Kala wu na olukeno ‘naantu ayehe’
SHO Jesus a longo aalongwa ye nkene ye na okuuvitha onkundana ombwanawa, okwe ya londodha kutya haantu ayehe taya ka kala ya hala okupulakena ketumwalaka lyUukwaniilwa. (Luk. 10:3, 5, 6) Uuna tu li muukalele, otashi vulika tu tsakaneke yamwe mboka taye tu yamukula nayi nenge taye tu ihumbatele nayi. Uuna taye shi ningi, otashi vulika shi kale oshidhigu kutse tu ya ulukile olukeno noku ya uvithila.
Omuntu ngoka e na olukeno, oha kala e shi oompumbwe dhayalwe nosho wo omaupyakadhi gawo. Onkee oha kala e ya uvitile ohenda nokwa hala oku ya kwathela. Nonando ongawo, ngele otwa tameke okukala kaatu uvitile olukeno mboka tatu tsakaneke muukalele, otashi vulika tu ende tatu kanitha uulaadhi nokukala kaatu na ehalo lyokuuvitha. Mepingathano naashono, ngele otwa kala tu na olukeno, otwa fa tatu gwedha iikuni oyindji pomulilo, sha hala okutya, twa hwama mokuuvithila aantu. — 1 Tes. 5:19.
Ongiini tatu vulu okukala tu na olukeno, nonando otashi vulika shi kale oshidhigu oku shi ninga? Natu ka kundathaneni iiholelwa itatu ya dhenga mbanda, mbyoka twa pumbwa okuholela. Oshiholelwa shaJehova, shaJesus noshomuyapostoli Paulus.
HOLELA OLUKENO LWAJEHOVA
Uule womimvo omayovi, Jehova okwa kala nokwiidhidhimikila mboka taya nyateke edhina lye. Okwa kala “omwaanawa kumboka ihaa pandula naamboka oonakwiihola” nenge tu tye aakolokoshi. (Luk. 6:35) Okwiidhidhimika kwe, oku ulike kutya oku na olukeno. Jehova okwa hala “aantu ayehe” ya hupithwe. (1 Tim. 2:3, 4) Nonando Kalunga oku tonde uukolokoshi, aantu okwe ya tala ko ye na ongushu noina hala nando ogumwe a kanithe omwenyo gwe. — 2 Pet. 3:9.
Jehova oku shi kutya Satana okapyoko ngele tashi ya pokupukitha aantu yi itaale iifundja. (2 Kor. 4:3, 4) Aantu oyendji oya kala nokulongwa iifundja nomikalo omiwinayi okuza kuunona wawo, noshi li eshongo kuyo ya taambe ko oshili. Jehova okwa halelela oku ya kwathela. Otu shi shi ngiini?
Tala nkene Jehova a li a tala ko Aaninive. Nonando oya li aakolokoshi, Jehova okwa lombwele Jona a ti: “Ngame ote kala ngiini, ndaa uvitile Ninive, oshilando oshinene, olukeno? Oshi na [aantu, OB-1954] ye vule 120 000.” (Jona 4:11) Jehova okwa li a mono kutya Aaninive oya pumbwa okukwathelwa pambepo, onkene okwa tumu ko Jona e ke ya londodhe.
Ngaashi Jehova, natse otwa tala ko aantu ye na ongushu. Otatu vulu oku mu holela, mokukala twa halelela okukambadhala okukwathela mboka taye tu pulakene, nonando otashi vulika taya monika itaaya ka taamba ko oshili.
HOLELA OLUKENO LWAJESUS
Ngaashi He, Jesus naye okwa li u uvitile ohenda mboka ya li ya pumbwa okukwathelwa pambepo. Ombiimbeli otayi ti: “Sho a tala oongundu dhaantu, okwa li e ya uvitile ohenda, oshoka oya li ya hepekwa noya loloka ya fa oonzi dhaa na omusita.” (Mat. 9:36) Jesus okwa li e wete kutya oye li monkalo yini. Okwa li wo e shi mono kutya mboka ye ya kuye ye mu pulakene sho ta popi, oya longwa iifundja noya kala taya ungaungiwa nayo nayi kaawiliki yomalongelokalunga gawo. Nonando Jesus okwa li e shi kutya oyendji mboka ya li ye ya oku mu pulakena, oya li taya ka imbwa kiinima yontumba ya ninge aalanduli ye, okwa tsikile ‘oku ya longa iinima oyindji.’ — Mark. 4:1-9.
Ino teka omukumo, ngele omuntu ke na ohokwe petameko
Uuna onkalo yomuntu ya lunduluka, otashi vulika a pulakene ketumwalaka lyOmbiimbeli
Uuna aantu inaaya hala okupulakena ketumwalaka lyetu, otwa pumbwa okudhiladhila muule nokwiipula kutya omolwashike inaaya hala. Yamwe otashi vulika ya kale ye na etaloko ewinayi kombinga yOmbiimbeli nenge kombinga yUukriste, omolwomikalo omiwinayi dhaamboka hayi iti kutya Aakriste. Yalwe otashi vulika ya lombwelwa iifundja kombinga yeitaalo lyetu. Natango, yalwe otashi vulika ya taalelwe komashongo okuziilila kaantu yomomudhingoloko nenge kiilyo yuukwanegumbo, ngele oya pulakene kutse.
Yamwe mboka hatu tsakanene nayo muukalele, otashi vulika kaaye tu pulakene, omolwoonkalo oondhigu ndhoka ya pita mudho. Omumwameme Kim, ngoka e li omutumwa, okwa ti: “Aantu oyendji moshitopolwa moka hatu uvithile, oya kanitha omaliko gawo agehe, omolwiita. Kaye na etegameno lyashili lyonakuyiwa. Oya lulilwa noshidhigu kuyo okwiinekela omuntu. Moshitopolwa shika, olundji ohatu tsakaneke mo mboka taya pataneke etumwalaka lyetu. Oshikando shimwe, onda ponokelwa, manga nda li tandi uvitha.”
Kim okwa li a kambadhala ngiini okuulika olukeno, nonando okwa li ta ungaungiwa naye nayi? Okwa ti: “Uuna aantu taya ungaunga nangame nayi, ohandi kambadhala okukaleka momadhiladhilo Omayeletumbulo 19:11, ndjoka tayi ti: ‘Oondunge dhomuntu otadhi mu ningi omunamutimahenda.’ Okudhiladhila koonkalo ndhoka aantu yomoshitopolwa shetu ya pita, okwa kwathela ndje ndi kale ndi na olukeno. Haantu ayehe hatu tsakaneke haye tu ihumbatele nayi. Moshitopolwa shika, otu na mo omaishunoko gamwe omawanawa.”
Otashi vulika tu ipule tatu ti: ‘Ando ongame nda li tandi uvithilwa, ando ondi inyenge ngiini ketumwalaka lyUukwaniilwa?’ Pashiholelwa, ongiini ngele otwa kala nokulombwelwa iifundja olundji kombinga yOonzapo dhaJehova? Moonkalo dha tya ngawo, otashi vulika natse ando tu inyenge nayi notatu ka kala twa pumbwa okuulukilwa olukeno. Uuna tu na momadhiladhilo oohapu dhaJesus, ndhoka tadhi ti natu ungaunge naantu momukalo moka twa hala ya ungaunge natse, otashi ke tu inyengitha tu yaalele yalwe nokuli nuuna oshidhigu oku shi ninga. — Mat. 7:12.
HOLELA OLUKENO LWAPAULUS
Omuyapostoli Paulus oku ulukile aantu olukeno, nokuli naamboka ya li taye mu hepeke. Omolwashike mbela? Omolwaashoka naye osho a li nale. Okwa ti: “Ngame onda li nale handi mu popi nayi, nde mu tidhagana nonde mu sheke. Ihe Kalunga okwa sile ndje ohenda, oshoka onda li inaandi itaala nokanda li ndi shi wo shoka te ningi.” (1 Tim. 1:13) Paulus okwe shi dhimbulula kutya Jehova naJesus oya li ye mu sile ohenda lela. Otashi vulika maantu mboka a uvithile, a mono mo iikala iiwinayi mbyoka a li e na nale.
Omathimbo gamwe, Paulus muukalele okwa li ha tsakaneke mo aantu mboka ya kukutila momalongo giifundja. Okwi inyenge ngiini? Otatu lesha mIilonga 17:16 kutya sho e li muAtena, “okwa li u uvite nayi, sho a dhimbulula, nkene oshilando shu udha iikalunga.” Onkee ano, okwa li a gandja uunzapo uuwanawa, ta popi iikalunga mbyoka ye mu uvitha nayi. (Iil. 17:22, 23) Okwa li a longitha omikalo dha yoolokathana a uvithile aantu yomihoko dhi ili nodhi ili, ‘opo a hupithe yamwe yomuyo komukalo kehe tagu vulika.’ — 1 Kor. 9:20-23.
Uuna tatu uvithile mboka taye tu ngwenyagula nenge yi itaala momalongo giifundja, otatu vulu okuholela Paulus moku ya uvithila “onkundana ombwanawa.” (Jes. 52:7) Omumwameme Dorothy okwa ti: “Aantu oyendji moshitopolwa shetu, oya longwa kutya Kalunga omukwanyanya noha pangula aantu. Ohandi ya pandula sho yi itaala lela muKalunga, opo nduno tandi ya ulukile kutya Ombiimbeli otayi ti ngiini kombinga yomaukwatya gaJehova gopahole nomauvaneko ge kombinga yonakuyiwa.”
“SINDENI UUWINAYI NUUWANAWA”
Sho ‘omasiku gahugunina’ taga ende taga hedha ko, otwa tegelela iikala yaantu yamwe mboka tatu uvithile yi ze “muuwanawa yu uka muuwinayi.” (2 Tim. 3:1, 13) Ihe inatu etha nando shoka shi tu ethithe po olukeno nenyanyu lyetu. Jehova ota vulu oku tu pa oonkondo tu ‘sinde uuwinayi nuuwanawa.’ (Rom. 12:21) Omukokolindjila gwedhina Jessica, okwa ti: “Olundji ohandi tsakaneke aantu mboka kaaye shi aaifupipiki naamboka inaaye tu simaneka nosho wo etumwalaka ndyoka hatu uvitha. Shika otashi vulu okuuvitha nayi omuntu. Uuna nda tameke oonkundathana, ohandi galikana momutima, opo ndi tale ko omuntu ngoka ngaashi Jehova e mu tala ko. Ohashi kwathele ndje ndi dhiladhile nkene ndi na oku mu kwathela, pehala lyokugandja eitulomo kunkene ndi uvite.”
Ohatu tsikile okukonga mboka ya halelela oku ka mona omwenyo gwaaluhe
Aantu yamwe ohaye tu pulakene, omolweidhidhimiko lyetu, sho tatu ya kwathele pambepo
Otwa pumbwa wo okutala nkene tu na okuladhipika aamwatate naamwameme. Jessica okwa ti: “Uuna gumwe gwomutse a ningwa nayi muukalele, ihandi kala tandi shi shokonona. Pehala lyaashono, ohandi popi iinima mbyoka tayi tungu ngaashi shoka twa pondola po muukalele, nonando yamwe inaye tu pulakena.”
Jehova oku shi lela omashongo ngoka hatu tsakaneke muukalele. Onkene oha kala a nyanyukwa, ngele tatu holele ohenda ye. (Luk. 6:36) Odhoshili kutya Jehova ite ki idhidhimikila aakolokoshi sigololo. Natu kale neinekelo kutya oku shi nawa ethimbo ndyoka tali opalele, a hulithe po uuyuni mbuka. Sho twe li tegelela, natu uvitheni neendelelo. (2 Tim. 4:2) Onkee ano, natu tsikileni okuuvithila “aantu ayehe” nuulaadhi noku ya kenukila.