Ethininiko lyoomakula nuuthemba woye wokuuvitha
1 Ethininiko lyoomakula oli li enwethomo li na oonkondo — tali tu nwetha mo nawa nenge nayi. Aapiya ooyakwetu yaJehova ohaya lalakanene enwethomo ndyoka tali tu ladhipikile iilonga iiwanawa yopaKriste. (Heb. 10:24) Ihe iilyo yuukwanegumbo mbyoka kaayi shi Oonzapo, aaniilonga yakwetu, aanasikola yakwetu, aashiinda, nenge aashiwikile yalwe otaya vulu oku tu thininika tu landule ondjila ndjoka tayi kondjithathana nomakotampango gopaKriste. Otashi vulika ya popye taya ‘sheke omikalo dhetu omiwanawa dhomuKristus.’ (1 Pet. 3:16) Ongiini mbela tatu vulu okudhiginina etokolotoko lyetu okukala tatu uvitha nonando pu na ethininiko ewinayi lyoomakula ndyoka tashi vulika tatu tsakaneke?
2 Iilyo yuukwanegumbo: Omathimbo gamwe, omusamane e li tate ngoka kee shi gumwe gwomOonzapo dhaJehova otashi vulika inaa hala omukulukadhi gwe naanona ye ya kuthe ombinga miilonga yomomapya yomontaneho. Shika osho sha li ngeyi muukwanegumbo umwe muMeksiko. Omukulukadhi gwomusamane nguka naanona yaheyali oye ya moshili. Tango okwe ya pataneke molwashoka inaa hala uukwanegumbo we wu uvithe egumbo negumbo nou gandje iileshomwa yOmbimbeli. Okwa li a dhiladhila kutya oshi li esithohoni kuyo okulonga iilonga mbika. Ihe omukulukadhi gwe naanona ye oya kala ya dhiginina etokolotoko lyawo okulongela Jehova nokukala ye na ombinga ihaayi faula muukalele. Konima yethimbo, omusamane okwa tameke okumona ongushu yokutaamba ko elongekidho lyaKalunga lyiilonga yokuuvitha, opo nduno naye wo okwi igandjele Jehova. Oshe mu pula oomvula 15 okutaamba ko oshili, ihe mbela ando okwe yi mono ngaa ando uukwanegumbo we kawa dhigininine uuthembahenda wawo wokuuvitha?—Luk. 1:74; 1 Kor. 7:16.
3 Aaniilonga yakwetu: Oonkambadhala dhoye okugandja uunzapo kaaniilonga yakweni otashi vulika ihaadhi taambwa ko nawa kuyalwe. Omumwameme gumwe okwa hokolola kutya sho oonkundathana kombinga yehulilo lyuuyuni dha penduthwa mombelewa, okwa li a shekwa molwashoka a ti kutya naya leshe Mateus ontopolwa 24. Ihe konima yomasiku omashona, gumwe gwomaaniilonga yakwawo okwe mu lombwele kutya ye okwa lesha ontopolwa ndjoka nokwa li a kumwa. Okwa li e mu pe oshileshomwa, nokwa ningi omalongekidho gokuninga ekonakonombimbeli naye nosho wo omusamane gwe. Ekonakono lyotango olya ningwa sigo opombali yuusiku. Konima yekonakono etitatu, oya tameke okukala pokugongala, na nziya konima yaashono oye etha po okuhila omakaya noya tameke okukutha ombinga miilonga yomomapya. Shika mbela ando osha ningwa ngaa ando omumwameme ka ningile oonkambadhala okutseyithila yalwe etegameno lye?
4 Aanasikola ooyakweni: Kashi li oshinima sha pumba maagundjuka Oonzapo okuthininikwa koomakula kosikola e taya kala ya tila kutya pamwe aagundjuka yalwe otaye ke ya dhina molwokukutha ombinga kwawo miilonga yokuuvitha. Omugundjuka gumwe Omukriste gwoomvula omulongo nasha mIilongohangano okwa ti: “Onda li nda tila okugandja uunzapo kaagundjuka yalwe molwashoka onda li nda tila okuyolwa.” Onkee ano okwa yanda oompito dhokugandja uunzapo koomakula kosikola nomoshitopolwa. Ongiini mbela to vulu okumona oonkondo dhokukondjitha omathininiko goomakula? Inekela Jehova e to lalakanene okuhokiwa kuye. (Omayel. 29:25) Kala wu uvitile uunambano uunkulungu woye wokulongitha Oohapu dhaKalunga muukalele woye. (2 Tim. 2:15) Omugundjuka ngoka opo twa popi okwa tameke okugalikana Jehova, te mu pula e mu kwathele a kale e na ehalo lyokupopya naanasikola ooyakwawo. Okwa tameke okugandja uunzapo inau longekidhwa kosikola, osha zi iizemo iiwanawa nonziya okwa kala ha popi nakehe gumwe ngoka e shi. Okwa hulitha ta ti: “Aanona mboka oya pumbwa noya hala etegameno lyonakuyiwa, na Jehova ote tu longitha oku ya kwatha.”
5 Aashiinda: Otashi vulika tu na aashiinda nenge aashiwikile yalwe mboka haya kala kaaye tu uvitile ombili molwaashoka tu li Oonzapo nomolwaashono twi itaala. Ngele owa tila shoka taya dhiladhila, ipula: ‘Oye shi mbela oshili ndjoka tayi fala komwenyo gwaaluhe? Oshike mbela tandi vulu okuninga opo ndi adhe omitima dhawo?’ Omutonateli gwoshikandjo gumwe okwa tile kutya iizemo iiwanawa ohayi monika ngele uunzapo tau gandjwa kaashiinda kashona nakashona. Pula Jehova oonkondo dha pumbiwa nuunongo okutsikila okukonga mboka ye na omitima dhu uka.—Fil. 4:13.
6 Ngele tatu igandja kethininiko lyoomakula ewinayi otatu vulu okunyanyudha aapataneki yetu, ihe oku shi ninga oyo tashi ka kwathela mbela — nenge otse tashi kwathele? Jesus okwa li a patanekwa kaantu momudhingoloko gwawo. Okwa li i idhidhimikile nokuli oohapu oombwinayi dhaamwahe. Ihe okwa li a tseya kutya ota vulu oku ya kwatha owala ngele ta kala mondjila yoshili ndjoka Kalunga e mu tulila po. Onkee ano Jesus okwi “idhidhimikile ondumbo yi thike mpaka yaalunde.” (Heb. 12:2, 3) Otu na okuninga sha faathana. Kala wa tokola toko okulongitha nawa ngaashi to vulu uuthembahenda woye wokuuvitha etumwalaka lyUukwaniilwa. Moku shi ninga, “oto ihupitha naamboka taye ku pulakene.” — 1 Tim. 4:16.