Uuna tu li muukalele oshi li euliko kutya otu hole Kalunga
1. Ohole yokuhola Kalunga oya li yi inyengitha Jesus a ninge shike?
1 Ohole oya li yi inyengitha Jesus a gwanithe po uukalele we. Kehe shoka Jesus a ningi muukalele osha li shili shu ulike ohole ye yokuhola Jehova. Jesus okwa ti: “Uuyuni ou na okutseya kutya ngame ondi hole Tate. Onkee otandi longo ayihe, ngashika a lombwele ndje.” (Joh. 14:31) Tu li aalanduli yaJesus, otu na oshinakugwanithwa shokuulika ohole yetu onene yokuhola Kalunga muukalele. — Mat. 22:37; Ef. 5:1, 2.
2. Ohole yokuhola Jehova ohayi nwetha mo ngiini uukalele wetu?
2 “Edhina lyoye nali yapulwe”: Uuna tatu longitha nuulaadhi ompito kehe okupopya nayalwe kombinga yaJehova nUukwaniilwa we, otatu ulike kutya otu mu hole nongele tatu shi ningi, otatu yapulitha edhina lye. (Eps. 83:18, NW; Hes. 36:23; Mat. 6:9) Uukalele wetu ohawu ulike ehalo lyetu lyokuyapulitha edhina lyaJehova nehalo lye li longwe, ngaashi owala uukalele waJesus wa li. — Mat. 26:39.
3. Omomukalo guni ohole yetu yokuhola Jehova hayi tu kwathele tu sinde omashongo?
3 Ohole ohayi tu inyengitha tu sinde omashongo: Ngele otu hole Jehova otatu ka sinda uuwinayi auhe. (1 Kor. 13:4, 7) Jesus okwa li a taalelwa kiinima oyindji monkalamwenyo ye mbyoka ya li tayi vulu oku mu imba kaa tsikile nuukalele we. Nonando ongaaka, uuna a taalelwa kuupyakadhi, ohole ye yomuule nehalo lye okulonga ehalo lyaJehova oye mu kwatha a sinde uupyakadhi kehe. (Mark. 3:21; 1 Pet. 2:18-23) Ohole yetu yokuhola Kalunga ohayi tu kwathele tu sinde omashongo ngoka hage tu adha. Mokulandula oshiholelwa shaKristus, otatu vulu okukala neinekelo nokuninga ashihe shoka tatu vulu opo tu gwanithe po uukalele wetu. Nonando otu patanekwe kiilyo yuukwanegumbo, kaatu na uukolele, twa kulupa nenge tatu ulwa nayi kaantu yalwe, itashi ke tu imba tu kale tu hole Jehova nokugwanitha po uukalele wetu ngaashi tashi vulika.
4. Otu na uuthembahenda wuni omolwohole yetu yokuhola Jehova?
4 Ohole oyo oshinima oshinene notwa lalekwa nuuyamba okukala tu na uukwatya wokuulika nomutima aguhe ohole yetu yokuhola Kalunga muukalele wetu. (1 Kor. 13:13) Molwaashoka otu li popepi nethimbo ndyoka uuna edhina lyaJehova tali ka simanekwa sigo aluhe, ‘ohole yetu nayi koke nokutana.’ — Fil. 1:9; Mat. 22:36-38.