Oto vulu okukala nomwenyo sigo aluhe kombanda yevi

ETEGAMENO NDIKA KALI SHI TUU EWANAWA! Omushiti gwetu okwe tu uvanekela omwenyo gwaaluhe huka kombanda yevi. Ihe oyendji ohaya mono oshidhigu oku shi itaala. Ohaya ti: ‘Atuheni otu na owala okusa. Eso oli li oshitopolwa shonkalamwenyo.’ Yalwe oyu uvite kutya omuntu ota vulu okukala nomwenyo sigo aluhe, ihe hakombanda yevi. Ohaya ti kutya omuntu ota vulu owala okumona omwenyo gwaaluhe ngele a si, e ta yi megulu. Ngoye oto ti ngiini?

Manga inoo yamukula, omolwashike itoo tala omayamukulo gOmbiimbeli komapulo ngaka gatatu: Omukalo moka aantu ya shitwa otagu ulike shike kombinga yethimbo ndyoka ya li ye na okukala nomwenyo? Elalakano lyaKalunga lyopetameko li na ko nasha nevi nosho wo naantu olini? Oshe ende ngiini opo aantu ya kale haya si?

AANTU OYA SHITWA MOMUKALO GWI IKALEKELWA

Miinima ayihe mbyoka Kalunga a shita kombanda yevi, aantu oya shitwa lela momukalo gwi ikalekelwa. Ngiini mbela? Ombiimbeli otayi popi kutya aantu oyo owala ya shitwa “oshifetha” shaKalunga. (Genesis 1:26, 27) Shoka osha hala okutya ngiini? Osha hala okutya oya shitwa nomaukwatya ga fa gaKalunga, ngaashi ohole nuuyuuki.

Shimwe ishewe, aantu oya shitwa haya vulu okudhiladhila, okutompathana, okutseya eyooloko pokati kaashoka oshiwanawa naashoka oshiwinayi nokukala ye na ekwatathano naKalunga. Nomolwaashono hatu nyanyukilwa okutala uunenesimano wewangandjo, iinima iikumithi meshito niinima yilwe, ngaashi omathano, omusika niikwatewo. Shoka sha dhenga mbanda osho kutya, aantu oyo owala haya vulu okulongela Omushiti. Omaukwatya ngoka ogo ga yoolola ko thiluthilu aantu kiishitwa yilwe kombanda yevi.

Onkee ano, ipula ngeyi: Ando Kalunga okwa li a hala owala tu kale nomwenyo uule womimvo 70 nenge 80, mbela ando okwe tu pa ngaa omaukwatya ngoka omandhindhilikwedhi nosho wo ompito inaayi ngambekwa yoku ga kokeka noku ga hwepopaleka? Oshili oyo kutya Kalunga okwe tu pe omaukwatya ngoka gi ikalekelwa tu vule okunyanyukilwa onkalamwenyo sigo aluhe kombanda yevi.

ELALAKANO LYAKALUNGA LYOPETAMEKO

Aantu yamwe ohaya ti kutya Kalunga ka li nando a hala aantu ya kale nomwenyo sigo aluhe kombanda yevi. Ohaya ti kutya evi olya li owala aniwa lya shitwa li li ehala lyokukala pakathimbo, hoka aantu taya makelwa, opo ku talike kutya oolye ya gwana okuya megulu, ya ka kale pamwe naKalunga sigo aluhe. Ihe ando osho sha li ngawo, mbela ando itashi ningitha nando Kalunga a kale a fa oye he etitha uukolokoshi nuuwinayi mbuka wu udha kombanda yevi? Shoka ando oshi li ompinge nomaukwatya gaKalunga. Ombiimbeli otayi mu popi tayi ti: ‘Oondjila dhe adhihe odhu uka. Kalunga omudhiginini kee na uugoyoki, omuyuuki nomunashili.’ — Deuteronomium 32:4.

Ombiimbeli otayi popi sha yela elalakano lyaKalunga lyopetameko li na ko nasha nevi tayi ti: “Egulu lyokombandambanda olyo ehala lyOmuwa mwene, ihe evi okwe li pe aana yaantu.” (Episalomi 115:16) Kalunga okwa shiti evi li kale ehala ewanawa notali kalelele lyokukala aantu nokwa tula ko iinima ayihe mbyoka twa pumbwa, tu vule okunyanyukilwa onkalamwenyo tayi ti sha nokaayi na ehulilo. — Genesis 2:8, 9.

“Egulu lyokombandambanda olyo ehala lyOmuwa mwene, ihe evi okwe li pe aana yaantu.” — Episalomi 115:16

Ombiimbeli oya popya wo sha yela kombinga yelalakano lyaKalunga li na ko nasha naantu. Kalunga okwa li a lombwele aaihokani yotango yu ‘udhithe evi alihe, ye li tule mepangelo lyawo noya pangele iinamwenyo ayihe tayi inyenge kulyo.’ (Genesis 1:28) Kasha li tuu uuthembahenda kuyo okusila oshimpwiyu nokutamununa mo eviparadisa ndyoka li li ehala lyawo lyokukala! Osha yela kutya Adam naEva nosho wo aanona mboka ya li taya ka mona, oya li ye na etegameno lyokukala nomwenyo sigo aluhe kombanda yevi, ihe hamegulu.

OMOLWASHIKE HATU SI?

Omolwashike nduno hatu si? Ombiimbeli otayi ti kutya shimwe shomiishitwa yaKalunga yopambepo, shoka konima yethimbo she ki ithanwa omunashipotha Satana Ondiyapoli, osha li sha kambadhala okuya moshipala omalongekidho gaKalunga moshikunino shaEden. Ngiini mbela?

Satana okwa heke aavali yetu yotango, Adam naEva, ye mu wayimine mokutukulila Kalunga oshipotha. Sho Satana a popi kutya aniwa Kalunga okwa li te ya indike sha oshiwanawa, ano uuthemba wokutokola yo yene shoka oshiwanawa naashoka oshiwinayi, Adam naEva oya gama kuSatana e taya pilamene Kalunga. Oshilanduliko? Oya ka sa, ngaashi naanaa Kalunga e ya lombwele. Oya kanitha etegameno lyokukala sigo aluhe mOparadisa kombanda yevi. — Genesis 2:17; 3:1-6; 5:5.

Okwaavulika kwaAdam naEva okwa guma aantu ayehe sigo okunena. Oohapu dhaKalunga otadhi ti: “Uulunde owe etwa muuyuni komuntu gumwe [Adam], nuulunde we owe etelele eso. Onkee ano eso olya taandele maantu ayehe.” (Aaroma 5:12) Ohatu si, oshoka otwa thigulula uulunde neso kaavali yetu yotango, ihe hamolwaashono Kalunga osho utha shi kale ngawo.

OTO VULU OKUKALA NOMWENYO SIGO ALUHE KOMBANDA YEVI

Uunashipotha mboka wa holoka muEden inawu ya moshipala elalakano lyaKalunga li na ko nasha naantu nosho wo nevi. Kalunga okwi inyengithwa kohole ye nokuuyuuki we e tu mangulule mo muupika wuulunde neso, mbyoka twa thigulula. Omuyapostoli Paulus okwe shi yelitha a ti: “Eso olyo ondjambi yuulunde, ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.” (Aaroma 6:23) Omolwohole ye, Kalunga okwa “gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Jesus okwa kulile ko ashihe shoka Adam a kanitha, sho a gandja nehalo ewanawa omwenyo gwe gu li iikulila.a

Masiku euvaneko lyaKalunga li na ko nasha neviparadisa otali ka gwanithwa. Onakuyiwa ndjika ombwanawa oto vulu oku yi mona ngele owa vulika kekumagidho lyaJesus ndyoka tali ti: “Indeni mo, mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba. Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taye yi mono.” (Mateus 7:13, 14) Ano onakuyiwa yoye oyi ikolelela komatokolo ngoka to ningi. Mbela oto ka ninga po shike?