Kwathela kuume kopandjokana ngoka kee li moshili
1. Omolwashike Aakriste mboka ookuume kawo kopandjokana kaaye shi ooitaali hayo owala ya hala ye ya moshili?
1 Mbela megongalo lyeni omu na aamwatate naamwameme mboka ookuume kawo kopandjokana kaaye li moshili? Ngele osho, aauvithi mboka oya hala ookuume kawo ye ya moshili. Kehe gumwe megongalo osho a hala. Kungawo, egongalo alihe otali holele Kalunga ngoka a hala “aantu ayehe ya hupithwe noya tseye oshili.” (1 Tim. 2:4) Ongiini tatu vulu okukwathela aasamane naakulukadhi mboka kaaye li moshili, ihe ookuume kawo kopandjokana aauvithi megongalo lyetu?
2. Owino noondunge ohayi tu kwathele ngiini tu ungaunge nakuume kopandjokana ngoka kee li moshili?
2 Tango, natu tseye kutya kuume kopandjokana ngoka kee li moshili okwiitaala shike. Nonando ke li moshili noku li meitaalo lyi ili, olundji kuume ngoka oha kala e hole oyana nakuume ke kopandjokana. Otashi vulika ke na naanaa ontseyo oyindji kombinga yOonzapo dhaJehova nenge a tsuwa omaminimini kwaamboka ye tu tonde. Yamwe ohaya kala yu uvite nayi ngele kuume Omukriste oha longitha aluhe ethimbo ndyoka a li ha kala pamwe nuukwanegumbo miinima yUukwaniilwa. Owino noondunge otayi ke tu kwathela tu ungaunge nombili nonesimaneko nakuume ngoka kee li moshili nokukala twa ngungumana ngele tu li naye. — Omayel. 16:20-23.
3. Oshike hashi hili kuume ngoka kee shi omwiitaali e ye moshili?
3 Ulika kutya owu mu hole: Kakele owala koonkundathana dhopambiimbeli, eihumbato lyetu olyo unene hali hili kuume ngoka kee shi omwiitaali e ye moshili. (1 Pet. 3:1, 2) Osha simana tu mu ulukile ohole pauhandimwe. Aamwatate megongalo otaya vulu okukwathela aasamane mboka kaaye li moshili naamwameme otaya vulu okukwathela aakulukadhi. Ngiini mbela?
4. Ongiini tatu vulu okuulika kutya otu na ko nasha nakuume kopandjokana ngoka kee li moshili?
4 Ngele kuume kopandjokana ngoka kee li moshili ku mu shi, pula kuume ke ngoka Omukriste manga ino ke mu talela po. Ino teka omukumo ngele kuume ngoka kee li moshili ke na nkwa nangoye petameko. Otashi vulika a ka kale e hole Oonzapo dhaJehova ngele otu na ombili naye notu mu hole. (Rom. 12:20) Aakriste yamwe ya pyokoka pambepo oya li ya hiya omusamane gumwe ngoka kee li moshili nuukwanegumbo we ya lye pamwe naye opo ya tseyathane nawa nokuhulitha po uutondwe mboka tashi vulika e na. Oya li taya popi kombinga yiinima mbyoka omusamane e hole, pehala lyokukundathana iinima yopambepo. Otashi vulika shi ka kale oshipu okukundathana naye kombinga yiinima yopambepo konima yethimbo. Molwaashoka oku shi yamwe megongalo, otashi vulika shi ka kale oshipu kuye e ye kokugongala i imonene ko ye mwene kutya omukulukadhi gwe ohi ilongo shike. Nokuli nonando ke na ohokwe noshili, natu mu pandule molwaashoka ha ambidhidha kuume ke ngoka omwiitaali.
5. Ongiini aakuluntugongalo taya vulu okukwathela kuume kopandjokana ngoka kee li moshili?
5 Aakuluntugongalo oyo unene ye na okutala nkene ye na okukwathela kuume kopandjokana ngoka kee li moshili nokukonga ompito ye mu uvithile. Kuume kopandjokana ngoka ke hole okupulakena otashi vulika a ka kale a hala okutsuwa omukomo nOmanyolo ngele e li moshipangelo nenge ke na uukolele. Uuna muukwanegumbo wa tya ngaaka mwa holoka uudhigu, ngaashi eso, aakuluntugongalo otaya vulu okupula kuume ngoka kee shi omwiitaali a kale po sho taya gandja ehekeleko.
6. Omolwashike tu na okuuvithila kuume kopandjokana ngoka kee li moshili?
6 Kuume ngoka omwiitaali ota ka kala a nyanyukwa uuna mukwawo a taamba ko oshili notashi ka nyanyudha wo Jehova, aayengeli negongalo alihe. (Luk. 15:7, 10) Ngele kuume kopandjokana ngoka kee li moshili okwe tu angala petameko, inatu teka omukumo molwaashoka oonkambadhala dhetu otadhi nyanyudha Jehova ngoka “ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” — 2 Pet. 3:9.
[Oohapu dha simana pepandja 6]
Kakele owala koonkundathana dhopambiimbeli, eihumbato lyetu olyo unene hali hili kuume ngoka kee shi omwiitaali e ye moshili