Kalunga okwa gwanitha po shike?

Ngele owa hala okutseya omuntu nawa, owa pumbwa okutseya shoka a gwanitha po nale nomashongo ngoka a sinda. Sha faathana, ngele owa hala okutseya Kalunga nawa, owa pumbwa okutseya shoka a gwanitha po nale. Ngele we shi ningi, oto ka kuminwa okutseya nkene iinima mbyoka a ninga monakuziwa tayi tu etele uuwanawa kunena nomonakuyiwa.

KALUNGA OKWA SHITA IINIMA AYIHE OMOLWUUWANAWA WETU

Jehova Kalunga oye Omushiti dhingi, naasho “a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we. Aantu otaa vulu okukoneka Kalunga miinima mbyoka e yi shiti.” (Aaroma 1:20) “Okwa shiti evi koonkondo dhe; nokuunongo we okwa umbu uuyuni nokwa alele omagulu.” (Jeremia 10:12) Iinima iikumithi mbyoka Kalunga a shita otayi holola wo kutya oku na ko nasha natse.

Dhiladhila wo kunkene Jehova a ninga onkalamwenyo yetu yi ikalekelwa, sho e tu shiti “oshifetha she.” (Genesis 1:27) Shika otashi ulike kutya okwe shi ningi tashi wapa tu vule okuholela omaukwatya ge ga dhenga mbanda. Okwe tu shita tu na ehalo lyokukala tu na ekwatathano naye, ano tu kale tu shi nkene ha tala ko iinima naashoka a lenga. Ngele otwa kambadhala okuninga iinima mbyoka, otatu ka kala twa nyanyukwa shili notatu ka kala nonkalamwenyo tayi ti sha. Kakele kaashono, okwe tu pa ompito yokukala tu na ekwatathano naye.

Iinima mbyoka Kalunga a shitila kombanda yevi otayi ulike kutya oku tu uvitile ngiini. Omuyapostoli Paulus okwa popile kutya Kalunga okwi ‘iholola miilonga iiwanawa mbyoka he yi ningile aantu: ohe tu pe omvula tayi zi kegulu niilya pethimbo lyo opala, ohe tu pe iikulya noha nyanyudha oomwenyo dhetu.’ (Iilonga 14:17) Kalunga ine tu pa owala shoka twa pumbwa, opo tu kale nomwenyo. Okwe tu pa iinima oyindji noya yoolokathana, opo tu nyanyukilwe onkalamwenyo. Ihe okwe tu nunina wo iinima yilwe oyindji kaayi shi owala mbyoka.

Jehova okwa shiti evi, opo aantu ya kale ko sigo aluhe. Ombiimbeli otayi ti: “Evi okwe li pe aana yaantu.” “Ine li shita li mbugale, ihe ehala lyokukala aantu.” (Episalomi 115:16; Jesaja 45:18) Oolye taya ka kala kombanda yevi notaya ka kala ko uule wethimbo li thike peni? Ombiimbeli otayi yamukula tayi ti: “Aayuuki otaa ka thigulula evi e taa kala mo sigo aluhe.” — Episalomi 37:29.

Petameko Jehova okwa li a shiti omulumentu nomukiintu gwotango, Adam naEva. Okwe ya tula moparadisa kombanda yevi, opo ‘ya longe mo noya keelele mo.’ (Genesis 2:8, 15) Kalunga okwa li e ya pe iinakugwanithwa yopaali mbyoka ya li taya vulu okunyanyukilwa. Okwa ti: “Valathaneni, ne mu indjipale nokuudha evi alihe. Li tuleni mepangelo lyeni.” (Genesis 1:28) Kungawo, Adam naEva oya li ye na etegameno lyokukala nomwenyo sigo aluhe kombanda yevi. Ihe shinikitha oluhodhi, oya hogolola kaaya vulike kuKalunga nomolwaashono ya kanitha etegameno lyokukala mongundu ‘yaayuuki mboka taya ka thigulula evi.’ Ihe ngaashi tatu ke shi mona, shoka ya ningi inashi lundulula elalakano lyaJehova li na ko nasha naantu nenge nevi. Tango natu taleni oshinima shilwe shoka Kalunga a ninga.

KALUNGA OKWE TU PA OOHAPU DHE

Ombiimbeli oya tseyika wo yi li Oohapu dhaKalunga. Omolwashike Kalunga e tu pa Ombiimbeli? Etompelo lya simanenena, olyo kutya opo tu vule okwiilonga kombinga ye. (Omayeletumbulo 2:1-5) Odhoshili kutya Ombiimbeli inayi yamukula epulo kehe tashi vulika tu na kombinga yaKalunga, nokaku na embo tali vulu oku shi ninga. (Omuuvithi 3:11) Ihe kehe shimwe shoka shi li mOmbiimbeli otashi tu kwathele tu tseye Kalunga. Ohayi tu kwathele tu mone kutya oye lye, okupitila momukalo moka ha ungaunga naantu. Ohayi tu kwathele tu mone kutya aantu yeni e hole naamboka kee hole. (Episalomi 15:1-5) Ohayi tu kwathele tu mone kutya oha tala ko ngiini omikalo moka aantu haye mu longele, uuyogoki wopamikalo niinima yopamaliko. Ombiimbeli oye tu lombwela sha yela omaukwatya gaJehova okupitila moohapu nomiilonga yOmwana, Jesus Kristus. — Johannes 14:9.

Elalakano lilwe lyaJehova lyoku tu pa Ombiimbeli, olyo okutseya nkene tu na okukala nonkalamwenyo ombwanawa noyi na elalakano. Jehova ote tu lombwele mOmbiimbeli nkene tatu vulu okukala nuukwanegumbo wu uvite ombili, twa gwanenwa nonkene tatu vulu okuungaunga niimpwiyu yonkalamwenyo. Ngaashi tashi ka kundathanwa moshifo shika, Ombiimbeli otayi gandja omayamukulo gomapulo ga simana monkalamwenyo, ngaashi: Omolwashike tatu mono iihuna? Onakuyiwa otayi ka kala ya tya ngiini? Otayi tu yelithile wo shoka Kalunga a ninga nale, opo a shilipaleke kutya elalakano lye lyopetameko olya gwanithwa.

Opu na wo omikalo dhilwe tadhi ulike kutya Ombiimbeli oyi li embo lyi ikalekelwa noya nyolwa owala kuKalunga. Oya nyolwa muule womimvo 1 600 kaalumentu 40 lwaampono. Ihe nonando ongawo, oyi na enenedhiladhilo limwe, molwaashoka oya nyolwa shili kuKalunga. (2 Timoteus 3:16) Inayi fa omambo galwe gonale, oshoka nonando opwa pita omimvo odhindji, shoka sha nyolwa mo oshi li paushili nosha kolekwa kiinyolwa oyindji yOmbiimbeli yonale. Niishewe Ombiimbeli opo yi li natango, nonando opwa kala nokuningwa oonkambadhala kaayi tolokwe, kaayi taandelekwe nokaayi leshwe. Kunena oyo unene embo lya tolokwa momalaka ogendji nolya taandelekwa apuhe. Molwaashoka Ombiimbeli oko yi li sigo onena, otashi ulike kutya “oohapu dhaKalunga ketu otadhi kala sigo aluhe.” — Jesaja 40:8.

KALUNGA OKWE TU SHILIPALEKA KUTYA ELALAKANO LYE OTALI KA GWANITHWA PO

Oshinima shilwe shoka Kalunga a ninga oosho e tu shilipaleke kutya elalakano lye li na ko nasha naantu otali ka gwanithwa. Ngaashi sha popiwa metetekelo, Kalunga okwa li a hala aantu ya kale kombanda yevi sigo aluhe. Ihe sho Adam inaa vulika kuKalunga e ta yono, okwa kanitha omwenyo gwaaluhe pamwe noluvalo lwe. Ombiimbeli otayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) Sho Adam inaa vulika, elalakano lyaKalunga olya li tali monika lya fa itaali vulu we okugwanithwa. Kalunga okwa li a ningi po shike?

Jehova Kalunga okwa katuka metsokumwe nomaukwatya ge. Okwa li a geele pauyuuki Adam naEva sho ya yono, ihe omolwohole ye okwa ningi po sha, opo a kwathele oluvalo lwawo. Molwaashoka Jehova omunongo, okwa li a ungaunga nonkalo ndjoka, e ta popi nkene te ke yi kandula po. (Genesis 3:15) Okwa li te ke ya mangulula mo muulunde nomeso okupitila mOmwana, Jesus Kristus. Shoka osha li sha kwatela mo shike?

Jehova okwa tumu Omwana kombanda yevi, opo a longe aantu ondjila ndjoka tayi fala komwenyo gwaaluhe “nokugandja omwenyo gwe, a hupithe oyendji.”a (Mateus 20:28; Johannes 14:6) Jesus okwa li ta vulu okugandja omwenyo gwe gu li iikulila, molwaashoka ka li omulunde ngaashi Adam. Ihe molwaashoka Jesus ka li a yono ngaashi Adam, okwa li u ulike kutya omuntu kee shi omulunde ota vulu okukala omudhiginini nomuvuliki sigo omeso. Jehova okwa li a yumudha Jesus a ka kale nomwenyo megulu, oshoka okwa li a si nonando ke na ondjo. Ngashingeyi Jesus okwa li ta vulu okuninga shoka Adam inaa vula okuninga, ano oku pa aantu aavuliki etegameno lyokukala nomwenyo sigo aluhe. Ombiimbeli otayi ti: “Ngaashi aantu ayehe ya ningi aalunde omolwokwaavulika kwomuntu gumwe, ano osho tuu oyendji otaa ningwa aayuuki koshipala shaKalunga omolwokuvulika kwomuntu gumwe.” (Aaroma 5:19) Okupitila mekuliloyambo lyaJesus, Kalunga ota ka gwanitha po euvaneko lye, opo aantu ya ka kale kombanda yevi sigo aluhe.

Otatu ilongo oshindji kombinga yaJehova momukalo moka a ungaunga nomaupyakadhi ngoka ga etithwa kokwaavulika kwaAdam. Otu wete kutya kapu na shoka tashi vulu okukeelela Jehova a gwanithe po shoka a li a lalakanena. Shoka a popya ohashi ‘tsakanithwa’ nenge ohashi gwanithwa aluhe. (Jesaja 55:11) Otatu ilongo wo kutya Jehova oku tu hole unene. Ombiimbeli otayi ti: “Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe. Ohole hayo ndjoka kutya ando twa li tu hole Kalunga, aawe, ihe Kalunga oye kwa li e tu hole tango nokwa tumu Omwana, a ninge eyambo lyokudhima po oondjo dhetu.” — 1 Johannes 4:9, 10.

Kalunga “ini ihupithila Omwana, ihe okwe mu gandja molwetu atuhe.” Shika otashi tu shilipaleke kutya ote ke tu pa wo ‘iinima yilwe ayihe omagano’ ngaashi u uvaneka. (Aaroma 8:32) Kalunga okwe tu uvanekela shike? Lesha oshitopolwa sha landula ko.