Hogolola okwaambidhidha Uukwaniilwa waKalunga ngashingeyi!
Dhiladhila andola moshitopolwa sheni mu uka oshikungulu. Owu uvu iikondo yepangelo tayi tseyitha etseyitho lye endelela moradio tayi ti: “ZII MO MOSHITOPOLWA! INDENI KOOTENDA!” Mbela oto ka ninga po shike? Kapu na omalimbililo, oto ka ya kootenda hoka.
Uushili owo kutya, atuheni otwa tegelela oshikungulu oshinene shoka Jesus e shi ithana “uudhigu uunene.” (Mateus 24:21) Uudhigu mbuka itatu vulu oku wu yanda. Ihe otatu vulu okuninga po sha tu igamene. Oshike tatu vulu okuninga po?
MEuvitho lye lyokOndundu, Jesus Kristus okwa li a gandja elombwelo ndika a ti: “Tangotango kongeni Oshilongo shaKalunga nuuyuuki we.” (Mateus 6:33) Otatu shi kongo ngiini?
Tangotango konga Oshilongo shaKalunga. Shika osha hala okutya, otu na okukala twa tala ko Uukwaniilwa waKalunga wa simana wu vule iinima ayihe. (Mateus 6:25, 32, 33) Omolwashike tu na okukala twe wu tala ko ngawo? Omolwaashoka, aantu itaya vulu okukandula po omaupyakadhi gaantu. Uukwaniilwa waKalunga owo owala tawu vulu oku shi ninga.
Konga uuyuuki we. Otu na okukambadhala ngaashi tatu vulu tu kale metsokumwe noompango nomithikampango dhaKalunga dhuuyuuki. Omolwashike mbela? Oshoka ngele ohatu tokola kutse yene shoka shi li mondjila naashoka sha puka, otashi ke tu etela uupyakadhi. (Omayeletumbulo 16:25) Ihe ngele ohatu vulika koompango dhaKalunga, itatu ka nyanyudha owala Kalunga, ihe otashi ke tu etela wo uuwanawa. — Jesaja 48:17, 18.
Tsikila okukonga tangotango Uukwaniilwa waKalunga nuuyuuki we. Jesus okwe tu londodha kutya aantu yamwe otashi vulika ya piyaganekwe e taya dhiladhila kutya ngele oye na iimaliwa oyindji, otaya ka kala ya gamenwa. Yalwe otashi vulika ye ethe iimpwiyu yonkalamwenyo yi ya gwilile po sigo oponkatu mpoka itaaya ka kala we ye na ethimbo lyokukonga Uukwaniilwa waKalunga. — Mateus 6:19-21, 25-32.
Ihe, Jesus oku uvaneka kutya mboka taya ambidhidha Uukwaniilwa waKalunga, otaya ya ka mona aluhe shoka ya pumbwa ngashingeyi notaya ka mona omayambeko itaaga hulu po monakuyiwa. — Mateus 6:33.
Nonando aalongwa yaJesus yomethelemumvo lyotango oya li haya kongo tangotango Uukwaniilwa waKalunga nuuyuki we, inaya mona omauwehame nokumona iihuna akuhe kwa hula po pethimbo lyawo. Ihe oya li ya gamenwa. Ngiini mbela?
Oya li haya kala metsokumwe nomithikampango dhaKalunga dhuuyuuki nodha li dhe ya gamene moonkalo oondhigu ndhoka dha adha mboka inaaya vulika kuKalunga. Okukala ye na eitaalo lya kola kutya Uukwaniilwa waKalunga otawu ya, oshe ya kwathele yu ungaunge nomaupyakadhi ga kwata miiti noonkondo. Kalunga okwa li wo e ya pe “oonkondo,” opo ya vule okwi idhidhimika. — 2 Aakorinto 4:7-9.
OTO KA KONGA NGAA TANGO UUKWANIILWA WAKALUNGA?
Methelemumvo lyotango, Aakriste oya li ya vulika lela kelombwelo lyaJesus lyokukonga tango Uukwaniilwa. Oya li yu uvithile aantu onkundana ombwanawa miitopolwa yi ili noyi ili yokombanda yevi. (Aakolossa 1:23) Mbela opu na ngaa yamwe taya ningi ngawo kunena?
Osho naanaa! Oonzapo dhaJehova odhi shi kutya oku na owala ethimbo efupi uuyuni mbuka wu hulithwe po kUukwaniilwa waKalunga. Onkee ohadhi ningi ngaashi tadhi vulu dhi longe iilonga mbika Jesus e tu lombwela a ti: “Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” — Mateus 24:14.
Oto ki inyenga ngiini konkundana ombwanawa? Otatu ku ladhipike wu holele aantu yomuMakedonia, oshilando shaBerea, yomethelemumvo lyotango. Sho yu uvu onkundana ombwanawa kombinga yUukwaniilwa komuyapostoli Paulus, oye yi taamba ko ‘nehalo ewanawa.’ Opo nduno, “oya kala nokukonakona Omanyolo” ya tale ngele shono yu uvu oshoshili noya katuka metsokumwe naashoka yi ilongo. — Iilonga 17:11, 12.
Nangoye oto vulu okuninga sha faathana. Ngele owa kongo tango Uukwaniilwa waKalunga nuuyuuki we, oto kala wa gamenwa ngashingeyi noto ka kala wu na ombili nowa gamenwa monakuyiwa.