‘Ninga ayihe omolwevaangeli’
1. Omuuvithi gwUukwaniilwa oku na ehalo okuninga shike nomolwashike?
1 Omuyapostoli Paulus okwa li e uvite e na oshinakugwanithwa shokuuvithila yalwe evaangeli. (1 Kor. 9:16, 19, 23) Sha faathana, molwaashoka otwa hala aantu ya ka mone omwenyo gwaaluhe ohashi tu inyengitha tu ke yu uvithile evaangeli.
2. Uuna tatu uvitha, otwi ilongekidha okuninga omalunduluko geni nomolwashike?
2 Uvitha mpoka aantu taya adhika nopethimbo taya monika: Omuyuli gwoohi omwaanawa ohu umbile ondjolo nenge onete ye pethimbo nopehala mpoka oohi tadhi adhika, ihe shi ningi owala ethimbo ndyoka a hala. Tse wo tu li “aayuli yaantu,” otwa pumbwa okuninga omalunduluko gontumba opo tu kale hatu adha aantu moshitopolwa shetu nokunyanyukilwa uuthembahenda wokukwata “oohi dhomaludhi agehe.” (Mat. 4:19; 13:47) Mbela otatu vulu okulongitha oowili dhokomatango opo tu adhe aantu momagumbo nenge dhongula onene opo tu gandje uunzapo mepandaanda? Elalakano lyaPaulus olya li ‘okuuvitha elaka etoye,’ nokwa li he shi ningi poompito ndhoka tadhi opalele. — Iil. 17:17; 20:20, 24.
3, 4. Ongiini tatu vulu okulundulula oonkundathana dhetu naantu ngele tu li muukalele, notashi eta iizemo yini?
3 Kala ho lundulula shi ikolelela koompumbwe dhaantu yomoshitopolwa sheni: Omuyuli gwoohi oha lundulula omikalo dhe opo a kwate oohi dholudhi lwontumba. Ongiini tatu vulu okuuvitha evaangeli lyUukwaniilwa momukalo ngoka tagu opalele aantu moshitopolwa shetu? Ngele tatu popi kombinga yaashoka aantu haya kala tayi ipula unene nasho, natu shi ninge nuukeka nokupulakena nawa shoka taya ti shi na ko nasha naashoka. (Jak. 1:19) Opo ya vule okupopya natse otatu vulu oku ya pula kutya oye shi tala ko ngiini. (Omayel. 20:5) Momukalo nguka otatu vulu okulundulula oonkundathana dhetu dhokuuvitha evaangeli momukalo ngoka tagu ya gumu. Paulus okwa li a ‘ningi ashihe shoka ta vulu omolwaayehe.’ (1 Kor. 9:22) Otu na okukala hatu lundulula oonkundathana dhetu opo tu vule okwaadha omitima dhaantu.
4 Kashi nyanyudha tuu okuuvithila aantu “onkundana ombwanawa”! (Jes. 52:7) Natu ‘ningeni ayihe omolwevaangeli’ opo tu adhe aantu oyendji ngaashi tashi vulika. — 1 Kor. 9:23.