Ovanyasha—tungeni ekanghameno liwa li na sha nonakwiiwa
1. Omolwashike ovanyasha Ovakriste va pumbwa okukulika eitavelo la pama?
1 Mbela oshike wa lenga unene momadiladilo oye? Mbela oho kala to diladila kombinga yashike? Mbela oho kala to diladila unene shi na sha noinima oyo i li ko paife ile oto lipula shi na sha nonakwiiwa nokuyandja elitulemo kwaasho Kalunga a udaneka? (Mat. 6:24, 31-33; Luk. 8:14) Eitavelo la pama ola pumbiwa opo tu katuke metwokumwe nomaudaneko aKalunga, ngaashi tashi dulu okumonika moihopaenenwa yaAbraham naMoses. (Heb. 11:8-10, 24-26) Ongahelipi to dulu okukulika eitavelo la tya ngaho nokutunga “ekanghameno liwa laayo yokomesho”?—1 Tim. 6:19.
2. Oshike hatu lihongo moshihopaenenwa shohamba Josia?
2 Konga Jehova: Ngeenge omu na elandulafano loinima yopamhepo moukwaneumbo weni, osho oshi shii okupandulwa. Ndele ino diladila kutya elandulafano la tya ngaho otali ka eta ashike eitavelo la pama ngahenya. Opo u mone “eshiivo lashili lokushiiva Kalunga,” ou na okukonga Jehova paumwene. (Omayel. 2:3-5; 1 Omaf. 28:9) Ohamba inyasha Josia osho ya ninga. Nonande ya kulila momudingonoko u he na oupamhepo muwa, ‘oya hovela okukonga Kalunga kaxe David’ eshi ya li i na omido 15.—2 Omaf. 34:3.
3. Ongahelipi ovanyasha Ovakriste kunena tava dulu okukonga Jehova?
3 Ongahelipi to dulu okukonga Jehova? Omokukonakona noukeka osho wa itavela ndele to ‘lishilipaleke ove mwene’ kutya ei oyo shili oshili. (Rom. 12:2, NW) Pashihopaenenwa, mbela oto dulu okuyelifa kutya Ombibeli otai ti ngahelipi shi na sha nohonde ile okuulika kutya Ouhamba waKalunga owa hovela nale okupangela meulu mo 1914? Okumona “eshiivo [lashili, NW] loshili” oko onghedi ya fimana yokutunga ekanghameno liwa li na sha nonakwiiwa.—1 Tim. 2:3, 4.
4. Ongahelipi ovaudifi inava ninginifwa tava dulu okuninga eehenokomesho lavo li kale liwetike?
4 Okukonga Jehova kwaJosia okwa eta oidjemo iwa. Fimbo kwa li i na wanifa omido 20, okwa katuka nouladi mokuhanauna po elongelokalunga loipupulu moshilongo. (2 Omaf. 34:3-7) Sha faafana, okweehena kwoye komesho pamhepo otaku limonikila meenghatu doye. (1 Tim. 4:15) Ngeenge ou li omuudifi i na ninginifwa, kendabala okuxwepopaleka oukalele woye. Ino kala ashike wa wanenwa kokuyandja oileshomwa. Shi ninga elalakano loye okulongifa Ombibeli, okutomhafana novanhu nosho yo okukulika ohokwe oyo i li muvo. (Rom. 12:7) Osho otashi ke ku kwafela u kule pamhepo.
5. Eemhito dilipi di li po dokutamununa mo oukalele wavo da mangulukila Ovakriste va ninginifwa?
5 Yandja osho sha denga mbada kuJehova: Ngeenge to ninginifwa shi li edidiliko kutya owe liyapulila Jehova, oho ningi omukalele waye a yapulwa. (2 Kor. 3:5, 6) Osho otashi ku yeululile eemhito dokulongela Jehova efimbo liyadi. Osho osha kwatela mo oilonga youkokolindjila noyaBetel, oilonga youtumwa nosho yo yopaiwana. Natango, onghedi imwe yokutamununa mo oukalele woye oyo okulihonga elaka limwe ile okutembuka u ka longe oko ku na omhumbwe inene.
6. Ongahelipi atusheni hatu dulu okutunga ekanghameno liwa li na sha nonakwiiwa?
6 Doshili, haaveshe tava dulu okukufa ombinga momaufembanghenda oilonga oyo, ndele keshe umwe womufye ota dulu okuyandja osho sha denga mbada kuJehova. (Mat. 22:37) Kutya nee eenghalo doye odi li ngahelipi, ninga okulongela Jehova oshilipulwa monghalamwenyo yoye. (Eps. 16:5) Mokuninga ngaho, oto ka tunga ekanghameno liwa li na sha nonakwiiwa.