Mbela Kalunga oku na edhina?
Shoka oyendji haya ti:
▪ “Edhina lye oKalunga.”
▪ “Kalunga ke na edhina lyopaumwene.”
Jesus okwa ti ngiini?
▪ “One omu na okugalikana ngeyi: ‘Tate yetu, ngu u li megulu: Edhina lyoye nali yapulwe.’” (Mateus 6:9) Jesus okwi itaala kutya Kalunga oku na edhina.
▪ “Ongame onde ya tseyithile edhina lyoye notandi ka tsikila oku shi ninga, opo ohole ndjoka u hole ndje nayo yi kale muyo, nangame ndi kale muyo.” (Johannes 17:26) Jesus okwa li a tseyitha edhina lyaKalunga.
▪ “Itamu mono ndje we sigo ethimbo ndyoka, uuna tamu ka tya: ‘Na lalekwe nuuyamba oonguka te ya medhina lyOmuwa!’ ” (Lukas 13:35; Episalomi 118:26) Jesus okwa li a tsu omuthindo kutya Kalunga oku na edhina.
OMBIIMBELI otayi tu lombwele kutya edhina lyaKalunga olini. Otayi ti: “Jehova ofule; edhina lye Jehova.”a (Eksodus 15:3, OB-1954) Jehova olyo edhina ndyoka Kalunga i iluka mwene melaka lyOshihebeli. Otashi vulika wu ka kale wa kumwa okutseya kutya edhina ndika lye awike lyOshihebeli otali holoka lwomayuvi ogendji mOmanyolo gopetameko gOmbiimbeli. MOmbiimbeli otali holoka mo lwiikando oyindji shi vulithe edhina kehe lya tumbulwa mo.
Yamwe ngele ya pulwa kutya “edhina lyaKalunga olye?” ohaya ti owala “oKalunga.” Ngele owa pulwa kutya “olye a sindana momahogololo”? e to yamukula kutya “omuulikwahogololwa,” nena ino gandja uuyelele washa. Natango ino gandja eyamukulo lya yela, molwaashoka “Kalunga” nosho wo “omuulikwahogololwa” kage shi omadhina.
Omolwashike Kalunga e tu lombwele edhina lye? Okwe shi ningi opo tu mu tseye nawa. Oku shi thaneka omuntu otashi vulika i ithanwe Omusimanekwa, Omuhona, Tate nenge Tatekulu. Omadhinasimaneko ngaka otaga holola sha kombinga ye. Ihe edhina lyomuntu ohali tu dhimbulukitha shoka tu shi kombinga ye. Sha faathana omadhinasimaneko ngaashi Kalunga, Omunankondoadhihe, Tate nOmushiti otage tu dhimbulukitha iinima ya yoolokathana mbyoka Kalunga a ninga. Ihe edhina lye Jehova olyo owala tali tu dhimbulukitha ashihe shoka tu shi kombinga ye. Kalunga oto mu tseya lela ngiini ngele ku shi edhina lye?
Osha simana oku li tseya noku li longitha wo. Omolwashike mbela? Omolwaashoka Ombiimbeli otayi tu lombwele tayi ti: “Kehe ngoka ti ithana edhina lyOmuwa, ota hupithwa.”—Aaroma 10:13; Joel 2:32.
[Enyolo lyopevi]
a Opo wu yelelwe nawa kombinga yeityo lyedhina lyaKalunga nokumona kutya omolwashike kaali mo mOombiimbeli dhimwe, oshi li nawa okutala epandja 195-197 membo Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.
[Oohapu dha simana pepandja 6]
Omuntu otashi vulika i ithanwe Omusimanekwa, Omuhona, Tate nenge Kuku. Ihe edhina lye olyo owala tali tu dhimbulukitha ashihe shoka tu shi kombinga ye