Kala wa lenga uuthembahenda woye wokuuvitha
1. Aantu oyendji muuyuni oya tala ko ngiini iilonga yetu yokuuvitha?
1 Aantu oyendji muuyuni mbuka waSatana oya tala ko iilonga yetu yokuuvitha yi li “uugoya.” (1 Kor. 1:18-21) Ngele inatu kotoka, etaloko ndyoka li li pombambo otali vulu oku tu teya omukumo noku tu ningitha kaatu kale we aalaadhi. (Omayel. 24:10; Jes. 5:20) Ihe omatompelo geni tu na gokukala twa lenga uuthembahenda wetu tu li Oonzapo dhaJehova? — Jes. 43:10.
2. Omolwashike uukalele wetu tawu vulu okwiithanwa ‘iilonga iiyapuki’?
2 ‘Iilonga iiyapuki’: Omuyapostoli Paulus okwa popi uukalele wu li ‘iilonga iiyapuki.’ (Rom. 15:15, 16, KB) Omeityo lini? Ngele tatu kutha ombinga muukalele otu li “aalongi pamwe” ‘nomuyapuki,’ Jehova, nokungawo otatu yapulitha edhina lye. (1 Kor. 3:9; 1 Pet. 1:15) Jehova oha tala ko iilonga yetu yokuuvitha yi li “eyambo,” onkee ano, uukalele owu li oshitopolwa sha simanenena shelongelokalunga lyetu. — Heb. 13:15.
3. Omolwashike okuuvitha onkundana ombwanawa ku li uuthembahenda uunene?
3 Aantu owala aashona yi inekelelwa uuthembahenda uunene wokuuvitha. Ando aayengeli oyo ya li ya pewa oshilonga shika ando otashi vulika haye shi longo ye tu vule kokule. (1 Pet. 1:12) Uuthembahenda owu thike peni sho Jehova e tu hogolola tu li aantu inaatu gwanenena, notu li ngaashi “iiyuma yeloya” tu gwanithe po oshilonga shika! — 2 Kor. 4:7.
4. Ongiini tatu vulu okuulika kutya otwa lenga uukalele wetu?
4 Shoka shi na oshilonga: Molwaashoka otwa lenga uuthembahenda wetu wokuuvitha, otwa tala ko uukalele wu li ‘oshinima shi na oshilonga’ monkalamwenyo yetu. (Fil. 1:10) Onkee ano, otwa pumbwa okwiitulila po ethimbo lyokuya muukalele oshiwike kehe. Omwiimbi ngoka a lenga uuthembahenda we wokwiimba mongundulwiimbo ya tseyika nawa muuyuni auhe, ohi ilongekidha nawa noha hwepopaleke uunkulungu we. Sha faathana, otu na okukala hatu ilongekidha omanga inaatu ya muukalele opo tu vule okulonga “oshili ya yela yomoohapu” dhaKalunga notatu ka hwepopala ‘mokulonga aantu.’ — 2 Tim. 2:15; 4:2.
5. Olye a simaneka unene uukalele wetu?
5 Ino teka omukumo ngele aantu oyendji moshitopolwa inaaya hala okupulakena. Dhimbulukwa kutya opu na aantu oyendji moshitopolwa shetu mboka ye na ohokwe. Kakele kaashono, elalakano lyetu kali shi okukala twa hokiwa kaantu. Ihe shoka sha simana okunyanyudha Jehova nokwa lenga oonkambadhala dhetu. — Jes. 52:7.