Omaukwanegumbo gopaKriste, “kaleni mwi ilongekidha”
“Kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.”—LUK. 12:40.
1, 2. Omolwashike tu na okukaleka momadhiladhilo elondodho lyaJesus ‘lyokukala twi ilongekidha’?
“UUNA Omuna gwOmuntu te ya meadhimo lyuukwaniilwa we” nokuyoolola ‘aantu mooyakwawo,’ ngoye nuukwanegumbo woye otamu ka ningilwa shike? (Mat. 25:31, 32) Molwaashoka shika otashi ka ningwa pethimbo ndyoka inaatu tegelela, inashi simanenena tuu tu kaleke momadhiladhilo elondodho lyaJesus ndyoka tali tu londodha tu ‘kale twi ilongekidha’!—Luk. 12:40.
2 Oshitopolwa sha tetekele osha li sha kundathana nkene oshilyo kehe shuukwanegumbo tashi vulu okukwathela uukwanegumbo awuhe wu kale wa tonata pambepo mokugwanitha po iinakugwanithwa yawo neitulomo. Natu kundathaneni omikalo dhilwe moka tatu vulu okwaambidhidha uukwanegumbo wetu wu hume komeho pambepo.
Kaleka eho lyoye “lyanathangwa”
3, 4. (a) Omaukwanegumbo gopaKriste oge na okukala ga kotokela shike? (b) Okukala neho “lyanathangwa” osha hala okutya shike?
3 Opo omaukwanegumbo ga kale gi ilongekidhila okuya kwaKristus, oge na okukala ga kotoka opo kaaga piyaganekwe momaipyakidhilo gago giinima yopambepo. Oga pumbwa okukala ga kotoka kaaga piyaganekwe pambepo. Molwaashoka iinima yopamaliko oyi li omwigo ngoka gwa yula omaukwanegumbo ogendji, tala kwaashoka Jesus a ti kombinga yokukaleka eho “lyanathangwa.” (NW) (Lesha Mateus 6:22, 23.) Ngaashi owala olamba hayi vulu okuminikila mondjila yetu nohayi tu kwathele tu vule okweenda itaatu ihata po, shoka hatu tala ‘nomeho ngoka ge li olamba yolutu’ pathaneko, otashi vulu oku tu kwathela kaatu punduke.—Mat. 6:22.
4 Opo eho lyo lyenelyene li mone ko nawa, oli na okukala tali longo nawa opo li kale tali mono ko nawa. Osha faathana neho lyolamba yolutu. Okukala tu na eho lyanathangwa lyopathaneko otashi ti kutya otu na okukala tu na elalakano limwe. Pehala lyokukala nonkalamwenyo ya kankamena kokukala nomaliko nokukala tatu ipula unene nokusila oshimpwiyu owala oompumbwe dhopalutu dhuukwanegumbo, ohatu kaleke eho lyetu kiinima yopambepo. (Mat. 6:33) Shika osha hala okutya otu na okukala twa gwana niiniwe yetu nokupititha komeho okulongela Kalunga monkalamwenyo yetu.—Heb. 13:5.
5. Ongiini omugundjuka gumwe a li u ulike kutya okwa kaleka “eho” lye kokulongela Kalunga?
5 Aanona ngele oya putudhwa ya kale neho lyanathangwa iizemo ihayi kala tuu iiwanawa! Tala koshiholelwa shokakadhona koomvula omulongo nasha kokuEtiopia. Oka li ka ningi nawa mosikola naasho ka mana osikola, oka li ka pewa iimaliwa yoku ka tsikila eilongo lyopombanda. Ihe molwaashoka oka li ka kaleke eho lyako kokulongela Jehova, oka li ka tindi iimaliwa mbyoka. Nziya konima yaashoka, oka li ka pewa iilonga mbyoka ya li tayi ke ka futa N$28 200 kehe komwedhi, oshimaliwa oshindji noonkondo moku shi yelekanitha naashoka hashi futwa aantu yomoshilongo shawo. Ihe okakadhona hoka oka li ka kaleke “eho” lyako kokukokola ondjila. Kaka li ka pumbwa oku ka pula aavali yako kutya naka taambe ko iilonga mbyono nenge hasho. Aavali yako oya li yi inyenge ngiini sho yu uvu shoka okamwanakadhona kawo ka ningi? Oya li ya nyanyukwa pamwe nako noya li yu uvite uuntsa.
6, 7. Otu na okukala twa ‘angala’ oshiponga shini?
6 Oohapu dhaJesus ndhoka dhi li muMateus 6:22, 23 otadhi londodha kombinga yolwiho nonando inashi popiwa kondandalunde. Jesus okwa popya kutya okukala neho li li nawa itashi ti okukala neho ‘kaali li nawa.’ ‘Eho kaali li nawa’ oli na olwiho. (Mat. 6:23) Jehova oha kala u uvite ngiini shi na ko nasha nokahalu nenge nolwiho? Ombiimbeli oya ti: ‘Mokati keni inamu uvika oluhondelo niilonga ya nyata yoludhi kehe nolwiho.’—Ef. 5:3.
7 Nonando olwiho oto vulu oku lu dhimbulula nawa muyalwe, kashi shi oshipu oku lu mona mungoye mwene. Onkee ano, oshi li pandunge okutula miilonga omayele gaJesus ngaka taga ti: “Angaleni ne mu ikotokele kombinga yuuhalu weliko.” (Luk. 12:15) Okuninga ngaaka ohaku pula twi ikonakone opo tu mone shoka shi li momitima dhetu. Omaukwanegumbo gopaKriste oge na okudhiladhila ga mana mo kombinga yethimbo nosho wo oshimaliwa shoka haga longitha momainyanyudho nomokwiikongela omaliko.
8. Ongiini tatu vulu okukala twa ‘angala’ uuna tashi ya pokulanda iinima yontumba?
8 Okulanda oshinima okwa kwatela mo oshindji kaashi shi owala ngele oto vulu oku shi landa nenge hasho. Kaleka momadhiladhilo omapulo ngaashi: ‘Mbela ondi na ngaa ethimbo lyokulongitha oshinima shoka nda hala pandjigilile noku shi sila oshimpwiyu? Otashi ka pula ndje ethimbo li thike peni opo ndi tseye oku shi longitha nawa?’ Ne aagundjuka, inamu itaala omatseyitho giipindi agehe ngoka taga ningwa muuyuni e tamu kala mwa hala okulanda oonguwo dhondilo nenge iinima yilwe. Omu na okukala mu na eipangelo. Dhiladhila wo kutya ngele owa landa oshinima shoka otashi ka piyaganeka ngiini uukwanegumbo weni sho tamu ilongekidhile okuya kwOmuna gwomuntu. Kala wu na eitaalo meuvaneko lyaJehova ndika tali ti: “Itandi ku etha nando; itandi ku thigi po.”—Heb. 13:5.
Ninga oonkambadhala wu adhe omalakano goye gopambepo
9. Uukwanegumbo otawu vulu okumona uuwanawa wuni ngele owi itulila po omalalakano gopambepo?
9 Omukalo gulwe moka iilyo yuukwanegumbo tayi vulu okunkondopaleka eitaalo lyawo nokuhumitha komeho uupambepo wuukwanegumbo awuhe ogwo okukala yi itulila po omalalakano gopambepo noku ga lalakanena. Okuninga ngaaka otaku vulu okukwathela omaukwanegumbo ga konakone kutya otaga vulu okuhuma komeho ngiini mokukala ya hokiwa kuJehova notaku vulu oku ya kwathela ya konakone kutya iinima yini yi na okukala ya simanenena monkalamwenyo yawo.—Lesha Aafilippi 1:10.
10, 11. Mu li uukwanegumbo, otamu lalakanene omalalakano geni, nomalalakano geni gomonakuyiwa mwa hala okwiitulila po?
10 Nokuli nokwiitulila po omalalakano omashona ngoka taga vulu okugwanithwa po koshilyo kehe shuukwanegumbo otaku vulu oku ye etela uuwanawa. Pashiholelwa, tala kelalakano lyokukonakona enyolo lyesiku, kehe esiku. Omatyokosha ngoka taga ningwa kiilyo yuukwanegumbo otaga vulu okukwathela omutse gwuukwanegumbo gu mone kutya oyi hole Jehova shi thike peni. Okulesha pamwe Ombiimbeli kehe esiku mu li uukwanegumbo ohaku gandja ompito ombwanawa kaanona ya hwepopaleke owino yawo yokulesha noyokuuva ko Ombiimbeli. (Eps. 1:1, 2) Mbela katu na okukala twa hala tu shi ninge oshilalakanenwa shetu tu ga hwepopaleke? Okukokeka uukwatya woshiimati shombepo otaku vulu wo okukala elalakano ewanawa noonkondo. (Gal. 5:22, 23) Ongiini mbela kombinga yokukonga omikalo tu ulukile aantu mboka hatu tsakaneke muukalele kutya otu na ko nasha nayo? Okukambadhala okuninga ngaaka mu li uukwanegumbo otaku vulu okukwathela aanona yi ilonge ya kale ye na ohenda, notaye ki inyengithwa ya kokeke ehalo lyokukala ya hala okuninga aakokolindjila nenge aatumwa.
11 Omolwashike itoo tala kutya omalalakano galwe geni ngoka ngoye nuukwanegumbo woye tamu vulu okulalakanena? Mbela uukwanegumbo woye itawu vulu okwiitulila po elalakano lyokulonga ethimbo ele muukalele? Mbela ito vulu wu ninge oonkambadhala wu sinde uumbanda wokuuvitha okupitila mongodhi, mepandaanda nenge pomalandithilo? Ongiini kombinga yokulonga mpoka pu na ompumbwe onene yaauvithi yUukwaniilwa? Mbela uukwanegumbo itawu vulu okwiilonga elaka epe opo wu uvithile yalwe yokiilongo yilwe onkundana ombwanawa?
12. Omitse dhomaukwanegumbo otadhi vulu okuninga shike opo dhi kwathele omaukwanegumbo gadho ga koke pambepo?
12 Wu li omutse gwuukwanegumbo, tala kutya openi uukwanegumbo woye wa pumbwa okuninga ehumokoho lyopambepo. Itulila po nduno omalalakano gokondandalunde gokwaadha elalakano ndyoka. Omalalakano ngoka hamu itulile po mu li uukwanegumbo oge na okukala ge li pandjele shi ikwatelela koonkalo nokokuvula kweni. (Omayel. 13:12) Dhoshili, okulonga opo wu adhe omalalakano taga ti sha otashi kutha ethimbo. Onkee ano, longitha ethimbo ndyoka ho longitha mokutala o-TV mokulalakanena iinima yopambepo. (Ef. 5:15, 16) Longa nuudhiginini opo wu adhe omalalakano ngoka wa tulila po uukwanegumbo woye. (Gal. 6:9) Uukwanegumbo mboka hawu lalakanene iinima yopambepo otawu ka ningitha okuhuma komeho kwawo “ku monike kwaayehe.”—1 Tim. 4:15.
Kaleni mwa dhiginina Ekonakono lyUukwanegumbo lyokongulohi
13. Elunduluko lini lya li lya ningwa melandululathano lyokugongalo kwokoshiwike kwegongalo, nomapulo geni tu na okwiipula?
13 Oshinima sha dhenga mbanda shokukwathela omaukwanegumbo ga kale ‘gi ilongekidhila’ okuya kwOmuna gwomuntu osho elunduluko enene ndyoka lya li lya ningwa shi na ko nasha nokugongala kwokoshiwike hoka kwa li kwa ningwa okutameka me 1 Januali 2009. Okugongala mesiku lyi ili hoka kwa li haku ithwanwa Ekonakonombiimbeli lyEgongalo okwa li kwa kuthwa po e taku tulwa mumwe nOsikola yUukalele woPauteokratika nosho wo nOkugongala kwoPailonga. Elunduluko ndika olya li lya ningwa opo omaukwanegumbo gopaKriste ga mone ompito yokukoleka uupambepo wawo mokukala ye na ongulohi yokondandalunde ongulohi kehe okuninga ekonakono lyokongulohi lyuukwanegumbo. Molwaashoka ngashingeyi opwa pita ethimbo okuza sho elongekidho ndyoka lya ningwa, otatu vulu okwiipula omapulo ngaka: ‘Mbela otandi longitha ngaa ethimbo ndyoka nda pewa mokukala ndi na Ekonakono lyUukwanegumbo lyokongulohi nenge mokukala ndi na ekonakono lyandje lyopaumwene? Mbela onda vula ngaa okugwanitha po elalakano lyelongekidho ndyoka?’
14. (a) Elalakano lya simanenena lyEkonakono lyUukwanegumbo lyokongulohi nenge lyekonakono lyopaumwene olya shike? (b) Omolwashike okwiitulila po ongulohi yokukonakona kwa simanenena?
14 Elalakano lya simanenena lyEkonakono lyUukwanegumbo lyokongulohi nenge lyekonakono lyopaumwene olyo okuhedha popepi naKalunga. (Jak. 4:8) Uuna tatu longitha ethimbo mokukonakona Ombiimbeli pandjigilile nokukala tu na ontseyo oyindji kombinga yOmushiti, ekwatathano lyetu naye ohali nkondopalekwa. Shi thike ngaa pokuhedha kwetu popepi naJehova opo ngaa tapu ka kala pu thike okukala tu mu hole ‘nomutima gwetu aguhe nomwenyo gwetu aguhe nomadhiladhilo getu agehe nonoonkondo dhetu adhihe.’ (Mark. 12:30) Dhoshili, otwa halelela okuvulika kuKalunga nokukala aaholeli ye. (Ef. 5:1) Okukala nEkonakono lyUukwanegumbo lyokongulohi pandjigilile okwa simanenena opo ku kwathele iilyo yuukwanegumbo wetu ayihe yi ‘kale yi ilongekidha’ pambepo sho tatu tegelele “uudhigu uunene” mboka wa hunganekwa. (Mat. 24:21) Ekonakono lyUukwanegumbo olya simanenena opo uukwanegumbo wu ka hupe.
15. Ekonakono lyUukwanegumbo lyokongulohi otali vulu okuningitha iilyo yuukwanegumbo yi kale yi uvitilathane ngiini?
15 Elongekidho lyEkonakono lyUukwanegumbo oli na wo elalakano lilwe lyokukwathela iilyo yuukwanegumbo yi kale yi na ekwatathano ewanawa. Okukala hamu kundathana pamwe iinima yopambepo kehe oshiwike otaku ka guma noonkondo etaloko lyoshilyo shuukwanegumbo kehe li na ko nasha nankene hashi tala ko iilyo iikwawo yuukwanegumbo. Aaihokani ihaya kala tuu yu uvite ye na ekwatathano lya kola uuna taya lombwelathana iinima yopambepo yomuule mbyoka yi ilonga pamwe mOmbiimbeli! (Lesha Omuuvithi 4:12.) Aavali naanona mboka haya longele Kalunga pamwe ohaya ka kala ya hangana mohole ndjoka yi li “epaya tali vulu okumangela iinima ayihe kumwe.”—Kol. 3:14.
16. Hokolola nkene aamwameme yatatu taya mono uuwanawa mekonakono lyawo lyOmbiimbeli lyokongulohi ndyoka yi itulila po.
16 Tala nkene aamwameme yatatu ya mona uuwanawa melongekidho lyokwiitulila po ongulohi yokukonakona Ombiimbeli. Nonando inaya pambathana, aamwameme aaselekadhi aakokele mbaka oya kala moshilando shimwe noya kala ookuume uule woomvula odhindji. Molwaashono oya li ya hala okukala haye endathana olundji nopethimbo olyo tuu ndyoka oya hala okukala taya tungathana pambepo pehala lyokukala owala ookuume miinima yilwe, oya tokola okwiitulila po ongulohi opo ya kale haya tsakanene ya konakone Ombiimbeli. Oya tameke oku shi ninga taya longitha embo ‘Yandja oundombwedi nawanawa’ kombinga yOuhamba waKalunga. Omumwameme gumwe gwomuyo okwa ti: “Ohatu nyanyukilwa ethimbo lyetu noonkondo naashoka ohashi ningitha ekonakono lyetu li kwate uule wethimbo li vulithe powili yimwe. Ohatu kambadhala tu kale twa fa tu wete oonkalo moka mwa li aamwatate yomethelemumvo lyotango nokukundathana shoka tatu ka ninga po uuna twi iyadha tu li moonkalo dha fa ndhoka. Opo nduno ohatu kambadhala okulongitha muukalele iinima mbyoka twi ilonga mekonakono lyetu. Shika osha ningitha iilonga yetu yUukwaniilwa yokuuvitha noyokuninga aantu aalongwa yi kale tayi hokitha notayi pondola shi vulithe nale.” Kakele kokukoleka uupambepo wawo, elongekidho ndika olya ningitha nokuli ookuume mbaka yatatu ya kale ye na ekwatathano lyopothingo. Oya ti: “Ohatu nyanyukilwa elongekidho ndika.”
17. Iinima yini hayi ningitha wo Ekonakono lyUukwanegumbo lyokongulohi li kale tali pondola?
17 Ongiini kombinga yoye? Uuwanawa wuni ho mono mekonakono lyuukwanegumbo lyokongulohi nenge mekonakono lyopaumwene ndyoka wi itulila po? Ngele ohali ningwa omalupita, ito ka mona mo uuwanawa mboka lya nuninwa. Oshilyo kehe shuukwanegumbo oshi na okukala shi ilongekidha okukonakona pethimbo ndyoka lya tulwa po. Omaipyakidhilo gamwe ngoka kaage na unene oshilonga kage na okuya moshipala ongulohi ndjoka. Kakele kaashono, uuyelele mboka tamu konakona owu na okukala tawu ningitha ekonakono lyeni li kale tali longo muukwanegumbo woye. Oshike to vulu okuninga opo ekonakono ndyoka li kale tali nyanyudha? Li ninga momukalo tagu longo lela, noku li kaleka mombepo yesimaneko noyombili.—Jak. 3:18.a
‘Kaleni mwa tonata’ nomwi “ilongekidha”
18, 19. Okukala wu shi kutya okuya kwOmuna gwomuntu oku li popepi oku na oku ku guma ngiini nosho wo uukwanegumbo woye?
18 Oonkalo dhuuyuni ndhoka tadhi ende tadhi nayipala noonkondo otadhi ulike thiluthilu kutya omasiku gahugunina gonkalelo yaSatana yuukolokoshi oga tameka okuza mo 1914. Armagedon oku li popepi noonkondo. Masiku Omuna gwomuntu ote ke ya opo a gwanithe po epangulo lyaJehova lyokupangula aakeenakonashanakalunga. (Eps. 37:10; Omayel. 2:21, 22) Mbela okukala mu na ontseyo ya tya ngaaka kaku na oku mu kaleka mwa tonata?
19 Mbela oto tula ngaa miilonga omayele gaJesus ngoka taga popi kutya owu na okukaleka eho lyoye “lyanathangwa”? Manga aantu yomuuyuni mbuka taya lalakanene uuyamba, esimano noonkondo, mbela uukwanegumbo woye otawu lalakanene ngaa iinima yopambepo? Mbela elongekidho lyEkonakono lyUukwanegumbo lyokongulohi nenge ekonakono lyopaumwene otali longo ngaa kungoye? Mbela oto mono ngaa uuwanawa mwaashoka lya nuninwa? Ngaashi sha li sha kundathanwa moshitopolwa sha tetekele, mbela oto gwanitha po ngaa oshinakugwanithwa shoye shopamanyolo wu li omusamane, omukulukadhi nenge okanona opo wu kwathele uukwanegumbo awuhe wu ‘kale wa tonata’? (1 Tes. 5:6) Ngele osho, oto ka kala ‘wi ilongekidhila’ okuya kwOmuna gwomuntu.
[Enyolo lyopevi]
a Opo wu mone uuyelele waashoka tamu vulu okukonakona nonkene to vulu okuninga Ekonakono lyUukwanegumbo lyokongulohi li kale tali ti sha notali nyanyudha, tala Oshungonangelo yo 1 Kotoba 2009, epandja 29-31.
Owi ilonga shike?
• Yelitha nkene omaukwanegumbo gopaKriste taga vulu okukala ‘gi ilongekidha’ mokukala . . .
ge na eho “lyanathangwa.”
gi itulila po omalalakano gopambepo noku ga lalakanena.
ge na Ekonakono lyUukwanegumbo lyokongulohi ihaali faula.
[Ethano pepandja 13]
Eho “lyanathangwa” otali ke tu inyengitha kaatu piyaganekwe kiinima yomuuyuni