Oilonga oyo tai tulumukifa
1 Etumwalaka lOmbibeli ohali tulumukifa ovo tave li tambula ko notave li tula moilonga monghalamwenyo yavo. (Eps. 19:8, 9) Otali va kwafele va manguluke ko komahongo oipupulu nosho yo keenghedi diyahameka notali yandje eteelelo lonakwiiwa li shii okulineekelwa. Ndelenee ovo tava tambula ko onghundana iwa havo ashike tava mono ouwa. Ovo tava lombwele vamwe oshili yOmbibeli tai tulumukifa navo ohava tulumukifwa.—Omayel. 11:25.
2 Otava pamekwa koukalele: Jesus okwa ti kutya ovo tava tambula ko ondjoko yopaKriste yokukala omuhongwa, oyo ya kwatela mo oilonga yokuudifa noyokuninga ovanhu ovahongwa, otave ke ‘limonena eemwenyo davo etulumuko.’ (Mat. 11:29) Eshi a yandja oundombwedi kuvamwe okwa li a pamekwa. Osha li sha fa oikulya kuye. (Joh. 4:34) Eshi a tuma ovahongwa 70 va ka udife, ova li va hafa eshi va mona Jehova ta yambidida eenghendabala davo.—Luk. 10:17.
3 Ovakriste vahapu kunena navo otava pamekwa kokukufa ombinga kwavo moilonga yokuudifa. Omumwameme umwe okwa ti: “Oukalele otau tulumukifa molwaashi otau wilike onghalamwenyo yange noku i pa elalakano. Omaupyakadi opaumwene nomafininiko akeshe fiku ohaa ningi oshinima shanafangwa ngeenge hai kufa ombinga moilonga yomomapya.” Omukalele umwe omuladi okwa ti: “Oukalele . . . ohau dimbulukifa nge efiku keshe kutya Jehova owoshili nohau etele nge ombili nelao lomomutima oyo itai dulu okumonika monghedi imwe vali.” Katu na tuu oufembanghenda okukala “ovalongi pamwe naKalunga”!—1 Kor. 3:9.
4 Ondjoko yaKristus oiwa: Nonande Ovakriste ova kumaidwa va ‘kondje,’ Jesus ina pula shi dulife pwaasho hatu dulu okuninga. (Luk. 13:24) Doshili, ote tu shivi pahole tu ‘litwike ondjoko yaye pamwe naye.’ (Mat. 11:29, eshangelo lopedu mo NW.) Ovo ve na okukondja neenghalo didjuu otava dulu okukala nelineekelo kutya oilonga yavo oyo tava longo nomutima aushe otai hafifa Kalunga, nokuli nonande oya ngabekwa.—Mark. 14:6-8; Kol. 3:23.
5 Itashi tulumukifa tuu okulongela Kalunga oo ha pandula keshe osho hatu ningi omolwedina laye! (Heb. 6:10) Natu kendabale alushe tu mu pe osho sha denga mbada.