Masiku Kalunga ota ka hulitha po okumona iihuna

“Omuwa, sigo uunake ndi na oku ku kugila ekwatho ngoye itoo pulakene, ngoye itoo tu hupitha mo momathiminiko?” (Habakuk 1:2, 3) Habakuk oye a popile oohapu ndhoka, omulumentu ngoka a li hokiwa kuKalunga. Mbela egalikano lye otali ulike kutya okwa li e na eitaalo enkundi? Ahawe. Kalunga okwa li a shilipaleke Habakuk kutya okwa tula po nale ethimbo ndyoka ta ka hulitha po okumona iihuna. — Habakuk 2:2, 3.

Uuna ngoye nenge gumwe ngoka wu hole ta mono iihuna, oshipu kungoye okuthika pehulithodhiladhilo kutya Kalunga ote ende kashona, nosho wo kutya okwa li e na okuya mo olunyala. Ihe Ombiimbeli otayi tu shilipaleke tayi ti: “Omuwa ina tokelwa okutsakanitha shoka e shi uvaneke, ngaashi aantu yamwe taa dhiladhila. Oye okwe mu idhidhimikile owala, oshoka ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” — 2 Petrus 3:9.

UUNAKE KALUNGA TA KA KATUKA ONKATU?

Ote ke shi ninga masiku. Jesus okwa li u like kutya epipi lyontumba otali ka mona iiningwanima mbyoka tayi ka ulika kutya otu li pethimbo ‘lyehulilo lyuuyuni.’ (Mateus 24:3-42) Egwanitho lyehunganeko lyaJesus pethimbo lyetu otali ulike kutya ethimbo lyaKalunga lyokuya mo olunyala oli li popepi.a

Ihe mbela ongiini Kalunga ta ka hulitha po okumona iihuna? Jesus sho a li kombanda yevi, okwa li u ulike kutya Kalunga oku na oonkondo dhokuhulitha po okumona iihuna kwaantu. Tala kiiholelwa yimwe.

Iiponga yopaunshitwe: Manga Jesus a li naayapostoli ye mefuta lyaGalilea, oshikungulu oshidhigu oshaale shi ninginithe ombautu yawo. Ihe Jesus okwa li u ulike kutya ye naHe otaya vulu okupangela iinima yopaunshitwe. (Aakolossa 1:15, 16) Jesus okwa ti: “‘Mwena!’ Ombepo oya kodha e taku ti thilu.” — Markus 4:35-39.

Uuwehame: Jesus okwa li e shiwikile nawa okwaaludha aaposi niilema nosho wo mboka ya li ye na uuvu woshintona, wuulepela nenge uuvu kehe. Okwa “aludha ayehe mboka ya li taa alukwa.” — Mateus 4:23, 24; 8:16; 11:2-5.

Ondjala: Jesus okwa li a longitha oonkondo ndhoka li a pewa kuHe i indjipaleke iikulya. MOmbiimbeli omwa nyolwa kutya pethimbo lyuukalele we okwa li a kutitha aantu omayuvi. — Mateus 14:14-21; 15:32-38.   

Eso: Okupitila momayumuko gatatu ngoka Jesus a li a ningi, oku ulike sha yela kutya Jehova oku na oonkondo dhokuhulitha po eso. Gumwe gwomwaamboka a li a yumudha okwa adhika a sa uule womasiku gane. — Markus 5:35-42; Lukas 7:11-16; Johannes 11:3-44.