Hapupalifa ehafo loye mokuudifa
1 Mbela oto hafele tuu ehafo lokutukula onghundana iwa navamwe moukalele woye? Ngeenge inatu lungama, ounyuni wa nyonauka oo we tu dingilila otau dulu oku tu tilifa shi na sha nokuudifa noku tu kanififa ehafo letu. Okulonga moitukulwa omo ovanhu ihave linyenge otaku dulu yo oku tu teya omukumo. Eenghatu tadi longo dilipi hatu dulu okukufa tu hapupalife ehafo letu mokuudifa?
2 Kala u na omukumo: Okukala noikala iwa otashi kwafa shili. Onghedi imwe yoku shi ninga oyo okudilonga koufembanghenda wetu muwa unene wokukala “ovalongi pamwe naKalunga.” (1 Kor. 3:9) Jesus naye oku li nafye mokulonga oshilonga eshi. (Mat. 28:20) Note tu yambidida nomatanga ovakwaita ovaengeli. (Mat. 13:41, 49) Onghee hano, ohatu dulu okukala noushili kutya eenghendabala detu otadi wilikwa kuKalunga. (Eh. 14:6, 7) Onghee hano, kutya nee vamwe otave linyenge ngahelipi koilonga yetu, meulu omu na ehafo linene!
3 Lilongekida nawa: Elilongekido liwa nalo otali yambidida ehafo letu. Okulilongekidila oukalele inaku pumbwa okukwatela mo oilonga ihapu. Ohaku kufa ashike ominute dinini okudiladila oshitwa shoku ka popya tashi di moifo oyo opo ya piti ile moshileshomwa osho tashi yandjwa omwedi oo. Hoolola etwalemo mokatukulwa “Osho u na okutya shi na sha noifo,” mUukalele Wetu wUukwaniilwa. Tala okawedwapo kaJanuali 2002, “Omaetepo aasho to ka popya moilonga yomomapya” ile u tale membo Reasoning omolwomatwalemo e na oidjemo iwa. Ngeenge oto imbwa koshinima shonhumba osho ovaneumbo hava pula unene, lilongekida enyamukulo olo tali ulike kutya owa dimina eetepo lavo opo nee yukifa elitulemo lavo koshinima osho tashi pendula ohokwe. Embo Reasoning otali kwafa unene moku shi ninga. Okulongifa oikwafifo ei otaku ke tu pa elineekelo olo twa pumbwa opo tu udife nehafo.
4 Ilikana wa mana mo: Eilikano ola fimanenena opo tu kale nehafo tali kalelele. Molwaashi ohatu longo oilonga yaJehova, otwa pumbwa oku mu indila omolwomhepo yaye, shimwe shomoiimati yayo osho ehafo. (Gal. 5:22) Jehova ote ke tu pa eenghono tu twikile okuudifa. (Fil. 4:13) Okwiilikana kombinga youkalele wetu otaku dulu oku tu kwafela tu kale netaleko la yuka ngeenge tu na oimoniwa ihe fi ihafifa. (Oil. 13:52; 1 Pet. 4:13, 14) Ngeenge otu udite twa tila, eilikano otali dulu oku tu kwafela tu twikile nouladi nosho yo nehafo.—Oil. 4:31.
5 Tula po eemhito: Doshili, oukalele wetu otau kala u na ehafo linene ngeenge hatu dulu okuhanga ovanhu noku va pa oundombwedi. Okulundulula elandulafano loye lokulonga eumbo neumbo peevili di lili noku lili, tashi dulika komatango ile konguloshi otaku dulu okweeta omupondo muhapu. Oho shakeneke ovanhu efimbo keshe to ende mepandavanda, ngeenge to ka landa, ngeenge to ka londa obesa ile to endaenda moparka. Omolwashike ito lilongekidile oshitwa shixupi shokutamekifa eenghundafana nokukatuka onghatu u popye naavo tava monika ve li ovanambili? Ile otashi dulika ho longo ile ho i kofikola oko to dulu okukundafana navamwe keshe efiku. Oto dulu okumona omhito okuyandja oundombwedi mokweeta po ashike oikundafanwa yopamishangwa oyo tai pendula ohokwe. Omaetepo mawa otaa hangwa pepandja lotete lokawedwapo mUukalele Wetu wUukwaniilwa waJanuali 2002. Keshe imwe yomeenghendabala edi otai dulu okuninga shihapu mokuhapupalifa ehafo laumwe mokuudifa.
6 Molwaashi ehafo ohali tu kwafele tu lididimike, inashi fimana tuu tu li kaleke po! Moku shi ninga, ohatu ka teya ondjabi inene eshi oilonga ei itai ka endululwa vali tai ke uya pexulilo layo. Etimaumbwile eli otali dulu okuhapupalifa ehafo letu mokuudifa.—Mat. 25:21.