Mbela eho lyoye olyanathangwa?
1. Osha hala okutya shike okukala ‘neho lyanathangwa’?
1 Shoka omeho getu haga tala ohashi nwetha mo oonkatu dhetu. Oohapu dhaJesus ndhika kadhi li tuu mondjila: “[Ngele eho lyoye olyanathangwa, NW], nena olutu lwoye aluhe olu na uuyelele”! (Mat. 6:22) Uuna eho lyetu “olyanathangwa” pambepo, ohali kala lya gandja eitulomo kelalakano limwe, sha hala okutya kokulonga ehalo lyaKalunga. Ohatu pititha komeho Uukwaniilwa noihatu piyaganekwa kiinima kaayi na oshilonga nenge kiinima yopamaliko mbyoka hayi yi moshipala uukalele.
2. Oshike tashi vulu okugoyokitha etaloko lyetu, ihe oshike tashi ke tu kwathela?
2 Otwa pumbwa okwiikonakona: Etaloko lyetu lyaashoka twa pumbwa otali vulu okugoyokithwa kwaashoka hashi tseyithwa miikundaneki sho tayi tu lombwele shoka twa pumbwa nenge kwaashoka shi niwe kuyalwe. Manga inaatu lalakanena nenge inaatu landa oshinima shontumba shoka tashi ka pula ethimbo olindji, iimaliwa oyindji nenge oonkondo dhetu odhindji, otashi ka kala pandunge tu “yalule kutya otashi ka pula shi thike peni” mokwiipula tse yene tatu ti: ‘Mbela shika otashi ka hwepopaleka iilonga yandje yokulongela Jehova nenge otashi ke yi ya moshipala?’ (Luk. 14:28; Fil. 1:9-11) Oshi li wo pandunge tu kale hatu ipula ethimbo nethimbo ngele otatu vulu okuninga onkalamwenyo yetu yanathangwa opo tu ninge oshindji muukalele. — 2 Kor. 13:5; Ef. 5:10.
3. Oshike tatu ilongo komumwameme gumwe ngoka a li a ningi omalunduluko opo a kaleke onkalamwenyo ye yanathangwa?
3 Sho omumwameme gumwe a li a tameke okukokola ondjila, okwa hogolola a kaleke po iilonga ye yesiku lyu udha nonando iilonga yetatasiku otayi vulu oku mu pa oshimaliwa sha gwana okugwanitha po oompumbwe dhe. Konima okwa li a thiki pehulithodhiladhilo kutya: “Kapu na ngoka ta vulu okulongela aawa yaali. Onda li ndi na okweetha po okugwanitha po shoka nda hala nokulalakanena okugwanitha po shoka nda pumbwa. Onda li nda mono kutya iinima yopamaliko ohayi kulupa notandi ki ilolodha owala ngele te kambadhala oku yi lalakanena.” Oonkalo dhe odha li dhe mu pitike a ninge omalunduluko opo a kaleke onkalamwenyo ye yanathangwa nokulundulula iilonga, mbyoka tayi mu pitike a tsikile muukalele wuukokolindjila.
4. Omolwashike she endelela tu kaleke eho lyetu lyanathangwa ngashingeyi?
4 Molwaashoka ethimbo lyetu olye endelela osha simanenena tu kaleke eho lyetu lyanathangwa. Kehe esiku tali piti po ohali tu hedhitha popepi nehulilo lyuuyuni mbuka nosho wo netameko lyuuyuni uupe waKalunga. (1 Kor. 7:29, 31) Mokugandja eitulomo kiilonga yokuuvitha, otatu ihupitha tse yene nosho mboka taye tu pulakene. — 1 Tim. 4:16.