Kala ho ‘sile aantu ohenda’
1. Aantu oya pumbwa unene okuningilwa shike kunena?
1 Kunena aantu oyendji oya pumbwa okweetelwa ohenda unene shi vulithe nale. Aantu oyendji kaaye na ombili noya polimana, noye li wo ya kanitha etegameno omolwoonkalo dhuuyuni ndhoka tadhi ende tadhi nayipala. Omamiliyona oya pumbwa ekwatho, na tse tu li Aakriste otatu vulu oku yu ulukila kutya otu na ko nasha nayo shili. (Mat. 22:39; Gal. 6:10) Ongiini tatu vulu oku shi ulika?
2. Omukalo dhingi okuulika ohenda oguni?
2 Iilonga yokuuvitha mbyoka tu na okulonga otayi ulike kutya Jehova omunahenda: Ehekeleko lyashili notali kalele ohali zi owala kuKalunga. (2 Kor. 1:3, 4) Molwashoka ye omunalukeno, ote tu pula tu mu holele ‘mokusila aantu ohenda,’ nokwe tu pa oshilonga shoku ya uvithila onkundana ombwanawa yUukwaniilwa. (1 Pet. 3:8) Ngele ohatu kutha ombinga ngaashi tatu vulu miilonga mbyoka, oshi li omukalo dhingi okuhekeleka mboka ye na ‘oomwenyo dha nyanyagulwa,’ molwaashoka Uukwaniilwa waKalunga owo owala tawu ke etela aantu mboka taya mono iihuna epepelelo lyashili. (Jes. 61:1) Omolwohenda ye, masiku Jehova ota ka katuka onkatu a hulithe po uukolokoshi thiluthilu noku eta po uuyuni uupe wuuyuuki. — 2 Pet. 3:13.
3. Ongiini tatu vulu okukala hatu tala ko aantu ngaashi Jesus a li he ya tala ko?
3 Kala ho tala ko aantu ngaashi Jesus: Nonando Jesus okwa li hu uvithile omangathithi gaantu, okwa li ha kala e na ko nasha nayo pauhandimwe. Okwa li e shi kutya kehe gumwe pauhandimwe okwa pumbwa ekwatho lyopambepo. Oya li ya fa oonzi dhaa na omusita ngoka te dhi litha. Sho Jesus e ya mono osha li sha gumu omutima gwe, noshe mu inyengitha e ya longe neidhidhimiko. (Mark. 6:34) Ngele ohatu tala ko aantu ngaashi Jesus, otashi ke tu inyengitha tu ya ulukile ohenda pauhandimwe. Shika otashi ki imonikila kewi lyetu nosho wo kiipala yetu. Onkee ano, natu kale twa lenga okuuvitha, notatu ka popya momukalo ngoka tagu ulike kutya otu na ko nasha nomuntu kehe pauhandimwe. — 1 Kor. 9:19-23.
4. Omolwashike tu na okutsikila nokuzala uukwatya mbuka wohenda?
4 Ongundu onene yaantu okuza miigwana niigwana otayi pulakene nawa ketumwalaka lyUukwaniilwa nosho wo kohokwe ndjoka hatu ya ulukile. Ngele otatu tsikile nokuzala uukwatya mbuka wohenda, nena otatu ka simaneka Jehova, ngoka e li Kalunga omunahenda. — Kol. 3:12.