Mbela shoka handi longo muukalele osha gwana ngaa?
1. Aakriste aadhiginini otashi vulika ya kale tayi ipula nashike?
1 Mbela owi ipula nale epulo ndyoka? Otashi vulika wu kale ihoo kutha we ombinga muukalele ngaashi wa li ho ningi nale omolwuukokele, uukolele nenge iinakugwanithwa yuukwanegumbo, shoka tashi vulika shi ku teye omukumo. Omumwameme gumwe e na aanona yatatu okwa nyola kutya omathimbo gamwe oha kala u uvite a fa e na ondjo molwaashoka ethimbo noonkondo ndhoka ha longitha okusila oshimpwiyu uukwanegumbo we ohayi mu imbi a longe ethimbo lya gwana muukalele. Oshike tashi ke tu kwathela tu kale tu na etaloko li li pandjele?
2. Jehova okwa tegelela shike kutse?
2 Shoka Jehova a tegelela tu ninge: Osha yela kutya atuhe otwa hala okuninga oshindji muukalele. Ihe olundji opu na eyooloko pokati kaashoka twa hala okuninga naashoka tatu vulu lela okuninga. Ngele otwa hala okuninga oshindji, otashi ulike kutya inatu gwanenwa kwaashoka tatu ningi. Otu na okukala tu shi kutya Jehova okwa tseya nawa omangambeko getu noina tegelela tu ninge shoka itaatu vulu. (Eps. 103:13, 14) Oshike a tegelela kutse? Okwa hala tu mu longele nomwenyo aguhe nokuninga shoka shi thike poonkondo dhetu. — Kol. 3:23.
3. Ongiini tatu vulu okukonakona iilonga yetu yuukalele?
3 Oshike tashi ke tu kwathela tu ninge shoka tatu vulu lela? Otu na okupula Jehova e tu kwathele tu kale tu na etaloko li li pandjele. (Eps. 26:2) Otatu vulu wo okupula kuume Omukriste omwiinekelwa a koka pambepo noku tu shi nawa noiha lile okathima koluko e tu lombwele mpoka twa pumbwa okuhwepopala. (Omayel. 27:9) Otu na wo okukala hatu ikonakona aluhe molwaashoka oonkalo ohadhi lunduluka. — Ef. 5:10.
4. Otu na okutala ko ngiini shoka Ombiimbeli tayi tu lombwele kombinga yuukalele?
4 Otu na okutala ko ngiini shoka hatu lombwelwa kombinga yuukalele wetu?: Pethimbo lyuudhano wokumatuka, aatali ohaya kala taya tsu omukumo mboka taya matuka. Elalakano lyoku shi ninga okukwathela aamatuki ya adhe ethikilo, ihe haku ya teya omukumo. Sha faathana, eladhipiko ndyoka li li mOmbiimbeli nosho wo omalombwelo ngoka hatu mono pokugongala kehe nomiileshomwa yetu nkene tu na ‘okudhiginina okuuvitha,’ ohayi tu kwathele tu mone kutya oonkambadhala ndhoka hatu ningi otadhi ti sha. (2 Tim. 4:2) Otu na uushili kutya ngele otatu longo ngaashi tatu vulu, Jehova ota ka dhimbulukwa “iilonga nohole” yetu. — Heb. 6:10.