Edhina lyaKalunga olye?

Uuna wa hala okutseya gumwe, oshinima shotango ho ningi, oho mu pula to ti: “Ongoye lye?” Ngele ando owu pule Kalunga epulo ndyoka, ando ota ka tya oye lye?

‘Edhina lyandje oJehova.’ — Eksodus 15:3, OB-1954.

Mbela edhina ndyoka owe li uva nale? Otashi vulika inoo li uva, oshoka momatoloko ogendji gOombiimbeli edhina lyaKalunga olya pumba mo nenge kaali mo nandonando. Olundji ohali pingenwa po nedhinasimaneko “OMUWA.” Ihe mOmanyolo gopetameko gOmbiimbeli edhina lyaKalunga olya holoka mo konyala lwiikando 7 000. Edhina lyaKalunga ohali nyolwa nuugwedhwa wOshihebeli une, YHWH nenge JHVH nomOshindonga ohali tumbulwa taku ti “Jehova.”

Edhina lyaKalunga lya nyolwa mOshihebeli mondhingambo yomEfuta lya Sa — Ondhingambo yOmapisalomi yomEfuta lya Sa MOSHIHEBELI, okuza mo 30 sigo 50

Edhina lyaKalunga lya nyolwa mOshiingilisa mOmbiimbeli ndjoka ya tolokwa kuTyndale — Ombiimbeli ndjoka ya tolokwa kuTyndale MOSHIINGILISA, mo 1530

Edhina lyaKalunga lya nyolwa mOshispania metoloko lyOmbiimbeli lyaReina-Valera — Etoloko lyaReina-Valera MOSHISPANIA, mo 1602

Edhina lyaKalunga lya nyolwa mOshichiina metoloko lyOmbiimbeli yedhina Union — Etoloko lyOmbiimbeli yedhina Union MOSHICHIINA, mo 1919

Edhina lyaKalunga olya holoka momanyolo gOshihebeli nomomatoloko ogendji

OMOLWASHIKE EDHINA LYAKALUNGA LYA SIMANA?

Edhina lye olya simana kuye. Okwe li iluka ye mwene. Jehova ota ti: “Ndika olyo edhina lyandje sigo aluhe. Osho tandi ka tumbulwa komaluvalo nomaluvalo.” (Eksodus 3:15) MOmbiimbeli edhina lye, Jehova, olya holoka mo iikando oyindji li vulithe pomadhinasimaneko ge, ngaashi Omunankondoawike, Tate, Omuwa nenge Kalunga. Olya holoka mo wo iikando oyindji li vulithe pomadhina gaantu yamwe, ngaashi Abraham, Moses, David nenge Jesus. Jehova okwa hala wo aantu ya tseye edhina lye. Ombiimbeli otayi ti: “Naye ku tseye kutya ongoye awike [“Jehova,” NW] Omupangeliawike kombanda yevi alihe.” — Episalomi 83:18.

Edhina lye olya simana kuJesus. Megalikano ndyoka hali ithanwa Tate Yetu nenge Egalikano lyOmuwa, Jesus okwa longo aalanduli ye ya galikane taya ti: “Edhina lyoye nali yapulwe.” (Mateus 6:9) Jesus naye okwa li a galikana kuKalunga a ti: “Tate, simanekitha edhina lyoye.” (Johannes 12:28) Jesus okwa li a pititha komeho okusimanekitha edhina lyaKalunga monkalamwenyo ye, nomolwaashono a popi megalikano a ti: “Ngame onde ya tseyithile edhina lyoye notandi ka tsikila oku shi ninga.” — Johannes 17:26.

Edhina lye olya simana kumboka ye mu shi. Aapiya yaKalunga yonale oya li ye shi kutya otaya vulu okugamenwa nokuhupithwa okupitila medhina lyaKalunga ndyoka lyi ikalekelwa. Ombiimbeli otayi ti: “Edhina [“lyaJehova,” NW] olyo oshungo ya kola; omuyuuki ota matukile mo e ta gamenwa.” (Omayeletumbulo 18:10) Otayi ti wo kutya “ayehe mboka taa indile ekwatho [“kuJehova,” NW] otaa hupithwa.” (Joel 2:32) Ombiimbeli otayi ti kutya edhina lyaKalunga otali ka yoolola mo mboka haye mu longele. Otayi ti: “Oshigwana kehe otashi simaneke nokuvulika kuKalunga kasho shene, ihe tse otatu ka longela nokuvulika [“kuJehova,” NW] Kalunga ketu aluhe sigo aluhe.” — Mika 4:5; Iilonga 15:14, yelekanitha NW.

EDHINA LYAKALUNGA OTALI HOLOLA SHIKE?

Edhina lye otali ulike kutya okwi ikalekelwa. Aalongwantu oyendji oya thika pehulithodhiladhilo kutya edhina Jehova otali ti “Oha ningitha.” Jehova okwa yelitha kutya edhina lye otali ti ngiini sho a lombwele Moses ta ti: “Ngame nda kala ngu NGAME-NDA-KALA.” (Eksodus 3:14) Edhina lyaKalunga itali tu lombwele owala kutya oye Omushiti gwiinima ayihe. Ihe otali ulike kutya oha hogolola okukala kehe shoka a hala, opo a gwanithe po elalakano lye. Oha vulu wo okulongitha iishitwa ye yi ninge kehe shoka sha pumbiwa, opo ehalo lye li gwanithwe. Omadhinasimaneko gaKalunga otaga ulike kutya oku li pondondo yini, oku na oonkondopangelo nenge oonkondo dhi thike peni. Ihe edhina lye, Jehova, olyo owala tali ulike kutya oku li ngiini noshike ta vulu okuninga.

Edhina lyaKalunga otali ulike kutya oku na ko nasha natse. Eityo lyedhina lye otali ulike kutya oku hole iinima ayihe mbyoka a shita, natse twa kwatelwa mo. Sho e tu tseyithile edhina lye, otashi ulike kutya okwa hala tu mu tseye. Okwe li tu lombwele nomanga nokuli inaatu ipula kombinga yalyo. Osha yela kutya Kalunga okwa hala tu mu tale ko e li Omuntu gwolela, ngoka tatu vulu okuhedha popepi naye. Ina hala tu dhiladhile kutya ye ombepo noku li kokule natse nosho wo kutya itatu vulu okuhedha popepi naye. — Episalomi 73:28.

Ngele otatu longitha edhina lyaKalunga otatu ulike kutya otwa hala okuninga ookuume ke. Pashiholelwa, ngele owa hala gumwe a ninge kuume koye otashi vulika wu mu lombwele a kale he ku ithana kedhina. Oto ka kala wu uvite ngiini ngele okwa kala ihee ku ithana kedhina? Mokweendela ko kwethimbo otashi vulika wu kale wu uvite kutya ina hala okuninga kuume koye. NaKalunga osho ha kala u uvite ngawo. Okwe tu lombwela edhina lye note tu ladhipike tu li longithe. Ngele otwe shi ningi, otatu ku ulika kutya otwa hala okuhedha popepi naye. Nokuli naamboka ‘haya simaneke’ edhina lye nohaye li dhimbulukwa oku ya wete. — Maleaki 3:16.

Onkatu yotango ya simanenena, opo tu tseye Kalunga, oyo okutseya edhina lye. Ihe halyo owala tu na okutseya. Otwa pumbwa wo okutseya kutya okwa tya ngiini.

EDHINA LYAKALUNGA OLYE? Edhina lyaKalunga oJehova. Edhina ndyoka otali holola kutya okwi ikalekelwa nokuli Omuntu ngoka ha vulu okugwanitha po elalakano lye

KALUNGA OKWA SHITWA KULYE?

Aantu oyendji oya kala nokwiipula epulo ndyoka. Nangoye otashi vulika we li ipula. Epulo ndyoka otatu vulu ishewe oku li pula ngeyi: Ngele kehe shimwe meshito osha shitwa, mbela Kalunga ye okwa shitwa kulye?

Aanongononi oyendji oya zimina kutya iinima ayihe meshito oyi na etameko. Ombiimbeli nayo otayi tsu kumwe naanongononi mboka, oshoka otayi ti: “Petameko Kalunga okwa shiti egulu nevi.” — Genesis 1:1.

Oonyothi adhihe noopulanete adhihe inayi ya po owala kuyo yene. Opo oshinima shi ye po, opu na okukala ngoka e shi eta po. Ando opwa li kaapu na omushiti, ando iinima ayihe mbyoka ye tu kundukidha, natse twa kwatelwa mo, inayi ya po. Ano osha yela kutya, omushiti oko e li. Edhina lye oJehova noku li omuntu gwopambepo e na oonkondo dha shiga ko. — Johannes 4:24.

Ombiimbeli otayi popi Kalunga tayi ti: “Manga inoo shita oondundu nomanga inoo holola po uuyuni, ngoye Kalunga kaaluhe oko wa li noto ka kala aluhe sigo aluhe.” (Episalomi 90:2) Shika otashi ulike kutya Kalunga oko aluhe a kala ‘nopetameko’ okwa li a shiti iinima ayihe meshito. — Ehololo 4:11.