Oshike tashi vulu oku tu kwathela tu kale twa thikama twa kola meitaalo?
1 Okuza sho twa tameke okweendathana nehangano lyaJehova, ehumokomeho lyetu lyopambepo olya kala onzo yenyanyu kutse! Ihe opo tu kale twa ‘tsama notwi itungila muye notwi ikolelela meitaalo’ otwa pumbwa okutsikila okukoka kwopambepo hoka kwa pumbiwa. (Kol. 2:6, 7) Nonando oyendji oya hepuluka pambepo, yalwe oya falwafalwa molwokunyengwa okukala ya “kolelela meitaalo.” (1 Kor. 16:13) Otatu vulu okukelela shika kaashi tu ningilwe. Ngiini?
2 Eipyakidhilo lyaaluhe lyopambepo: Kala u na elandulathano ewanawa lyopambepo mehangano lyaJehova. Muka oompumbwe dhetu dhopambepo otadhi silwa oshimpwiyu sha gwana. Okugongala kwegongalo niigongi yopashikandjo nosho wo yoshitopolwa ohayi tu ladhipikile ekoko enene lyopambepo nosho wo okwiikolelela, ihe opo tu vule okwiimonena uuwanawa, otu na okukala po aluhe. (Heb. 10:24, 25) Elandulathano lyokulesha pwaahe na okufaula Ombimbeli, iifo yOshungonangelo noAwake!, nosho wo omambo ngoka taga kundathana iikulya ya kola yOohapu dhaKalunga otali ka tsamitha omidhi dhuupambepo wetu dha ya muule nodhi kale dha kola. (Heb. 5:14) Okutula po omalalakano gopaumwene gopambepo nosho wo okulonga nuudhiginini shi na ko nasha nago otashi eta wo omauwanawa taga kalelele.—Fil. 3:16.
3 Ekwatho okuza kwaamboka ya pyokoka: Lalakanena okumbwalangandjeka eendathano lyoye naamboka ya pyokoka megongalo. Tseya aakuluntugongalo, oshoka yo oyo unene tuu aantu mboka taya vulu oku ku koleka. (1 Tes. 2:11, 12) Taamba ko omayele kehe nenge omaetopo kehe ngoka tashi vulika taye ku pe. (Ef. 4:11-16) Aayakuligongalo nayo wo oye na ohokwe okukwathela yalwe ya kale ya kola meitaalo, onkee ano konga eladhipiko kaamwatate mbaka.
4 Owa pumbwa mbela ekwatho miilonga yomomapya? Popya naakuluntugongalo e to ya pula ekwatho. Pamwe oto vulu okukwatelwa moprograma Aakokolindjila Taya Kwathele Yalwe. Opo mbela wa ninginithwa? Okukonakona embo Our Ministry nokulongitha shoka shi li mo otaku ka humitha komeho epyokoko lyoye lyopambepo. Ou li mbela omuvali? Tsikila okukoleka uupambepo waanona yoye.—Ef. 6:4.
5 Mokukala twa tsama notwi ikolelela meitaalo, otatu nyanyukilwa ekwatathano lyopothingo naJehova nosho wo eendathano lyopahole naamwatate. Shika otashi tu kwatha tu kondjithe Satana nokukoleka etegameno lyetu lyonakuyiwa yaaluhe.—1 Pet. 5:9, 10.