Ekwatho komaukwanegumbo
1. Uuwanawa wuni omaukwanegumbo muIsraeli ga li ga mono mEsabati oshiwike kehe?
1 Okudhimbulukwa esiku lyEsabati osha li esiloshimpwiyu lyopahole ndyoka Jehova a li a tulila po omaukwanegumbo. Mesiku ndyoka Aaisraeli oya li haya vululukwa po kiilonga yawo noya li haya tedhatedha kuuwanawa mboka Jehova e ya ningila nosho wo kombinga yekwatathano ndyoka ye na naye. Aavali oya li taya vulu okulongitha ompito ndjoka ya thindile Ompango momitima dhoyana. (Deut. 6:6, 7) Esabati olya li esiku moka Aaisraeli haya gandja eitulomo kiinima yopambepo oshiwike kehe.
2. Esabati otali tu longo shike kombinga yaJehova?
2 Otu shi shi kutya Jehova ina tegelela we omaukwanegumbo ga dhimbulukwe esiku lyEsabati. Ihe elongekidho ndyoka, otali tu longo sha kombinga yaKalunga ketu kutya oku na ko nasha aluhe nuupambepo waapiya ye. (Jes. 48:17, 18) Okwa tula po elongekidho lyEkonakono lyUukwanegumbo opo u ulike kutya oku tu hole.
3. Elalakano lyEkonakono lyUukwanegumbo olyashike?
3 Elalakano lyEkonakono lyUukwanegumbo olyashike? MuJanuali 2009, Ekonakonombiimbeli lyEgongalo olya tameke okukala hali ningwa mesiku limwe nOsikola yUukalele woPauteokratika nOkugongala kwoPailonga. Elunduluko ndika olya ningwa opo omaukwanegumbo ga koleke ekwatathano lyago naJehova mokwiitulila po esiku limwe moshiwike ga ninge ekonakono lyuukwanegumbo. Uukwanegumbo kehe owa li wa ladhipikwa opo wu longithe esiku ndyoka lya li nale lyekonakono lyembo ngele otashi vulika, opo wu kundathane nethimbo kombinga yOmbiimbeli nosho wo okukonakona iinima mbyoka ya nuninwa oku wu kwathela.
4. Mbela Ekonakono lyUukwanegumbo oli na owala okuningwa owili yimwe? Shi yelitha.
4 Nale, opo tu kale pEkonakono lyEmbo lyEgongalo otwa li hatu pumbwa ethimbo lyokuzala, okweenda nosho tuu. Osha li hashi pula oyendji yomutse oowili dhontumba opo tu kale pokugongala hoka kwa li haku ningwa owala owili yimwe. Ihe ngashingeyi sho pu na elunduluko otatu vulu okulongitha esiku ndyoka tu longele Jehova tatu konakona Oohapu dhe tu li uukwanegumbo. Ekonakono ndyoka ka li na owala okukala owili yimwe. Pehala lyaashono, otu na okukaleka oompumbwe nomangambeko guukwanegumbo wetu momadhiladhilo, sho tatu tokola kutya ethimbo li thike peni tatu ka longitha.
5. Mbela uukwanegumbo owu na owala okulesha wu li pamwe ethimbo alihe? Shi yelitha.
5 Mbela omaukwanegumbo oge na owala okulesha ge li pamwe ethimbo alihe? Aaihokani nomaukwanegumbo moka mu na aanona ohaya ladhipikathana uuna taya kundathana kombinga yOmbiimbeli. (Rom. 1:12) Oshinima shoka ohashi koleke ekwatathano lyawo. Onkee ano, oonkundathana dhopaMbiimbeli odho nadhi kale tadhi dhana onkandangala mEkonakono lyUukwanegumbo. Ihe oshilyo kehe shuukwanegumbo otashi vulu wo okulongitha ethimbo ndyoka tashi konakona paumwene. Pashiholelwa, konima ngele mwa lesha mu li pamwe, uukwanegumbo otawu vulu okukala pamwe natango, ihe kehe gumwe ota konakona paumwene, tashi vulika ti ilongekidhile okugongala nenge ta lesha iifo. Omaukwanegumbo gamwe ihaga tala o-TV esiku ndyoka.
6. Ekonakono lyUukwanegumbo otali vulu okuningwa ngiini?
6 Nkene Ekonakono tali vulu okuningwa: Ekonakono lyUukwanegumbo kali na owala okuningwa momukalo gwomapulo nomayamukulo. Opo li kale lya mwenyopala notali hokitha, omaukwanegumbo ogendji ohage li ningi ngaashi hatu ningi okugongala kwetu. Ohaya kundathana iitopolwa yi ili noyi ili momikalo dha yoolokathana. Pashiholelwa, otashi vulika ya leshe Ombiimbeli pamwe e tayi ilongekidhile oshitopolwa shokugongala nokwiidheula nkene taye ke shi enditha muukalele. Pepandja eti-6 opu na omaetopo gwontumba.
7. Aavali oye na okukambadhala opo Ekonakono li ningwe monkalo yini?
7 Monkalo moka aavali ye na oku li ninga: Iilyo yuukwanegumbo otayi ki ilonga oshindji uuna ekonakono tali ningwa pahole nomomukalo gwa manguluka. Ethimbo limwe otamu vulu oku li ningila pondje ngele onkaloyombepo otayi shi pitike. Otamu vulu okufudha po kashona ngele omu wete sha pumbiwa. Omaukwanegumbo gamwe ohaga kala ga longekidha uunima wokwiitalaleka pomunino nowokulya ngele ga mana. Ethimbo lyEkonakono kali shi ompito yaavali ya gande nenge ya nyenyetele oyana, ihe nonando ongaaka, otashi vulika ya popye kombinga yeihumbato ewinayi nenge yuupyakadhi wontumba mboka ya ndhindhilika. Opo waaha sithe okanona ohoni komeho guukwawo, oshi li nawa ngele to kundathana nako iinima yako yopaumwene mu li one amuke. Ekonakono lyUukwanegumbo kali na okukala tali sitha uunye nokuyemateka, ihe oli na okuulika kutya otatu longele Kalunga kelago ye omunyanyukwi. — 1 Tim. 1:11, KB.
8, 9. Omitse dhomaukwanegumbo odhi na okwiilongekidha ngiini?
8 Nkene omutse gwegumbo gu na okwiilongekidha: Uukwanegumbo otawu ka mona uuwanawa oundji mekonakono ngele omutse gwegumbo ohagu ilongekidha komeho yethimbo shoka tashi ka kundathanwa nonkene tashi ka ningwa. (Omayel. 21:5) Omusamane ota vulu okupula omukulukadhi gwe kombinga yaashoka. (Omayel. 15:22) Omathimbo gamwe omitse dhomaukwanegumbo otadhi vulu wo okupula aanona yawo shoka ya hala okukundathana. Ngele omwe shi ningi, otamu ka tseya shoka oyana yeni ye hole nohayi ipula nasho.
9 Omutse gwuukwanegumbo kagu na okulongitha ethimbo olindji moshiwike kehe okwiilongekidhila ekonakono ndyoka. Inashi pumbiwa opo omutse gwuukwanegumbo gu kale hagu ningi elandulathano epe oshiwike kehe, molwaashoka otashi vulika uukwanegumbo wu na nale elandulathano lyaashoka hawu ningi. Konima yekonakono kehe, oshi li nawa ngele omutse gwuukwanegumbo tagu ilongekidhile ekonakono tali landula omanga natango e na oompumbwe dhuukwanegumbo we momadhiladhilo. Omitse dhomaukwanegumbo dhimwe ohadhi nyola shoka tadhi ka kundathana e tadhi tula omusholondondo pehala mpoka uukwanegumbo tawu vulu oku gu mona nuupu, ngaashi kokila. Shika ohashi kwathele uukwanegumbo wi ilongekidhe nohawu kala wa halelela ethimbo ndyoka li thike.
10. Ongiini mboka ye li oyo ayeke taya vulu okuninga ekonakono lyawo?
10 Ongiini ngele kandi na uukwanegumbo? Mboka ye li oyo ayeke oye na okukonakona paumwene. Otaya vulu okulesha Ombiimbeli, okwiilongekidhila okugongala nokulesha Oshungolangelo no-Awake! Kakele owala kokuninga ngawo, aauvithi yamwe ohaye shi ningi momukalo gulwe gu ili. Ohashi vulika ya hiye omuuvithi gulwe nenge uukwanegumbo wontumba wu ye pekonakono lyawo opo ya tungathane noonkundathana dhOmbiimbeli.
11, 12. Tumbula omauwanawa gamwe ngoka haga zi mEkonakono lyUukwanegumbo ngele ohali ningwa pandjigilile?
11 Uuwanawa washike hawu zi mokukala nekonakono ndyoka pandjigilile? Mboka haya longele Jehova nomutima aguhe ohaya kala popepi naye. Sha faathana, omaukwanegumbo ngoka haga ningi iinima yopambepo pamwe ohaga kala ge na ekwatathano lya kola. Aaihokani yamwe oya nyola omayambeko ngoka ya mona ya ti: “Otu li aakokolindjila nokatu na aanona, ihe ohatu kala aluhe twa tegelela ekonakono lyetu lyuukwanegumbo nondjuulukwe. Ohatu kala tu uvite tu na ekwatathano lyopothingo notwa hedha popepi naTate yetu gwomegulu. Ngele twa penduka mesiku ndyoka, ohatu pulathana tatu ti: Owu shi ngaa kutya melandulathano lyetu otatu ka ninga shike nena kongulohi? Otatu ka ninga Ekonakono lyUukwanegumbo.’”
12 Elongekidho ndyoka ohali kwathele wo omaukwanegumbo ngoka haga kala gi ipyakidhila unene. Omumwameme ngoka ta tekula oyanamati yaali, ye omukokolindjila gwondjigilile okwa nyola a ti: “Ekonakono lyUukwanegumbo wetu olya li tali shongola nale. Olya li hali ningwa omaluthe molwaashoka okwa li handi kala nda vulwa. Kanda li ndi shi shoka ndi na okuninga opo tu kale tatu li ningi pandjigilile. Ngashingeyi otandi nyola ndi pandule omolwelongekidho ndika. Ohatu li ningi pandjigilile tu li uukwanegumbo notwa mona mo uuwanawa mulyo.”
13. Opo omaukwanegumbo ga mone uuwanawa mEkonakono oge na okuninga shike?
13 Ekonakono lyUukwanegumbo oli li omagano ga za kuTate yetu gwomegulu, lya fa owala Esabati ndyoka lya li po okukwathela omaukwanegumbo. (Jak. 1:17) Mpoka ngaa pwa li pu thike omaukwanegumbo muIsraeli taga longitha Esabati nawa, opo ngaa pwa li pu thike ekwatathano lyawo naJehova tali kala lya kola. Sha faathana, ngele natse otu na esiku ndyoka hatu li longitha okukonakona, uukwanegumbo wetu otawu ka mona uuwanawa oundji. (2 Kor. 9:6; Gal. 6:7, 8; Kol. 3:23, 24) Ngele uukwanegumbo weni otawu tula miilonga elongekidho ndika, otawu ka popya ngaashi omupisalomi ngoka a ti: “Osho opalela ndje okukala popepi naKalunga. OMUWA Omupangeliawike onde mu ningi egameno lyandje.” — Eps. 73:28.
[Oohapu dha simana pepandja 5]
Ekonakono lyUukwanegumbo kali na okukala tali sitha uunye nokuyemateka, ihe oli na okuulika kutya Kalunga ngoka tatu longele oKalunga kelago ye omunyanyukwi
[Oshimpungu pepandja 6]
PUNGULA OKAFO HAKA
Shoka omaukwanegumbo taga vulu okuninga
Ombiimbeli:
• Lesheni pamwe oontopolwa dhontumba dhElesho lyOmbiimbeli lyoshiwike shoka. Ngele oovelise ndhoka tamu lesha odha nyolwa momukalo gwoonkundathana, gumwe na leshe oohapu ndhoka dha popiwa komunyoli, omanga yamwe taya lesha oohapu dhaamboka ya tya sha mehokololo ndyoka.
• Ningeni oshinyandwa sha nkankamena koovelise ndhoka tamu lesha.
• Unganeka komeho yethimbo opo oshilyo kehe muukwanegumbo shi leshe oontopolwa dhontumba okuza mOmbiimbeli. Kehe gumwe na nyole epulo limwe nenge gaali lya kankamena koovelise ndhoka a lesha. Opo nduno kongeni omayamukulo gomapulo ngoka.
• Oshiwike kehe nyoleni oovelise dhontumba okuza mOmbiimbeli e tamu kambadhala mu dhi ilonge momutse nokudhi yelitha. Oovelise ndhoka kaleni tamu dhi gongele e tamu kala hamu dhi endulula oshiwike kehe mu tale ngele otamu dhi dhimbulukwa ngaa.
• Ngele omu na uukaseta nuu-CD wOmbiimbeli otamu vulu okupulakena kuwo.
Okugongala:
• Ilongekidhileni iitopolwa yokugongala pamwe.
• Idheuleni pamwe omaimbilo ngoka tage ki imbwa moshiwike tashi landula.
• Ngele gumwe oku na oshipopiwa mOsikola yUukalele woPauteokratika nenge euliko mOkugongala kwoPailonga, kundathaneni omadhiladhilo ngoka nenge mwi iyendithe po mu li uukwanegumbo.
Shoka uukwanegumbo wa pumbwa:
• Lesheni iitopolwa membo Young People Ask nenge Ilonga kOmulongi Omunene.
• Kaleni hamu iyenditha po nkene mu na okuungaunga noonkalo ndhoka hadhi holoka unene kosikola.
• Ethimbo limwe aavali naanona nayi ilongekidhe iitopolwa mbyoka taya ka ninga. Aanona naya konge uuyelele wontumba e taye wu yelithile aavali yawo.
Uukalele:
• Kaleni hamu ilongekidha shoka tamu ka popya muukalele mehuliloshiwike.
• Kundathaneni omalalakano ge li pandjele ngoka mwa hala okwiitulila po mu tamunune mo uukalele weni pethimbo lyEdhimbuluko nenge lyefudho mu li uukwanegumbo.
• Oshilyo kehe shuukwanegumbo nashi pewe ominute dhontumba shi konge uuyelele nkene tashi ka yamukula omapulo ga yoolokathana ngoka tashi vulika ga holoke po muukalele e tamu iyenditha po.
Omaetopo gamwe ishewe:
• Lesheni pamwe iitopolwa okuza miifo iipe.
• Oshilyo kehe shuukwanegumbo nashi leshe oshitopolwa shontumba shoka sha panda okuza moshifo oshipe komeho yethimbo, opo nduno tashi ka gandja olopota kombinga yaashoka sha lesha.
• Hiya omuuvithi nenge aaihokani omathimbo gamwe pEkonakono lyUukwanegumbo weni e to ya pula iimoniwa mbyoka ya mona muukalele nenge nkene ye ya moshili.
• Taleni okavidio kehangano e tamu kundathana kombinga yako.
• Kundathaneni pamwe iitopolwa yomo-Awake! “Young People Ask” nenge “For Family Review.”
• Kundathaneni pamwe iitopolwa “Longa aanona yoye” nenge “For Young People” ya za mOshungolangelo.
• Lesheni pamwe e tamu kundathana oshitopolwa okuza moYearbook yomumvo ngoka mu li nenge oshileshomwa shoka opo sha piti poshigongi shoshitopolwa.
• Ngele opo mwa adhika mwa zi koshigongi shoshitopolwa nenge shoshikandjo, endululeni iitsa ya simana.
• Kaleni hamu tala iinima yontumba meshito lyaJehova e tamu kundathana shoka tamu ilongo mo kombinga ye.
• Taleni uuaalita wopaMbiimbeli nenge omisholondondo dhiiningwanima nokuyelekela okutunga iinima mbyoka ya popiwa mOmbiimbeli.