Omatompelo omulongo nagaali kutya omolwashike hatu uvitha
Omolwashike hatu uvithile aantu nokukonakona nayo Ombiimbeli? Mbela onetompelo tu kwathele mboka ye na omitima omiwanawa ya tseye ondjila ndjoka tayi fala komwenyo? (Mat. 7:14) Ndyoka olyo etompelo lyotango lya popiwa pevi, ihe halyo etompelo lyetu lya simanenena. Ngoye oto dhiladhila kutya olini lyomomatompelo ngaka 12 gokuuvitha taga landula lya simanenena?
1. Sho tatu uvitha, otatu kwathele moshilonga shokuhupitha oomwenyo.—Joh. 17:3.
2. Sho tatu uvitha, otatu londodha aakolokoshi.—Hes. 3:18, 19.
3. Sho tatu uvitha, otatu kutha ombinga megwanitho po lyomahunganeko gOmbiimbeli.—Mat. 24:14.
4. Sho tatu uvitha, otashi ulike kutya Kalunga oha ningi iinima pauyuuki. Kapu na ngoka ta vulu okulundila Jehova kutya oha hanagula po aakolokoshi inee ya pa ompito yokwiitedhulula.—Iil. 17:30, 31; 1 Tim. 2:3, 4.
5. Okuuvitha ohaku tu pe ompito tu gwanithe po oshinakugwanithwa shetu shokukwathela pambepo aantu mboka ya landwa nombinzi yaJesus.—Rom. 1:14, 15.
6. Okuuvitha ohaku tu kwathele tu kale kaatu na ondjo yombinzi.—Iil. 20:26, 27.
7. Otwa pumbwa okuuvitha ngele otwa hala tu ka hupithwe.—Hes. 3:19; Rom. 10:9, 10.
8. Sho tatu uvitha, otatu ulike kutya otu hole aantu ooyakwetu.—Mat. 22:39.
9. Sho tatu uvitha, otatu ulike kutya ohatu vulika kuJehova nokOmwana.—Mat. 28:19, 20.
10. Okuuvitha oku li oshitopolwa shelongelokalunga lyetu.—Heb. 13:15.
11. Sho tatu uvitha otatu ulike kutya otu hole Kalunga.—1 Joh. 5:3.
12. Sho tatu uvitha, otatu kutha ombinga mokuyapulitha edhina lyaJehova.—Jes. 43:10-12; Mat. 6:9.
Eeno, ngaka hago owala omatompelo gokukutha ombinga muukalele. Pashiholelwa, okuuvitha ohaku koleke eitaalo lyetu nohaku tu pe wo ompito yi ikalekelwa yokukala aalongi pamwe naKalunga. (1 Kor. 3:9) Ihe etompelo lya simanenena lyokukutha ombinga muukalele etompelo eti-12. Kashi na nduno mbudhi kutya aantu ohaya pulakene nenge hasho uukalele ohawu tu kwathele tu kuthe ombinga mokuyapulitha edhina lyaJehova Kalunga nohawu Mu ningitha a yamukule ngoka te mu lundile. (Omayel. 27:11) Uushili owo kutya, otu na omatompelo omawanawa lela ‘gokutsikila twaa na oluthuwo okulonga nokuuvitha onkundana ombwanawa.’—Iil. 5:42, yelekanitha NW.