Longa mboka kaaye shi okulesha nawa
1. Eshongo lini hatu tsakaneke muukalele?
1 Ngele tu li muukalele, omathimbo gamwe ohatu tsakaneke aantu mboka kaaye shi okulesha nawa, ihe oya hala okutseya oshili. Oshike tatu vulu okuninga po?
2. Ongiini tu na okusimaneka aantu mboka kaaye shi okulesha nawa, nomolwashike?
2 Ulika kutya owe ya simaneka: Omutima gwomuntu ogwo gu na oshilonga kuJehova, ihe handondo yuulongelwe we. (1 Sam. 16:7; Omayel. 21:2) Onkee ano, katu na okudhina mboka kaaye shi okulesha nawa. Aantu ya tya ngaaka otaya ka taamba ko ekwatho lyetu nuupu ngele otwe ya simaneka noku ya tala onteni. (1 Pet. 3:15) Shika osha kwatela mo okwaahe ya thiminika ya leshe omanyolo nuutendo. Sho omuntu ta humu komeho mokwiilonga ooshili dhOmbiimbeli dhi na ongushu, otashi vulika a kale nehalo okuhwepopaleka okulesha kwe, opo a vule okunyanyukilwa okulesha Oohapu dhaKalunga “omutenya nuusiku.” — Eps. 1:2, 3.
3. Omikalo dhokulonga dhini tadhi vulu okulongithwa okulonga mboka kaaye shi okulesha nawa?
3 Omikalo dhoku ya longa pekonakonombiimbeli: Omukalo gumwe omwaanawa ogwo okulongitha omafano opo ya dhimbulukwe shoka tayi ilongo. Oto vulu okupula omukonakoni a hokolole shoka e wete mefano ndyoka li li moshileshomwa shoka tamu longitha. Konima yaashono, longitha omapulo gokondandalunde opo wu mu kwathele u uve ko shoka efano tali longo. Longitha omanyolo ngoka taga longo iitsa yontumba mbyoka yi li mefano. Oto vulu wo okulongitha omafano wu endulule oshikundathanwa sheni. Ino longitha uuyelele owundji poshikando. Tsa omuthindo enenedhiladhilo niitsa ya simana yaashoka tamu kundathana nokuhenuka iinima mbyoka inayi kwatelwa moshikundathanwa sheni. Lesha omanyolo okuza mOmbiimbeli nokupula omapulo wu tale ngele omukonakoni oku uva ko ngaa shoka mwa lesha. Shika otashi vulu okukokeka ehalo lye lyokulesha nawa opo a kale ta kongo ooshili dhOmbiimbeli dha gwedhwa po kuye mwene.
4. Ongiini tatu vulu okukwathela omukonakoni a hwepopaleke okulesha kwe?
4 Shoka tatu vulu okulongitha moku ya kwathela: Aantu mboka kaaye shi okulesha nawa nenge mboka inaaya mona naanaa ompito okwiilonga okulesha nawa otaya vulu okukwathelwa mokulongitha okabroshure Ngoye oto vulu okukala nomwenyo sigo aluhe kombanda yevi! Okabroshure hoka oke na omafano ngoka ga popiwa paufupi nomanyolo gOmbiimbeli ngoka taga vulu okuthindila ooshili dhOmbiimbeli momutima gwomukonakoni. Miitopolwa yimwe, aakuluntugongalo otaya vulu okuunganeka pu ningwe ootundi dhokwiilonga okulesha megongalo. Omaetopo ngaka taga longo otashi vulika ge tu kwathele opo tu vule okukwathela mboka kaaye shi okulesha nawa yu uve ko “Omanyolo omayapuki” ngoka taga vulu oku ya pa ondunge ya ka hupithwe. — 2 Tim. 3:15.