Tompa mboka tu uvithile
1. Omuuvithi ngoka a pyokoka oha longitha ngiini Oohapu dhaKalunga muukalele?
1 Omuuvithi ngoka a pyokoka ngaashi omuyapostoli Paulus, oku shi kutya ‘okulonga aantu oshili ya yela,’ osha kwatela mo oshindji kaashi shi owala okutotha mo Omanyolo omayapuki. (2 Tim. 2:15) Uuna tatu longitha Oohapu dhaKalunga, ongiini tatu vulu ‘okutompa’ mboka tatu uvithile? — Iil. 28:23.
2. Ongiini tatu vulu okukwathela aantu ya kale ya simaneka Oohapu dhaKalunga?
2 Ulika shoka Oohapu dhaKalunga tadhi ti: Tango, ulukila omupulakeni a mone kutya Ombiimbeli oyi na shili uunongo wa za kuKalunga. Ngele otwi inekela Ombiimbeli otashi ki inyengitha aapulakeni yetu yi itule mo sho tatu lesha enyolo. (Heb. 4:12) Oto vulu okutya “omukalo moka Kalunga ha tala ko oshinima shika ogwa kwathela ndje noonkondo. Tala shoka Oohapu dhe tadhi ti.” Ngele otashi vulika, leshela omupulakeni ovelise mOmbiimbeli.
3. Oshike tatu vulu okuninga opo omupulakeni u uve ko ovelise ndjoka twa lesha?
3 Olutiyali, fatulula enyolo ndyoka wa lesha. Aantu oyendji ihayu uvu ko naanaa ovelise yOmbiimbeli ngele opo taye yi leshelwa lwotango. Olundji otu na oku ya fatululila nkene ovelise ndjoka tayi ambidhidha shoka tatu kundathana. (Luk. 24:26, 27) Totha mo omanenedhiladhilo menyolo ndyoka to lesha. Oto vulu okupula omupulakeni wu tale ngele ovelise okwe yi uva ko nawa. — Omayel. 20:5; Iil. 8:30.
4. Otwa pumbwa okuninga shike opo tu tompe mboka tatu uvithile?
4 Tompa aapulakeni to longitha Omanyolo: Olutitatu, kambadhala wu adhe omadhiladhilo nomutima gomupulakeni. Kwathela omunegumbo a mone nkene ovelise ndjoka ye mu guma paumwene. Omuntu ota vulu okulundulula omadhiladhilo ge ngele otwe mu tompo nOmanyolo. (Iil. 17:2-4; 19:8) Pashiholelwa, konima yokulesha Ekosodus 15:3, OB-1954, otatu vulu okukundathana nkene sha simana okutseya edhina lyagumwe ngele otwa hala tu kale nekwatathano ewanawa naye. Oto vulu wu mu pule to ti: “Okutseya edhina lyaKalunga otashi vulu mbela okuhwepopaleka omagalikano goye?” Enyolo otali ka kala owala tali ti sha komunegumbo ngele twe mu ulukile nkene lya guma onkalamwenyo ye. Okutompa mboka ye na omitima dhu uka tatu longitha Oohapu dhaKalunga otaku ya kwathele ya longele Jehova Kalunga kashili omunamwenyo. — Jer. 10:10.