Oshimpungu shepulo

◼ Oshike hashi ulike kutya omuntu okwa gwana okupewa oshileshomwa?

Opo tu gandje oshileshomwa komuntu, oku na okukala tu ulike ohokwe shili. Otatu vulu oku mu pa iifo iyali, okabroshure, embo nenge oshileshomwa shilwe. Shika otatu vulu oku shi ninga nonando omuntu ke na oshimaliwa nenge e na owala oshimaliwa oshishona. (Job 34:19; Eh. 22:17) Ihe nonando ongaaka, itatu ka gandja iileshomwa yetu kwaamboka itaaya ulike ohokwe. — Mat. 7:6.

Omunegumbo ohu ulike ngiini ohokwe? Ongele e na ehalo lyokukundathana natse. Okukala a pulakena sho tatu popi, ta yamukula omapulo, nokupopya shoka u uvite ohashi ulike kutya okwiitula mo moonkundathana. Oha kala wo a landula sho tatu lesha Oohapu dhaKalunga naashoka ohashi ulike kutya okwe dhi simaneka. Olundji, ohashi kala shi li nawa wu mu pule ngele oshileshomwa shoka to mu pe ote ke shi lesha ngaa. Aauvithi oye na okulongitha oondunge dhawo dhokuyoolola opo ya tale ngele omuntu oku na ngaa ohokwe shili. Pashiholelwa, uuna taya gandja uunzapo mepandaanda, kashi li nawa okuhaaleka iifo, uubroshure nenge omambo kukehe gumwe. Ngele katu shi shi nawa kutya omuntu oku na ohokwe shili, otatu vulu oku mu pa okambapila kokuhiya aantu kokugongala nenge okatraktate.

Sha faathana, iifo mbyoka omuviithi ha mono oyi na okukala yi thike pwaambyoka omuuvithi a pumbwa opo a vule okugwanitha po uukalele we, ihe kayi na okukala yi ikolelela komayambidhidho ngoka ta gandja. Omayambidhidho kage shi gokufuta iileshomwa, ihe ogokwaambidhidha iilonga ayihe yokuuvitha muuyuni auhe. Kashi na nduno mbudhi kutya ohatu kwata oshimaliwa shi thike peni, ngele otu na olupandu otatu ka ambidhidha iilonga yUukwaniilwa nehalo ewanawa shi thike pwaashoka tatu vulu. (Mark. 12:41-44; 2 Kor. 9:7) Shika otashi ke tu inyengitha wo tu kuthe owala iileshomwa mbyoka twa pumbwa opo kaatu hepeke omayambidhidho ngoka ga longithwa mokunyanyangidha iileshomwa.

[Oohapu dha simana pepandja 2]

Aauvithi oye na okulongitha oondunge dhokuyoolola opo ya tale ngele omuntu oku na ngaa ohokwe shili