Kwathela omunegumbo a dhiladhile
1. Omukalo guni omwaanawa okulongitha momapya?
1 Mbela omukalo guni omwaanawa okulongitha momapya uuna to popi nomunegumbo? Mbela oongoka goku mu lombwela shoka e na okwiitaala nenge ogo ku tompathana naye noku mu kwathela a dhiladhile opo e ye pehulithodhiladhilo lyomondjila? Omuyapostoli Paulus okwa li a tompathana nAajuda muTessalonika, ‘yamwe noyi itaale.’ (Iil. 17:2-4) Ongiini tatu vulu okutompathana nayalwe?
2. Ongiini tatu vulu okulandula oshiholelwa shaPaulus uuna tatu popi nayalwe kombinga yonkundana ombwanawa?
2 Kala wu shi omaiyuvo gawo neputuko lyawo: Ngele otu shi nkene aantu yu uvite shi na ko nasha niinima yontumba moshitopolwa shetu naashoka yi itaala otashi ke tu kwathela tu tompathane nayo. Sho Paulus a li ta popi nAagreka mboka ya li inaayi itaala poshigongi shaAreopagi, okwa li a popi iinima mbyoka ye shi noya taamba ko. (Iil. 17:22-31) Onkee ano, uuna to longekidha shoka to ka popya muukalele, ipula kombinga yomadhiladhilo gopombambo ngoka aantu moshitopolwa sheni ye na naashoka yi itaala. (1 Kor. 9:19-22) Ngele omunegumbo ote ku pataneke, kambadhala okukankamekela oonkundathana dheni kwaashoka naye i itaala.
3. Ongiini tatu vulu okulongitha omapulo nuukeka opo tu tompathane nayalwe momukalo omwaanawa?
3 Longitha omapulo nuukeka: Opo tu pukulule omuntu ngoka a puka otu na okukala tu shi mpoka e li. Sha faathana, itatu vulu okukwathela omuntu momapya ngele ka tu shi shoka i itaala. Manga Jesus inaa tompathana naapulakeni ye okwa li he ya pula omapulo opo u uve shoka shi li momadhiladhilo gawo. Pashiholelwa, sho gumwe a li a pula Jesus a ti: “Ondi na okuninga shike, ndi mone omwenyo gwaaluhe?”, Jesus okwa li e mu pula shoka ta dhiladhila manga inee mu yamukula. (Luk. 10:25-28) Poshikando shimwe ishewe sho Petrus a li a gandja eyamukulo lya puka, Jesus okwa li a longitha omapulo nuukeka opo e mu kwathele a kale e na etaloko lyomondjila. (Mat. 17:24-26) Onkee ano, ngele omunegumbo okwa pula epulo nenge a ningi eetopo lya puka, natu longithe omapulo tu mu kwathele a tompathane moshinima shoka.
4. Omolwashike tu na okukwathela omunegumbo a tompathane?
4 Ngele twa kwathele omunegumbo a tompathane moshinima shontumba, otatu landula oshiholelwa shOmulongi Omunene Jesus nosho wo shaauvithi aanekeka yalwe yomethelemumvo lyotango. Momukalo gwa tya ngawo otatu ulike kutya otwe mu simaneka. (1 Pet. 3:15, 16) Naashika otashi ke mu ningitha a kale a hala tu galuke.