IITOPOLWA YI IKOLELELA KOSHIPALANYOLO SHOKOMBANDA | OTO VULU OKUHEDHA POPEPI NAKALUNGA
Mbela owu shi ngaa edhina lyaKalunga noho li longitha?
Mbela opu na kuume koye gumwe ngoka kuu shi edhina lye? Otashi vulika ahawe. Irina omukiintu gumwe Omubulgaria okwa popi kutya, “itashi wapa wu hedhe popepi naKalunga ngele ku shi edhina lye.” Elago enene, ngaashi sha popiwa moshitopolwa sha tetekele, Kalunga okwa hala wu hedhe popepi naye. Onkee ano, okupitila mOmbiimbeli okwe ku lombwele kutya oye lye sho a ti: “Ongame Jehova. Ndyoka olyo edhina lyandje.”— Jesaja 42:8, NW.
Okupitila mOmbiimbeli, Kalunga okwe ku lombwela kutya oye lye sho a ti: “Ongame Jehova. Ndyoka olyo edhina lyandje.”— Jesaja 42:8,
Mbela oshi na ngaa oshilonga kuJehova ngele owu shi edhina lye noho li longitha nenge hasho? Dhiladhila kwaashika: Edhina lyaKalunga, lya nyolwa nuugwedhwa wOshihebeli une wa tseyika nawa o-Tetragrammaton, oli li miinyolwa yotango yOmanyolo gOshihebeli lwiikando yi vulithe po-7 000. Edhina ndyoka olya tumbulwa mo lwiikando oyindji mOmbiimbeli li vule omadhina galwe. Osha yela kutya shika oshi li uunzapo kutya Jehova okwa hala tu tseye edhina lye noku li longitha.a
Olundji uukuume ohawu tameke naantu yaali taya tseyathana komadhina. Owu shi ngaa edhina lyaKalunga?
Nonando ongawo, otashi vulika yamwe ya kale yu uvite kutya molwaashoka Kalunga omuyapuki nomunankondoadhihe, itashi ka ulika esimaneko okulongitha edhina lye. Eeno shili, otashi ka kala sha puka okulongitha edhina lyaKalunga miinima yowala, ngaashi owala itoo ka longitha nayi edhina lyakuume koye kopothingo. Ihe Jehova okwa hala mboka ye mu hole ya simaneke edhina lye noye li tseyithile yalwe. (Episalomi 69:30, 31; 96:2, 8) Dhimbulukwa kutya Jesus okwa li a longo aalanduli ye ya galikane taya ti: “Tate yetu, ngu u li megulu: Edhina lyoye nali yapulwe.” Otatu vulu okukala tu na ombinga mokuyapulitha edhina lyaKalunga moku li tseyithila yalwe. Okuninga ngaaka ohaku tu hedhitha popepyeelela naye.— Mateus 6:9.
Ombiimbeli otayi tu ulukile kutya Kalunga oha gandja eitulomo li ikalekelwa ‘kwaamboka haya simaneke edhina lye.’ (Maleaki 3:16, OB-1954) Jehova oku uvanekela omuntu ngoka a ti: “Oshoka oye a dhama ndje, onkee nda hala oku mu hupitha nonda hala oku mu gamena, oshoka edhina lyandje e li shi. Oye ti ithana ndje, ongame notandi mu zimine, ondi li puye nomuudhigu.” (Episalomi 91:14, 15, OB-1954) Okutseya edhina lyaJehova noku li longitha oku na oshilonga ngele otwa hala okukala tu na ekwatathano lyopothingo naye.
a Shinikitha oluhodhi, omatoloko ogendji gOombiimbeli inaga kwatela mo edhina lyaKalunga, nonando oli li mo lwiikando oyindji mOmanyolo gOshihebeli, ngoka ga tseyika nawa Etestamendi Ekulu. Pehala lyaashono, oga pingene po edhina lyaKalunga nomadhinasimaneko ngaashi “Omuwa” nenge “Kalunga.” Opo wu mone uuyelele wa gwedhwa po kombinga yoshikundathanwa shika, tala pepandja 195-197 lyembo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova.