Mbela owu na ehalo okuninga omalunduluko?
1. Omalunduluko geni hatu ningi omolwoonkalo dhuuyuni?
1 Ombiimbeli otayi popi mAakorinto yotango 7:31 kutya uuyuni mbuka kawu li kokule nokuhula po. Omathimbo nomathimbo, oonkalo dhuuyuni mbuka ohadhi tu ningitha tu lundulule omikalo dhetu dhokuuvitha, onkalamwenyo yetu nosho wo omafalomo getu muukalele. Mbela owu na ehalo okuninga omalunduluko?
2. Omolwashike tu na okukala hatu ningi omalunduluko, opo tu endele pamwe nehangano lyaJehova?
2 Omikalo dhini ho longitha uuna tu uvitha: Egongalo lyopaKriste olya kala aluhe nokuninga omalunduluko miinima yontumba noyongandi. Pashiholelwa, petameko sho Jesus a tumu aalongwa ye okwa li e ya lombwele kaaya humbate iimaliwa nosho wo kaaya faalele oompunda dhiikulya. (Mat. 10:9, 10) Ihe konima yethimbo okwa li a lundulula oshinima shoka, opo a kwathele aalongwa ye yi ilongekidhile omapataneko ngoka taya ka tsakaneka nosho wo ya vule okutamununa mo iilonga yawo yokuuvitha miitopolwa yilwe. (Luk. 22:36) Uule womimvo omathele dha ka pita, ehangano lyaJehova olya kala nokulongitha omikalo dhi ili nodhi ili miilonga yokuuvitha. Pashiholelwa, olya li lya longitha uukalata wokugandja uunzapo, ooradio nosho wo iihauto yi na omambako, shi ikolela komukalo ngoka tagu opalele pethimbo ndyoka. Molwaashoka aantu oyendji ihaya adhika momagumbo kunena, ehangano otali tu ladhipike tu gandje uunzapo womontaneho nosho wo wontukuluka. Otwa kala wo nokuladhipikwa tu kale hatu longo egumbo negumbo kongulohi, ngele aantu moshitopolwa shetu ohayu uhala kiilonga. Mbela ohatu endele ngaa pamwe netemba lyaJehova sho tali ningi omalunduluko? — Hes. 1:20, 21.
3. Okuninga omalunduluko otaku ke tu kwathela ngiini tu longe nawa oshitopolwa shetu?
3 Omafalomo gomuukalele: Aantu moshitopolwa sheni ohayi ipula unene nashike? Okombinga yuuhupilo mbela, nenge ononkalo yomomagumbo nosho wo nomiyonena? Opo tu vule okwiilongekidha omafalomo ngoka taga opalele aantu moshitopolwa moka hatu longo, oshi li nawa tu kale tu shi omaupyakadhi nosho wo oonkalo moka ye li pethimbo ndyoka. (1 Kor. 9:20-23) Ngele owa mono kutya omunegumbo oti ipula nashike, oshi li nawa wu lundulule efalomo lyoye nokuukitha eitulomo kwaashoka ti ipula unene nasho, pehala lyokutsikila noshikundathanwa shoka we ya wi ilongekidha nale.
4. Omolwashike tu na okukala hatu ningi omalunduluko nopwaahe na okwoongaonga?
4 Uuyuni “mbuka” tu li owu li pokuhula po masiku, wo uudhigu unene nawo owu li pokutameka. Ombiimbeli otayi kutya “uuyuni mbuka [kawu] li kokule nokuhula po.” (1 Kor. 7:29) Onkee ano, osha simana okuninga omalunduluko nopwaahe na okwoongaonga, opo tu uvithile aantu muule wokathimbo okafupi hoka ka hupa ko.