Kala ho longitha nuukeka ‘egongamwele lyombepo’

‘Taambeni egongamwele lyombepo nokutya, oohapu dhaKalunga.’—EF. 6:17, OB-1954.

1, 2. Otu na okwiinyenga ngiini kompumbwe onene yaauvithi yUukwaniilwa?

JESUS sho a li a mono oongundu dhaantu mboka ya li ye na ompumbwe yopambepo, okwa lombwele aalongwa ye a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.” Jesus ka li e etha owala oshinima shoka inaa ninga po sha. Konima sho a li a popi oohapu ndhoka, “okwi ithana aalongwa ye omulongo nayaali” e te ya tumu molweendo lwoku ka uvitha nenge ‘lwoku ka teya.’ (Mat. 9:35-38; 10:1, 5) Konima, Jesus okwa li a “hogolola yalwe omilongo heyali nokwe ya tetekelitha ooyaali nooyaali” ya ka longe wo iilonga mbyoka.—Luk. 10:1, 2, OB-1954.

² Kunena opu na wo ompumbwe onene yaauvithi yUukwaniilwa. Omwaalu gwaamboka ya li pEdhimbuluko momumvo gwiilonga 2009 ogwa li 18 168 323. Ogwa li gu vule pomwaalu aguhe gwOonzapo dhaJehova nomamiliyona ge vulithe po 10. Epya olya thika okutewa. (Joh. 4:34, 35) Onkee ano, otu na okugalikana nokupula tu pewe aalongi oyendji. Ihe ongiini tatu vulu okulonga metsokumwe neindilo lya tya ngaaka? Otatu vulu oku shi ninga mokuninga aakalele ya pyokoka sho tatu kutha ombinga nuulaadhi miilonga yokuuvitha Uukwaniilwa noyokuninga aantu aalongwa.—Mat. 28:19, 20; Mark. 13:10.

3. Ongiini ombepo yaKalunga hayi dhana onkandangala ya simana moku tu kwathela tu kale aakalele aanekeka?

³ Moshitopolwa sha tetekele otwa li twa kundathana nkene okuwilikwa kombepo yaKalunga taku tu kwathele tu kale hatu ‘popi nuulaadhi oohapu dhaKalunga.’ (Iil. 4:31) Ombepo ndjoka otayi vulu wo oku tu kwathela tu kale aakalele aanekeka. Omukalo gumwe gwoku tu kwathela okukala aanekeka muukalele wetu ogwo okulongitha nawa oshilongitho sha dhenga mbanda shoka Jehova Kalunga e tu pa, Oohapu dhe, Ombiimbeli. Oya nwethwa mo kombepo ondjapuki. (2 Tim. 3:16) Etumwalaka lyayo olya nwethwa mo kuKalunga. Onkee ano, ngele ohatu fatulula oshili yopamanyolo nuukeka muukalele wetu, otashi ulike kutya otatu wilikwa kombepo ondjapuki. Manga inaatu tala kutya ongiini tatu vulu oku shi ninga, natu dhiladhile kutya Oohapu ndhika odhi na oonkondo dhi thike peni.

‘Oohapu dhaKalunga odhi na oonkondo’

4. Etumwalaka lyaKalunga ndyoka tali adhika mOmbiimbeli otali vulu okweeta elunduluko lini momuntu?

⁴ Oohapu dhaKalunga nenge etumwalaka lye kali na tuu oonkondo! (Heb. 4:12) Meityo lyopathaneko, etumwalaka lyOmbiimbeli oli na omayego li vule egongamwele kehe ndyoka lya ningwa kaantu, oshoka pathaneko ohali ulula nokutopola omasipa nomongo. Oshili yopamanyolo ohayi adha sigo omeni lyomuntu nokuhita momaiyuvo nomomadhiladhilo ge e tayi holola puuyelele shoka e li momutima. Oshili ndjoka otayi vulu okugandja oonkondo nokulundulula lela omuntu. (Lesha Aakolossa 3:10.) Eeno, Oohapu dhaKalunga otadhi vulu okulundulula oonkalamwenyo dhaantu.

5. Omomikalo dhimwe dhini Ombiimbeli tayi vulu oku tu wilika, noshizemo otashi ka kala shini?

⁵ Natango, Ombiimbeli oyi li embo lyuunongo kaawu shi okuyelekwa nasha. Oyi na uuyelele tawu kwathele mboka tawu vulu okuulukila aantu nkene ye na okukala muuyuni mbuka wa kitakana. Oohapu dhaKalunga itadhi minikile owala oonkatu dhetu dhongashingeyi, ihe naandhoka wo dhomonakuyiwa. (Eps. 119:105) Oyi li ekwatho enene uuna tatu ungaunga nomaupyakadhi nenge tatu ningi omatokolo ge na ko nasha nokuhogolola ookuume, omainyanyudho, iilonga, omizalo nosho tuu. (Eps. 37:25; Omayel. 13:20; Joh. 15:14; 1 Tim. 2:9) Okutula miilonga omakotampango ngoka taga adhika mOohapu dhaKalunga ohaku shi ningi tashi wapa tu kale nayalwe nawa. (Mat. 7:12; Fil. 2:3, 4) Ngele otwe etha oohapu dhaKalunga dhi minikile mondjila yetu, otatu vulu okumona nkene omatokolo getu tage ke tu guma monakuyiwa. (1 Tim. 6:9) Omanyolo otaga hunganeke wo elalakano lyaKalunga lyonakuyiwa noku tu kwathela tu kale nonkalamwenyo ndjoka tayi endele pamwe nelalakano ndyoka. (Mat. 6:33; 1 Joh. 2:17, 18) Ngele omuntu okwe etha omakotampango gopakalunga ga wilike onkalamwenyo ye, ita ka tyapula tuu onkalamwenyo ombwanawa!

6. Ongiini Ombiimbeli yi li oshikondjitho shi na oonkondo miita yetu yopambepo?

⁶ Dhiladhila wo nkene Ombiimbeli yi li oshikondjitho shi na oonkondo miita yetu yopambepo. Paulus okwi ithana Oohapu dhaKalunga dhi li ‘egongamwele lyombepo.’ (Lesha Aaefeso 6:12, 17, OB-1954.) Ngele olya gandjwa nuukeka, etumwalaka lyOmbiimbeli otali vulu okumangulula aantu okuza muupika wopambepo waSatana. Egongamwele ndyoka otali hupitha oomwenyo peha lyoku dhi yonagula po. Mbela katu na okukambadhala oku li longitha nuukeka?

Longitha nawa Oohapu dhaKalunga

7. Omolwashike sha simana okwiilonga okulongitha nawa ‘egongamwele lyombepo’?

⁷ Omukwiita ota vulu okulongitha nawa iikondjitho ye miita owala ngele i idheula nokwiilonga oku yi longitha nawa. Osha faathana nokulongitha ‘egongamwele lyombepo’ miita yetu yopambepo. Paulus okwa nyola ta ti: “Kambadhala, u kale omulongihapu a hokiwa kuKalunga, ongaangoka inaa sa ohoni iilonga ye [e shi okulongitha nawa oohapu dhoshili, NW].”—2 Tim. 2:15.

8, 9. Mbela oshike tashi ke tu kwathela tu kale tu uvite ko shoka Ombiimbeli tayi ti? Gandja oshiholelwa.

⁸ Oshike tashi ke tu kwathela tu ‘longithe nawa oohapu dhoshili’ muukalele wetu? Manga inaatu uvithila yalwe shoka Ombiimbeli tayi ti, otwa pumbwa oku yi uva ko nawa tse yene. Shika otashi ti kutya otu na okugandja eitulomo koshitopolwa ashihe.

⁹ Opo tu uve ko nawa enyolo, otwa pumbwa tu tale komanyolo ga tetekele naangoka ga landula ko. Oohapu dhaPaulus ndhoka tadhi adhika mAagalati 5:13 odho oshiholelwa shaashoka. Okwa nyola a ti: “Ne aamwameme, omwi ithanwa, mu kale mwa manguluka. Ihe inamu etha, emanguluko ndika lyeni li ninge ompito yuuhalu wopantu, ihe yakulathaneni nohole.” Emanguluko lini Paulus a li ta popi mpaka? Mbela okwa li ta popi kombinga yokumanguluka ko kuulunde neso, okuupika womalongo giifundja nenge okushimwe shi ili? Oshitopolwa ashihe otashi ulike kutya Paulus okwa li ta popi emanguluko ndyoka li li oshizemo ‘shokumanguluka okuza methingo lyompango.’ (Gal. 3:13, 19-24; 4:1-5) Okwa li ta popi kombinga yemanguluko ndyoka ya li ye na molwaashoka ya kala ya landula Kristus. Mboka ya li ye na olupandu omolwemanguluko ndyoka, oya li ya yakulathana mohole. Mboka ya li kaaye na ohole oya li ya kala nokulumatathana nonokutamanana.—Gal. 5:15.

10. Opo tu uve ko nawa eityo lyOmanyolo, uuyelele wuni tu na okutala, nongiini tatu vulu oku wu mona?

¹⁰ Opo tu uve ko nawa eityo lyenyolo, otu na okutala wo kuuyelele wa gwedhwa po, ngaashi olye a nyola embo ndyoka lyOmbiimbeli nuunake nomonkalo ya tya ngiini lya li lya nyolwa. Otashi tu kwathele wo ngele tatu tseya elalakano kutya omolwashike embo ndyoka lya nyolwa nosho wo ngele tashi vulika tu tseye omikalo dhopethimbo ndyoka dhi na ko nasha nuulipamwe, uuyogoki wopamikalo nosho wo elongelokalunga.a

11. Oshike tu na okukala twa kotokela uuna tatu fatulula omanyolo?

¹¹ “Okulongitha nawa oohapu dhoshili” okwa kwatela mo oshindji kaashi shi owala okufatulula ooshili dhopamanyolo. Otu na okukala twa kotoka opo twaaha longithe Ombiimbeli mokutilitha aantu. Nonando otatu vulu okulongitha Omanyolo okupopila oshili, ngaashi Jesus a li a ningi sho a li ta makelwa kOndiaboli, katu na oku ga longitha okuthindila eitaalo lyetu maapulakeni yetu. (Deut. 6:16; 8:3; 10:20; Mat. 4:4, 7, 10) Otu na okupulakena kekumagidho lyomuyapostoli Petrus ndyoka tali ti: “Simanekeni Kristus momitima dheni ne mu mu ninge Omuwa gweni. Kaleni mwi ilongekidha aluhe okuyamukula kehe ngoka te mú pula okufatulula etegameno ndyoka li li mune.”—1 Pet. 3:15.

12, 13. “Omapopilongulu omanene” geni ngoka oshili yOohapu dhaKalunga tayi vulu okuhanagula po? Gandja oshiholelwa.

¹² Ngele otwa kala hatu longitha nawa oshili yOohapu dhaKalunga, otayi vulu okuninga shike? (Lesha 2 Aakorinto 10:4, 5.) Oshili yopamanyolo otayi vulu okuhanagula po “omapopilongulu omanene,” sha hala okutya, okuyaneka pomutenya omalongo giifundja, omikalo omiwinayi nomaufilosofi ngoka tagu ulike uunongo wopantu inaawu gwanenena. Otatu vulu okulongitha Ombiimbeli okukandula po omadhiladhilo kehe ngoka ge li ompinge nontseyo ‘yokutseya Kalunga.’ Omalongo gOmbiimbeli otaga vulu okulongithwa okukwathela yalwe ya lundulule omadhiladhilo gawo opo ga tse kumwe noshili.

¹³ Natu tale koshiholelwa shomukiintu gwoomvula 93 ngoka a kala muIndia. Okuza kuunona we okwa li a longwa i itaale kutya ngele omuntu a si, oha lundulukile molutu lulwe. Sho a tameke okukonakona Ombiimbeli okupitila mokunyolelathana nomwana ngoka a li a kala kombanda yomafuta, okwa li a taamba ko shoka a li ti ilongo kombinga yaJehova nosho wo omauvaneko ge. Ihe elongo kutya olutu ohalu lundulukile molutu lulwe olya li lya ya unene momadhiladhilo ge, nomolwaashoka okwa li a patana uuna omwana a li e mu nyolele kombinga yonkalo yoonakusa. Okwa li a ti: “Kandu uvite ko nando oshili yOmanyolo goye. Omalongelokalunga agehe ohaga longo kutya opu na oshinima shoka shi li meni lyetu ihaashi si. Onda kala aluhe ndi itaala kutya olutu ohalu si noshitopolwa shoka ihaashi si ohashi lundulukile momalutu galwe lwiikando niikando yi thike po 8 400  000. Ongiini shika tashi vulika shi kale kaashi shi shoshili? Mbela omalongelokalunga ogendji oga puka?” Mbela egongamwele lyombepo otali vulu ngaa okuhanagula po elongo ndyoka lya fa epopilongulu enene? Konima yoonkundathana dhopamanyolo dha gwedhwa po kombinga yoshinima shika, okwa li a nyola konima yiiwike yontumba ta ti: “Lwahugunina onda tameke okukala ndu uvite ko oshili yolela kombinga yeso. Ohandi kala nda nyanyukwa unene mokutseya kutya eyumuko sho tali ka ningwa, otatu vulu oku ka tsakanena noonakusa yetu aaholike. Ondi inekela kutya Uukwaniilwa waKalunga otawu ya mbala.”

Yi longitha mokutompa

14. Otashi ti shike okutompa aapulakeni yetu?

¹⁴ Okulongitha Ombiimbeli nuukeka muukalele itashi ti owala okutotha mo omanyolo. Paulus okwa kala ha popi ‘nokutompa,’ natse osho tu na okuninga. (Lesha Iilonga 19:8, 9; 28:23, OB-1954.) ‘Okutompa’ otashi ti “okwiitaalitha” omuntu. Ngoka a tompwa “okwi itaala oshinima shontumba nokwa tula einekelo lye musho.” Ngele tatu tompo omuntu opo a taambe ko elongo lyOmbiimbeli, ohatu mu itaalitha a tule einekelo lye melongo ndyoka. Opo tu pondole oku shi ninga, otwa pumbwa okutompa aapulakeni yetu kutya shoka tatu popi oshoshili. Otatu vulu oku shi ninga momikalo tadhi landula.

15. Ongiini to vulu okuukitha eitulomo kOmbiimbeli momukalo ngoka tagu yi simanekitha?

¹⁵ Ukitha eitulomo kOohapu dhaKalunga momukalo tagu dhi simanekitha. Ngele to ulukile omuntu enyolo, ukitha eitulomo lye kesimano lyokutseya kutya Kalunga ota dhiladhila ngiini shi na ko nasha noshinima shoka. Konima yokupula epulo nokumona eyamukulo komunegumbo, otashi vulika wa hala okutya sha ngaashi: ‘Natu tale kutya ongiini tatu vulu okumona etaloko lyaKalunga moshinima shika.’ Nenge otashi vulika wu pule: ‘Mbela Kalunga ota ti shike kombinga yonkalo ndjika?’ Ngele tatu yelithile omupulakeni enyolo momukalo gwa tya ngeyi, ohashi tsu omuthindo kutya Ombiimbeli oya za kuKalunga notashi mu kwathele a kale e yi simaneka. Osha simana okuninga ngeyi, unene tuu ngele tatu gandja uunzapo kugumwe ngoka i itaala muKalunga ihe ke shi shi kutya Ombiimbeli otayi ti shike.—Eps. 19:7-10.

16. Oshike tashi ke ku kwathela wu fatulule omanyolo nawa?

¹⁶ Ninga oshindji shi vulithe owala okulesha omanyolo, ihe dhi yelitha wo. Paulus okwa li e na omukalondjigilile ‘gwokufatululila aantu noku yu ulukila’ iinima mbyoka e ya longo. (Iil. 17:3) Enyolo lyOmbiimbeli olundji ohali kala li na edhiladhilo li vulithe pulimwe, notashi vulika wa pumbwa okutsa omuthindo owala limwe ndyoka lya pambathana naashoka tamu kundathana. Oto vulu oku shi ninga mokweendulula oohapu ndhoka tadhi gandja edhiladhilo nenge mokupula omapulo ngoka taga ka kwathela omunegumbo opo e dhi ndhindhilike. Opo nduno, fatulula eityo lyoshitopolwa shoka shenyolo. Konima yaashoka, kwathela omupulakeni a mone kutya enyolo olye mu guma ngiini paumwene.

17. Ongiini to vulu okutompathana okuza mOmanyolo momukalo ngoka tagu itaalitha?

¹⁷ Tompathana okuza mOmanyolo momukalo gu shi okwiitaalwa. Paulus okwa kala ‘nokutompa aantu okuza momanyolo’ mokulongitha oondunge nokwe shi ningi tashi zi komutima. (Iil. 17:2, 4) Ngaashi Paulus, kambadhala okwaadha omutima gwomupulakeni gwoye. ‘Teka mo’ shoka shi li momutima gwe mokulongitha omapulo gohenda ngoka tagu ulike kutya owu na ko nasha nomuntu ngoka. (Omayel. 20:5) Henuka okupopya momukalo ngoka tagu uvitha nayi omupulakeni. Gandja omatompelo momukalo gwa yela nogwopandunge. Omatompelo goye oge na okwaambidhidhwa kuuyelele washili. Naga kale ga kankamena kOohapu dhaKalunga. Oshihwepo okulongitha enyolo limwe nawa mokufatulula nokuyelitha edhiladhilo, shi vulithe okulesha omanyolo gaali nenge gatatu neendelelo. Okulongitha uuyelele washili otaku vulu wo ‘okwiindjipalitha elongo lyomilungu dhoye.’ (Omayel. 16:23, KB) Omathimbo gamwe, otashi vulika wa pumbwa okukonga uuyelele wa gwedhwa po. Omukiintu gwoomvula 93 ngoka a tumbulwa metetekelo okwa li a pumbwa okutseya kutya omolwashike elongo lyomwenyo ihaagu si lyi itaalwa apuhe. Opo a taambe ko shoka Ombiimbeli tayi ti moshinima shoka, okwa li a pumbwa okuuva ko kutya elongo ndyoka olya tamekela peni nongiini lye ya momalongelokalunga ogendji.b

Tsikila okulongitha Ombiimbeli nuukeka

18, 19. Omolwashike tu na okutsikila okulongitha ‘egongamwele lyombepo’ nuukeka?

¹⁸ Ombiimbeli otayi ti: ‘Olupe lwuuyuni mbuka otalu hulu po.’ Aakolokoshi otaya tsikile okunayipala. (1 Kor. 7:31, OB-1954; 2 Tim. 3:13) Onkee ano, osha simana tu tsikile okuhanagula po “omapopilongulu omanene” mokulongitha ‘egongamwele lyombepo, nokutya, ohapu yaKalunga.’

¹⁹ Inatu nyanyukwa tuu sho tu na oohapu dhaKalunga, Ombiimbeli, nokulongitha etumwalaka lyayo li na oonkondo okuvudha mo omalongo giifundja nokwaadha aanamitima dhu uka! Kapu na epopilongulu enene li na oonkondo li vule etumwalaka ndyoka. Onkee ano, natu ninge oonkambadhala dha mana mo okulongitha ‘egongamwele lyombepo’ miilonga yetu twe yi pewa kuKalunga yokuuvitha Uukwaniilwa.

[Omanyolo gopevi]

Owi ilonga shike?

• Oohapu dhaKalunga odhi na oonkondo dhi thike peni?

• Ongiini tatu vulu ‘okulongitha nawa oohapu dhoshili’?

• Etumwalaka lyOmbiimbeli otali vulu okuninga shike “omapopilongulu omanene”?

• Ongiini to vulu okuhwepopaleka okutompathana kwoye muukalele?

[Oshimpungu/Ethano pepandja 21]

Nkene to vulu okulongitha Oohapu dhaKalunga mokutompa

▪ Kwathela aantu ya simaneke Ombiimbeli

▪ Fatulula Omanyolo

▪ Tompa nokwiitaalitha opo wu vule okwaadha omutima

[Ethano pepandja 20]

Owu na okwiiIonga okulongitha ‘egongamwele lyombepo’ nuukeka