Nkene tatu vulu okuhwepopaleka uunkulungu wetu muukalele — Okuulika okunakonasha naantu paumwene

Omolwashike sha simana oku shi ninga: Jesus okwa li ha tala ko aantu kehe gumwe pauhandimwe, nokwa li e yu ulukile pahole kutya oku na ko nasha nayo paumwene. Pashiholelwa, oshikando shimwe Jesus otashi vulika a li a mono kutya omulumentu gumwe ombolo okwa li a sa ohoni, onkee sho e mu aludha, okwe shi ningi ye li po oyo ayeke yaali, ya yi mpoka itaaya vulu okumonika kaantu. (Mark. 7:31-35) Okwa li ha yaalele aalongwa ye mokutala komangambeko gawo noka li he ya pe uuyelele owundji. (Joh. 16:12) Nokuli naasho e li megulu, Jesus ohu ulike okunakonasha naantu paumwene. (2 Tim. 4:17) Tu li aalanduli yaKristus, otwa hala oku mu holela. (1 Pet. 2:21; 1 Joh. 3:16, 18) Natango, otatu ka pondola muukalele wetu ngele otwa kala hatu gandja eitulomo komunegumbo nokundhindhilika oonkalo dhe dhopaumwene dhi ikalekelwa, shoka e na ohokwe musho nosho wo shoka ti ipula nasho. Ota ka kala a hala okupulakena ngele okwa mono kutya inatu ya owala kuye nelalakano lyoku mu lombwela etumwalaka nenge lyoku mu pa iileshomwa, ihe pehala lyaashono, otu na ko nasha naye paumwene.

Nkene tu na oku shi ninga:

Kala wi ilongekidha nawa. Kala wa manguluka, imemeha, kala wo wu na uukuume.
Kala ho ndhindhilike oonkalo dhomuntu. Mbela owu wete iinima mbyono tayi ulike kutya oku na aanona? oku hole okulonga moshikunino nenge oku na iinamwenyo yomegumbo, ngaashi uumbishi nuumbwa? okwi itaala omalongo gontumba gelongelokalunga? Oto vulu okulundulula efalomo lyoye lyi opalele oonkalo dhe.
Mu pula a gandje omadhiladhilo ge, pulakena wo nawa noino mu ya melaka. Kala we mu tala koshipala wu ulike kutya owa pulakena. Mu pandula omolwetyokosha lye, ngele otashi wapa nomutima aguhe. Yanda okuninga oompata naye.
Kala ho ningi omalunduluko. Ngele osha pumbiwa, lundulula efalomo lyoye wu kwatele mo shoka omunegumbo ti ipula nasho. Shika otashi vulika shi kale oshipu shi vulithe pwaashoka to dhiladhila, molwaashoka uutraktate wetu, uubroshure nosho wo iifo yetu ohayi kundathana iinima ya yoolokathana. Ngele owe ya puye pethimbo kaali li nawa, ngaashi pethimbo i ipyakidhila, taamba ko onkalo ye e to ningi efalomo lyoye paufupi.

Kambadhala oku shi ninga momwedhi nguka:

Kala ho idheula pethimbo lyelongelokalunga lyuukwanegumbo, nenge manga wu li muukalele, kombinga yankene omuuvithi e na okulundulula efalomo lye opo i ikolelele kwaashoka omunegumbo ta popi.
Omathimbo gamwe pelongekidho lyiilonga yomomapya, omumwatate ngoka ta kwatele komeho ota vulu a ninge oonkundathana nenge euliko kombinga yomikalo dhokuulika okunakonasha naantu paumwene.