Nkene to vulu okukwathela mboka kaaye shi nawa okulesha

1. Okulonga Ombiimbeli mboka kaaye shi okulesha oku na eshongo lini?

¹ Aanegumbo mboka kaaye shi nawa okulesha otashi vulika ya kale ye na ohokwe miinima yopambepo, ihe otashi vulika ya mbandamekwe kOmbiimbeli nokomambo galwe. Okupa aantu mboka embo Omalongo gOmbiimbeli, unene tuu petameko otashi vulika kaashi kwathele naanaa. Ongiini tatu vulu oku ya kwathela pambepo? Otwa li twa pula aauvithi mboka ya pyokoka ya za miilongo 20 ya yoolokathana kombinga yaashoka haya ningi po. Omaetopo gawo otaga landula mpaka.

2. Iilongitho yini hayi pondola mokukwathela gumwe ngoka keeshi okulesha?

² Ngele omukonakoni oku shi okulesha kashona nenge keeshi shi nando nando, oto vulu okutameka naye nando omokabroshure Kala ho pulakene kuKalunga opo wu ka kale nomwenyo sigo aluhe. Omukokolindjila gumwe muAmerika ohu ulukile omuntu uubroshure awuhe e te mu pula kutya okeni okapu kuye. Oshitayimbelewa shoka shi li moKenya osha lopota kutya iilongitho mbyoka oya kala tayi pondola lela molwaashoka muAfrika aantu pamuthigululwakalo ohaya longwa okupitila mokulombwelwa omahokololo pehala lyokukala noonkundathana dhomapulo nomayamukulo. Ihe omuntu ngoka a longwa otashi vulika a taambe ko okulesha ye ta pulwa omapulo, omukalo ngoka tashi vulika gu kale omudhigu kwaangoka a mona elongo eshona lyopevi. Ngele omukonakoni oha vulu okulesha kashona, aauvithi oyendji oye hole okutameka mokabroshure Onkundana ombwanawa ya za kuKalunga, nenge Oto vulu okukala kuume kaKalunga, nenge tashi vulika Embo Lyandje lyOmahokololo gOmbimbeli.

3. Omayele geni tage tu kwathele tu kale tu shi okulonga nawa aantu mboka kaaye shi okulesha?

³ Kala ho pandula: Aantu mboka inaayi ilonga okulesha otashi vulika ya kale ya sa ohoni, notashi vulika ya kale inaayi isimaneka. Oku ya kwathela ya kale ya manguluka okwo onkatu yotango yoku ya longa oshili. Aantu oyendji mboka kaaye shi okulesha oye na oondunge nohaya vulu okwiilonga. Ungaunga nayo nesimaneko. (1 Pet. 3:15) Otashi ke ya tsa omukumo ya tsikile nekonakonombiimbeli ngele oyu uvite kutya oonkambadhala dhawo odhi na oshilonga nosho wo kutya otaya ningi ehumokomeho lyopambepo. Onkee ano kala ho ya pandula aluhe.

4. Ongiini tatu vulu okuladhipika mboka kaaye shi okulesha yi ilongekidhile ekonakono?

⁴ Nonando omukonakoni ke shi okulesha, mu ladhipika a kale hi ilongekidhile ekonakono lye. Aauvithi yamwe moSouth Africa ohaya ladhipike aalongwa yawo ya pule oshilyo shuukwanegumbo nenge kuume ngoka ha lesha nawa a kwathele aakonakoni yawo. Omuuvithi gumwe moBritania oha ladhipike aalongwa ye yi ilongekidhe taya longitha embo lye taya tala kuutendo uushona pethimbo lyekonakono opo ya mone nkene hashi kala lela oshipu okumona omayamukulo uuna ga tendwa. Omumwatate gumwe gwokoIndia oha ladhipike aalongwa ye ya tale komathano moshileshwa shoka taye ki ilonga oshikando tashi landula nokutedhatedha kugo komeho yethimbo.

5. Ongiini tatu vulu okuulika eidhidhimiko uuna tatu ningi ekonakono?

⁵ Kala wu na eidhidhimiko: Kutya nduno oho longitha oshileshomwa shini, kala unene ho tala kiitsa mbyoka ya simana, e to kwathele omukonakoni gwoye e yu uve ko nawa. Petameko, otashi vulika shi kale shi li nawa oonkundathana dhi kale owala ominute 10 sigo 15. Ino kambadhala okukundathana uuyelele owundji, otashi vulika mu ninge uutendo uushona pekonakono kehe. Kala wu na eidhidhimiko ngele omukonakoni oha lesha kashona. Otashi vulika shi mu tse omukumo sho ta hwepopala mokulesha naasho ta tameke okukala ha pandula Jehova. Opo wu kwathele omukonakoni gwoye e shi ninge, oshi li nawa wu mu hiye kokugongala okuza petameko.

6. Ongiini tatu vulu okukwathela oohandimwe yi ilonge okulesha?

⁶ Ngele aakonakonimbiimbeli oyi ilongo okulesha, otaya ka ninga ehumokomeho lyopambepo meendelelo. (Eps. 1:1-3) Ngele omukonakoni okwa teka omukumo, oto vulu wu mu tse omukumo mokutala kiinima yimwe mbyoka a vula okwiilonga. Mu shilipaleka kutya Jehova ota ka yambeka oonkambadhala dhe, noku mu ladhipika a pule ekwatho kuye okupitila megalikano. (Omayel. 16:3; 1 Joh. 5:14, 15) Aauvithi yamwe muBritania ohaya ladhipike aalongwa yawo yi itulile po omalalakano ge li pandjele, tashi vulika okwiilonga oondanda, okukonga nokulesha omanyolo ngoka ge etwa mo, nokulesha miileshomwa yopaMbiimbeli ya pupalekwa. Okukwathela aantu yi ilonge okulesha olundji ohaku kala kwa kwatela mo oku ya ladhipika ya kale ya hala oku shi ninga, ihe haku ya longa owala nkene ye na oku shi ninga.

7. Omolwashike kaatu na okuholeka oshili mboka kaaye shi okulesha?

⁷ Jehova iha dhini mboka ya mona elongo eshona. (Job 34:19) Oha tala momutima gwomuntu. (1 Ondjal. 28:9) Onkee ano ino holeka oshili mboka kaaye shi okulesha. Opu na iilongitho oyindji ya dhenga mbanda mbyoka to vulu okutameka nayo. Hugunina, oto vulu wu lundululile ekonakono membo Omalongo gOmbiimbeli nomukonakoni gwoye opo nduno to mu pe ontseyo yomuule yOmanyolo.