Oshinakugwanithwa shoka twa lenga
1. Jesus oku ulike ngiini kutya okwa li a lenga uukalele?
1 Jesus okwa li a lenga uukalele. Okwa li a longo nuudhiginini sho e ende ookilometa omathele muPalestine tu uvithile aantu oyendji ngaashi tashi vulika. Okwa kaleke onkalamwenyo ye yanathangwa opo a gandje eitulomo nokulongitha ethimbo olindji muukalele. (Mat. 8:20) Sho aantu ya li ya hala a kale puyo noku aludhe aavu yawo, okwe ya lombwele a ti: “Elaka etoye lyoshilongo shaKalunga ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.” — Luk. 4:43.
2. Omolwashike Jesus a li a simaneka uukalele?
2 Omolwashike Jesus a li a simaneka uukalele? Okwa li e na ko nasha unene tuu nokuyapulitha edhina lyaJehova. (Mat. 6:9) Okwa li e hole He gwomegulu nomolwaashono a li a hala okugwanitha po ehalo lye nokuvulika kiipango ye ayihe. (Joh. 14:31) Shimwe ishewe, okwa li e na ko nasha naantu shili nokwa li a hala oku ya kwathela. — Mat. 9:36, 37.
3. Ongiini tatu vulu okuulika kutya otwa lenga uukalele wetu?
3 Landula oshiholelwa shaJesus: Oshi li eshongo okupititha komeho uukalele wetu ngaashi Jesus, molwaashoka opu na iinima oyindji muuyuni mbyoka hayi mana po ethimbo lyetu noku tu piyaganeka. (Mat. 24:37-39; Luk. 21:34) Onkee ano, otu na okukala tu na owino wokuyoolola iinima mbyoka yi na oshilonga unene, okutula po ethimbo lyokwiilongekidhila uukalele nokukutha aluhe ombinga muwo. (Fil. 1:10) Otu na okuninga oonkambadhala okukaleka onkalamwenyo yetu yanathangwa nokwaahapwila miinima yuuyuni. — 1 Kor. 7:31.
4. Omolwashike sha simanenena okukala twa lenga uukalele wetu?
4 Omuntu omunandunge oha longo tango shoka sha simanenena, ngele okwa pwilwa po kethimbo. Pashiholelwa, ngele oku shi kutya opu na oshikungulu oshinene tashi ya, ota ka longitha ethimbo noonkondo dhe okuninga omalongekidho a hupithe uukwanegumbo we nokulondodha aashinda ye. Ita ka mana po ethimbo niinima mbyoka inaayi simana unene. Ehanagulo lyaArmagedon oli li popepi noonkondo. (Sef. 1:14-16; 1 Kor. 7:29, KB) Opo tu ihupithe tse yene naamboka taye tu pulakene, otu na okwiitonatela aluhe nosho wo elongo lyetu, kutya nduno omegongalo nenge okondje yegongalo. (1 Tim. 4:16) Eeno, ngele otwa hala oku ka hupa, otu na okukala twa lenga uukalele wetu.