Elongekidho lyetu lya pupalekwa lyokutaandeleka iileshomwa
1 MuOktoba naNovomba 1999, osha li sha yelithwa kutya okuza mu 1 Januali 2000, elongekidho lya pupalekwa lyokutaandeleka iileshomwa otali ka kala tali longithwa miitayimbelewa ayihe muuyuni auhe, mwa kwatelwa oshitayimbelewa shaSouth Africa. Shika otashi ti kutya iifo nomambo ayihe otayi ka pewa aauvithi naantu mboka ye na ohokwe itaapu pulwa sha. Itatu ka popya we kondandalunde kutya eyambidhidho oli thike peni. Uuna aantu mboka ye na ohokwe taya taamba ko iileshomwa, otatu ke ya yelithila kutya iilonga yetu yomuuyuni auhe ohayi yambidhidhwa komayambidhidho gehalo ewanawa, nongele yo wo oya hala oku shi ninga, otaya vulu wo okugandja omayambidhidho. Iileshomwa otatu ke yi thigila aantu mboka ye na ohokwe kutya nduno oya gandja omayamdidhidho nenge hasho.
2 Ihe nonando ongaaka, kashi shi oshinakugwanithwa shetu nosho wo inatu hala okugandja pwaahe na ondjoolola oshileshomwa komuntu kehe ngoka te ke shi taamba. Ngaashi naanaa hatu longitha noondunge iinima yetu yene yopamaliko, omuuvithi kehe oku na oshinakugwanithwa okulongitha noondunge iileshomwa mbyoka ta mono inaa pulwa sha okuza kEhangano okupitila megongalo lyopuyo. Sho Ehangano tali gandja iileshomwa kaauvithi kaapu na okupula sha, muushili wo wene, itashi ti kutya okunyanyangidhwa kwayo nosho wo okutaandelekwa kwayo ihaku kotha sha. Ayehe oye na okupandula uungushu wiileshomwa yetu mokukwathela aantu mboka ye na omutima gu uka mokukonga kwawo ontseyo yashili yi na ko nasha naJehova Kalunga nosho wo Omwana Jesus Kristus. — Joh. 17:3, NW.
3 Ongiini mbela Ehangano tali vulu okugandja iileshomwa yalyo kwaayehe kaapu na okupula sha? Ondando kaayi shi okuyandwa ndjoka hayi kotha okunyanyangidhwa kwayo nosho wo okutaandelekwa kwayo ohayi silwa oshimpwiyu komayambidhidho gehalo ewanawa. Aapiya yaJehova yi igandja oyo onzo onene yeyambidhidho ndika. Oonzapo dhaJehova inadhi tegelela aantu mboka kaaye shi Oonzapo oyo ya yambidhidhe iilonga mbika yeuvitho lyUukwaniilwa ye endelela noonkondo. Inatu kala nando onale tu na ombinga mokugongela iimaliwa maantu, nokatu yi na ngashingeyi. Ihe omayambidho omashona okuza kaantu mboka ye na shili ohokwe noye na olupandu mboka tatu tsakaneke momapya otaga pandulwa.
4 Elundululo ndika momukalo gwokulonga kwetu otali gandja natango uunzapo kutya ‘katu shi aahalithi yoohapu dhaKalunga.’ (2 Kor. 2:17) Otashi ulike wo kutya tse otwa yooloka ko kuuyuni. — Joh. 17:14.
5 Sho ehanagulo lyaBabilon Oshinene tali hedha popepi, opu na omathiminiko taga koko okuthininika oongundu adhihe dhopalongelokalunga. Oshimpwiyu shetu oshinene osho kutya iilonga ya simanenena yeuvitho lyUukwaniilwa muuyuni auhe yi tsikile nokuhuma komeho kaapu na iiyimbi, opo oyendji noonkondo ya vule okuhupithwa. — Mat. 24:14; Rom. 10:13, 14.