Oshimpungu shomapulo
◼ Otu na okuzala ngiini ngele tatu ka talela po omahala gokulongela iilonga yaJehova?
Muuyuni auhe Iinyanga yUukwaniilwa, Iinyanga yiigongi nomagumbo gaBetel, ngaashi Ombelewa yokutoloka, oyi li omahala ngoka ga yapulilwa okulongela iilonga yaJehova. Oga yela nawa, ga yogoka nogu unganekwa nawa, onkee ano oge na okutalika ko nesimaneko. Go oga yooloka ko thilu kwaashono hashi monika olundji monkalelo ndjino yiinima yaSatana. Mboka haya talele po omahala ngoka haga longithwa okulongela iilonga yaJehova oye na okukala wo taya vulu okudhimbululwa kutya yo oyaJehova nohaya longo ehalo lye.
Tu li Aakriste, “otatu ulike kutya otse aayakuli yaKalunga” momikalo adhihe mwa kwatelwa okuzala nokwiiyopaleka kwetu. (2 Kor. 6:3, 4) Otwa tegelelwa wo tu kale tu na omikalo omiwanawa. Kehe ethimbo okuzala nokwiiyopaleka kwetu oku na okukala okuwanawa notaku opalele aalongeli yaJehova Kalunga. Shino osho shi na okukala ngawo unene tuu ngele tatu talele po ombelewa onene moNew York nosho wo iitayimbelewa muuyuni auhe.
Mokukundathana esimano lyokuzala nokwiiyopaleka ku li nawa, embo Organized to Do Jehovah’s Will otali popi kutya otwa pumbwa okukala twa yogoka palutu, pamizalo nokwiiyopaleka nawa uuna tu li muukalele nopokugongala kwopaKriste. Pepandja 138, okatendo oka-3, otaka ti: “Dhimbulukwa kutya edhina Betel otali ti ‘Egumbo lyaKalunga.’ Onkee ano, otwa tegelelwa okwiihumbata sha faathana mokuzala kwetu nomokwiiyopaleka uuna tu li pokugongala pOshinyanga shUukwaniilwa.” Omuthikampango nguka gwa dhenga mbanda ogu na okulandulwa kaauvithi ayehe yUukwaniilwa mboka taya talele po Betel, yopomudhingoloko nosho wo mboka yokokule. Komukalo nguno aatalelipo otaye ku ulika kutya oye na olupandu nesimaneko. — Eps. 29:2.
Okuzala kwetu oku na oku tu monikitha kutya otu li mboka “haa ihokolola oyo oonakutila Kalunga.” (1 Tim. 2:10, OB-1954) Okuzala nokwiiyopaleka kwetu otaku vulu okukwathela yalwe ya kale ye na etaloko li li nawa nokusimaneka elongelokalunga lyashili lyaJehova. Ihe osha ndhindhilikwa kutya uuna tashi ya pokutalela po omahala ngoka haga longithwa okulongela iilonga yaJehova, aamwatate naamwameme yamwe ohaya kala unene ya zala omizalo itaadhi opalele, dha zalwa nuuhethi nenge tadhi imonikila. Omizalo dha tya ngawo itadhi opalele Aakriste pompito kehe. Moshinima shika nosho wo miinima ayihe yonkalamwenyo yetu yopaKriste, otwa hala okukaleka po omithikampango dha tumbala ndhoka tadhi yoolola ko oshigwana shaKalunga kuuyuni nokulonga ashihe shoka tashi mu simanekitha. — Rom. 12:2; 1 Kor. 10:31.
Onkee ano, uuna to talele po ombelewa onene noshitayimbelewa moNew York nenge iitayimbelewa yilwe, kutya nduno owa ninga oshilage shoku ka talela po nenge owu li mefudho momahala gaatalelipo, ipula to ti: ‘Mbela omizalo dhandje nokwiiyopaleka kwandje otayi ulike ngaa uuyogoki nesimaneko lyehala ndyoka nda ka talela po? Mbela otashi gandja ngaa efano ewanawa kuKalunga ngono handi longele? Mbela yalwe otaya ka pundukithwa keholokopo lyandje?’ Okuzala kwetu nokwiiyopaleka naku kale aluhe haku ‘simanekitha elongo ndyoka tali popi Kalunga, Omuhupithi gwetu, mwaayihe mbyoka tatu yi ningi.” — Tit. 2:10.