Kwafela vamwe va kale ve hole Jehova
1. Oshike sha li she linyengifa vamwe opo va ehene popepi naJehova?
1 Mbela oto dimbuluka oshikando shotete eshi we lihonga kombinga yaJehova? Oshike sha li she ku linyengifa opo u ehene popepi naye? Ovanamitimadiwa vahapu ove linyengifwa opo va ehene popepi nOmushiti Jehova eshi ve lihonga kombinga yomaukwatya aye a tongomana, ngaashi olukeno nosho yo ohole. — 1 Joh. 4:8.
2, 3. Ongahelipi hatu dulu okulongifa embo Ombibeli otai hongo mokukwafela ovakonakonimbibeli vetu va kulike ohole yokuhola Jehova?
2 “Kalunga ketu Oye ou”: Embo Ombibeli otai hongo ola divilika ohole yaJehova notali ulike kutya osha fimana okukala nekwatafano lopofingo naye. Ongahelipi hatu dulu okulongifa oshishangomwa osho opo tu kwafele vamwe va kulike ohole yavo yokuhola Jehova? Ngeenge hatu divilike oshitwa shonhumba, otu na alushe okupula omapulo oo taa diladilifa omunhu, ngaashi: “Oshinima eshi otashi tu hongo shike kombinga yaJehova?” ile “Omonghedi ilipi mbela oshitwa eshi tashi ulike kutya Jehova oye Xe omunahole kuhe na vali?” Okuhonga vamwe monghedi ya tya ngaho, otashi ke va kwafela opo va kale ve na ekwatafano liwa naJehova mokukalamwenyo kwavo akushe.
3 Ngeenge otwa kwafele ovakonakonimbibeli vetu va kale va lenga eshiivo lokushiiva Kalunga aeke kashili omunamwenyo, otava ka dimina eendjovo daJesaja odo tadi ti: “Kalunga ketu Oye ou.” (Jes. 25:9) Ngeenge hatu yelifile vamwe Eendjovo daKalunga, otwa pumbwa yo okudivilika omanangeko noupuna oo ovanhu tava ka hafela eshi Kalunga ta ka wanifa po omalalakano aye okupitila mepangelo laye olo li li meke laKristus Jesus. — Jes. 9:5, 6.
4, 5. Ohole yokuhola Jehova oya kwatela mo shike?
4 Nghee hatu dulu okuulika kutya otu hole Jehova shili: Okuhola Jehova nomutima wetu aushe, nomwenyo wetu aushe nosho yo omadiladilo etu aeshe osha kwatela mo shihapu shihe fi ashike okukala tu udite twa nanenwa kuye. Otu na okukala tu shii omifikamhango daye nokukala metwokumwe nado. (Eps. 97:10) Ohatu ulike kutya otu hole shili Kalunga ngeenge otwa kala hatu dulika filufilu koipango yaye nokutwikila okweenda ‘mouyapuki nometilokalunga’ nonande ohatu shakeneke omayeleko nomapataneko. — 2 Pet. 3:11; 2 Joh. 6.
5 Oshinima shihafifa okulonga ehalo laKalunga molwaashi tu mu hole. (Eps. 40:9) Otu na okukwafela ovakonakonimbibeli va mone kutya oipango aishe yaKalunga oya nuninwa okweetela alushe ovapiya vaye ouwa. (Deut. 10:12, 13) Ngeenge ohatu dulika kewiliko olo Jehova te tu pe, ohatu ulike kutya otu na olupandu omolwoinenelonga yaye aishe. Otu na okukwafela ovakonakonimbibeli vetu va ude ko kutya okweenda meendjila douyuki daJehova otashi ke va kwafela opo va henuke omaupyakadi a nyikifa oluhodi oo haa etifwa kokuhadulika komifikamhango daJehova.
6. Ovo ve hole Jehova ohava hafele omanangeko noupuna elipi?
6 Kalunga oha nangeke noupuna ovo ve mu hole: Jehova oku na ko nasha lela novalininipiki ovo ve mu hole nohe va hololele ‘oinima yaye yomoule.’ (1 Kor. 2:9, 10, NW) Okukala tu na eshiivo lomoule li na sha nomalalakano aJehova ohashi tu kwafele tu kale tu shii kutya onakwiiwa otai ka kala ya tya ngahelipi notu kale tu na eteelelo la twa li na sha nonakwiiwa. (Jer. 29:11) Ovo ve hole Jehova ohava mono ouwa mefilonghenda laye linenenene. (Ex. 20:6) Omolwohole inene yaKalunga oyo e va hole, ove na eteelelo lomwenyo waalushe. — Joh. 3:16.
7. Ou udite ngahelipi eshi u na oufembanghenda wokukwafela vamwe va kale ve hole Jehova?
7 Apa ngoo pe fike eshiivo letu lokushiiva Tate yetu womeulu, opo ngoo tapa kala pe fike ehalo letu lokulombwela vamwe kombinga yoinima oyo hatu lihonga. (Mat. 13:52) Kau fi tuu oufembanghenda munenenene okukwafela vamwe, unene tuu ounona vetu, opo va kale ve hole Jehova! (Deut. 6:5-7) Atusheni, mwa kwatelwa yo novakonakonimbibeli vetu, natu twikileni okuhambelela Jehova eshi hatu hafele ‘ouwa waye muhapu.’ — Eps. 145:7, OB-1986.