. Onkalo ndjoka oya li ya vundakanitha uukwanegumbo we.

Nonando ongaaka, Supot okwa li e hole Jehova nokwa li a hala oku mu longela momukalo gu uka. Ookuume ke oya tsikile oku mu kwathela nokuladhipika omukulukadhi noyana yaali ya kale haya kala naye ethimbo lya gwana. Ihe oohapu ndhoka tadhi ti kutya ‘oonkolwi itadhi ka ya muukwaniilwa waKalunga’ odha kwathele Supot a lundulule onkalo ye. (1 Aakorinto 6:10, KB) Okwa li e shi mono kutya oku na okukambadhala a mana mo opo a sinde uupyakadhi wokunwa mboka e na.

Okwa tokola opo e ethe po iikolitha thiluthilu. Kekwatho lyombepo ondjapuki nokewiliko lyOohapu dhaKalunga nokekwatho lyuukwanegumbo we nosho wo egongalo, okwa li a mono oonkondo dhopambepo nokwe etha po okunwa iikolitha. Uukwanegumbo we owa li wa nyanyukwa sho a ninginithwa shoka shi li endhindhiliko lyokwiiyapulila Kalunga. Ngashingeyi Supot oku na ekwatathano lyopothingo naKalunga ndyoka a kala a hala nale nota longitha ethimbo lye okukwathela yalwe pambepo.