Ekonakono lyuukwanegumbo olya simanenena opo wu ka hupe

“IITA mesiku enene lyaKalunga omunankondo” itayi ka kala tuu iitilithi! (Eh. 16:14) Omupolofeti Mika okwa nyola oohapu dhopathaneko dha tsa a ti: “Oondundu otadhi hemuka dha fa ezi momulilo; otadhi ka kungulukila momasilu, ngaashi omeya taga kunguluka kondundu.” (Mika 1:4) Mboka ihaaya longele Jehova otaya ka adhika koshiponga shashike? Oohapu dhaKalunga otadhi ti: “Omidhimba dhaantu mboka ya dhipagwa kOMUWA, otadhi ka langathana okuza kooha dhuuyuni sigo okooha oonkwawo.”—Jer. 25:33.

Omolwelondodho ndyoka, omitse dhomaukwanegumbo naavali mboka taya putudha oyana oyo awike oye na okwiipula kombinga yoyana mboka ya koka taya ti: ‘Mbela aamwandje otaya ka hupa ngaa?’ Ombiimbeli otayi shilipaleke kutya mboka ya koka otaya ka hupa owala ngele oya kala ya tonata noya kola pambepo.—Mat. 24:21.

Osha simana okutula po ethimbo lyekonakono lyuukwanegumbo

Aavali, shilipalekeni kutya omwa ninga ngaashi tamu vulu opo oyana yeni mu ‘ya putudhile mevuliko nomekumagidho lyOmuwa.’ (Ef. 6:4, OB-1954) Osha simanenena wu konakone Ombiimbeli naamwoye. Otwa hala aagundjuka yetu ya kale ya fa Aakriste yomuFilippi mboka Paulus a li a pandula omolwehalo lyawo okuvulika kuJehova. Okwa nyola a ti: “Aaholike yandje, ngashika mwa kala hamu vulika aluhe kungame, manga nda li pune, vulikeni wo ngashingeyi, sho ndaa po we pune. Kaleni tamu longo nokutila nokukakama molwehupitho lyeni.”—Fil. 2:12.

Aamwoye ohaya vulika ngaa koompango dhaJehova uuna kuu po? Ongiini ngele ye li kosikola? Ongiini to vulu okukwathela aamwoye ya kale ye na uushili kutya iipango yaJehova oyi li mondjila nokuli nuuna ye li oyo ayeke?

Ekonakono lyuukwanegumbo otali vulu okukwathela aamwoye ya kale neitaalo lya kola ethimbo alihe. Ngashingeyi otatu ka tala iinima itatu mbyoka tayi kwathele ekonakono lyeni li pondole.

Nali kale hali ningwa aluhe

Melaka lyOmbiimbeli lyopetameko uutumbulilo “esiku limwe” mboka wu li muJob 1:6 otawu ulike kutya aamati yaKalunga aayengeli ohaye ya koshipala she pomathimbo gu uthwa. Ninga ngaaka naamwoye. Tula po esiku nethimbo ndyoka li na okudhigininwa lyEkonakono lyuukwanegumbo lyokongulohi. Tula po wo esiku lilwe moka tamu vulu oku li ninga ngele omwi imbwa kusha mu li ninge mesiku ndyoka mwa tula po.

Inamu kala nondjigilile yokufaula ekonakono ndika. Dhimbulukwa kutya aakonakonimbiimbeli yoye ya simana aamwoye. Ihe Satana okwa hala e ya ninge iihakanwa ye. (1 Pet. 5:8) Ngele omwa faula Ekonakono lyuukwanegumbo lyokongulohi ndyoka lya simana opo mu tale o-TV nenge mu ninge iinima yimwe yuuyuni, nena omwe etha Satana a sindane.—Ef. 5:15, 16; 6:12; Fil. 1:10.

Kwatela mo iinima yonkalamwenyo yakehe siku

Ekonakono lyuukwanegumbo lyokongulohi kali lile po owala okwiilonga iinima iipe. Kambadhala wu kwatele mo iinima yonkalamwenyo yakehe siku. Ngiini mbela? Omathimbo gamwe kundathaneni iinima mbyoka tayi ka adha aamwoye momasiku nenge miiwike yi li komeho. Pashiholelwa, mbela ito vulu okukwatela mo omaidheulo kombinga yaashoka tamu ka tya muukalele? Aagundjuka ohaya nyanyukilwa okukutha ombinga miinima mbyoka haya ningi nawa. Ngele ohayi idheula shoka taya ka tya momapya nokudhiladhila nkene ye na okuungaunga nomapataneko otaya ka kala aalaadhi miilonga kehe yokuuvitha Uukwaniilwa.—2 Tim. 2:15.

Oto vulu wo okudheula aamwoye nkene ye na okuungaunga nomathininiko goomakula. Ontopolwa 15 yembo Questions Young People Ask—Answers That Work, embo 2, otayi vulu okulongithwa okutameka oonkundathana dhuukwanegumbo.a

Oshimpungu pepandja 132 no 133 oshi na omaetopo notashi kwathele aamwoye ya kale hayi ilongekidha omayamukulo ngoka ye wete ge li nawa. Elombwelo ndyoka li li pevi pepandja 133 otali ladhipike aagundjuka tali ti: “Ulukila omuvali nenge kuume omwiinekelwa nkene to ka yamukula.” Mbela ito vulu okukwatela mo omauliko ngoka mEkonakono lyuukwanegumbo lyeni lyokongulohi omathimbo nomathimbo?

Ekonakono lyuukwanegumbo ohali pe aavali ompito ya thindile moyana esimano lyokwiitulila po omalalakano gopambepo. Young People Ask, embo 2, oli na uuyelele uuwanawa montopolwa 38, ndjoka tayi kundathana kombinga yaashoka aagundjuka taya ka ninga nonkalamwenyo yawo. Sho tamu kundathana ontopolwa ndjoka, ya kwathela ya mone kutya oshinima dhingi okuninga monkalamwenyo yawo osho okulongela Jehova. Kokeka momitima dhaamwoye ehalo lyuukokolindjila, iilonga yaBetel, okuya kOsikola yOkudheula mUukalele nenge ya lalakanene iilonga yilwe yethimbo lyu udha.

Aavali yamwe ohaya ningi epuko mokuukitha unene eitulomo kwaashoka ya hala oyana ya pondole, pehala lyokupandula shoka ya pondola nale. Oshi li nawa lela wu ladhipike aamwoye yi itulile po omalalakano omawanawa ngaashi oku ka longa kObetel niilonga yuutumwa. Ihe ngele to shi ningi, takamitha waaha hinde omumwoye nenge wu mu teye omukumo. (Kol. 3:21) Dhimbulukwa kutya omumwoye oku na okukala e hole Jehova nomutima gwe aguhe, ihe hamolwaashoka wa hala a kale e mu hole. (Mat. 22:37) Kala ho pandula aamwoye mpoka ya longa nawa, pehala lyokukala to komangele owala shoka inaa ninga. Ya kwathela ya kale nolupandu lwaashoka Jehova a ninga, opo omitima dhawo dhi inyengithwe kuuwanawa we.

Nali kale tali nyanyudha

Oshinima oshititatu sha simanenena opo Ekonakono lyuukwanegumbo lyokongulohi li pondole osho kutya nali kale tali nyanyudha. Owu na oku shi enda ngiini? Otamu vulu okupulakena kuungalo wiinyandwa nenge mu tale uuvidio wOonzapo dhaJehova nokukundathana kombinga yawo. Nenge mu leshe Ombiimbeli, noshilyo kehe shuukwanegumbo nashi kale ngomuntu gwontumba montopolwa ndjoka tamu lesha.

MOshungolangelo noAwake! ohamu kala iitopolwa iiwanawa tayi popi kombinga yuukwanegumbo. Pashiholelwa, oto vulu okulongitha oshitopolwa “How Would You Answer?” moAwake! pepandja 31. MOshungolangelo kehe yOshiingilisa ndjoka hatu gandja muukalele, ohamu kala oshitopolwa “For Our Young People.” Omathimbo gamwe ohamu kala oshitopolwa shi na oshipalanyolo “Longa aanona yoye” shoka sha nuninwa aanona.

Iitopolwa yomoAwake! yi na oshipalanyolo “Young People Ask” noyomembo 2, Young People Ask, otayi opalele aavali mboka oyana ye li methimbo lyokamukondapweyu. Uuna to longitha Young People Ask, embo 2, tala wo oshimpungu “What Do You Think?” pehulilo lyontopolwa. Oshimpungu shoka oshi na oshindji. Uukwanegumbo otawu vulu okukundathana omapulo ngoka ge li moshimpungu.

Ihe aavali oye na okukala ya kotoka opo kaya lundululile ekonakono lyuukwanegumbo mokupula oyana okanaku. Pashiholelwa, ino thiminika omumwoye a leshe mokule shoka a nyola pomapandja mpoka pu na oshipalanyolo “My Journal” nenge pomahala galwe membo. Pepandja 3 embo ndyoka otali ti: “Opo oyana yeni mboka ye li methimbo lyokamukondapweyu ya nyole momambo gawo ya manguluka, ino ya thiminika ye mu ulukile shoka ya nyola. Konima yethimbo otashi vulika ya ka kale ya manguluka oku shi mu ulukila.”

Ngele ohamu ningi aluhe ekonakono lyeni nokukwatela mo iinima yonkalamwenyo yakehe siku noku li ninga linyanyudha, Jehova ote ke mu yambeka. Elongekidho ndika lyi ikalekelwa otali ka kwathela uukwanegumbo wu kale wa tonata nowa kola pambepo.

[Enyolo lyopevi]

[Oshimpungu pepandja on page 31]

Nali kale tali shambula

“Uuna twa mana ekonakono lyuukwanegumbo nuukadhona wetu, ngame nomusamane gwandje ohatu kundathana iitopolwa yokugongala mbyoka tu na okwiilongekidha omanga aanona yetu taya thaneke kombinga yaashoka twi ilonga mekonakono. Omathimbo gamwe, ohatu yelekele iiningwanima yomOmbiimbeli nenge tu idheule shoka tatu ka tya miilonga yomomapya. Ohatu ningi ekonakono lyi ikolelela koomvula dhawo, li hokitha, tali tungu notali nyanyudha.“—J. M. gwokuAmerika osho a ti.

“Opo ndi kwathele omumati gwomukonakonimbiimbeli gwandje a mone nkene ondhinga yembo ya li hayi longithwa pethimbo lyOmbiimbeli, otwa ningi ookopi dhembo lyaJesaja moka twa dhima mo oontopolwa noovelise. Otwa tula kumwe omapandja ngoka nokutula uuti ketameko nokehulilo. Opo ihe omumati okwa tameke okuninga ngaashi Jesus a li a ningi mosinagoga muNasaret. Ehokololo muLukas 4:16-21 otali ti kutya Jesus okwa “gonyununa ongonga [yaJesaja], okwi itsu” oohapu ndhoka a li a hala. (Jes. 61:1, 2) Ihe osha li oshidhigu komumati ngoka okumona Jesaja 61 mokulongitha ondhinga yembo ndyoka kali na oontopolwa noovelise. Omumati okwa li a kuminwa uunkulungu waJesus okulongitha ondhinga e ta ti: ‘Jesus ka li tuu omukumithi!’”—Y.T. gwokuJapani osho a ti.

[Ethano pepandja 30]

Kwathela aamwoye ya vule okuungaunga nomashongo okuza koomakula

[Ethano pepandja 31]

Kambadhala wu ninge Ekonakono lyuukwanegumbo lyokongulohi li kale tali nyanyudha