Okuhwepopaleka uunkulungu wetu muukalele — Nkene tatu vulu okuyamukula mboka taya vulu okukankeka oonkundathana

Etompelo kutya omolwashike sha simana: Kala ando wa fa wu shi oshiponga shopaunshitwe shoka shi li pokuya. Aantu otaya ka sa ngele inaya tembukila kehala hoka ku na egameno. Owa yi kegumbo lyamushiinda shoye wu ke mu londodhe, ihe okwe ku kwata melaka ta ti kutya okwi ipyakidhila. Osha yela kutya, ito ke mu etha owala nziya e to kala inoo ninga oonkambadhala wu mu kwathele. Aantu oyendji moshitopolwa shetu ohaye tu shunitha ko, noihaya dhimbulula ongushu yetumwalaka lyetu lyokuhupitha oomwenyo. Otashi vulika pethimbo tatu ya talele po tu adhe yi ipyakidhila. (Mat. 24:37-39) Nenge tashi vulika yu uva omahokololo giifundja kombinga yetu. (Mat. 11:18, 19) Otashi vulika ya dhiladhile kutya otwa faathana nomalongelokalunga galwe ngoka gi imika iiyimati iiwinayi. (2 Pet. 2:1, 2) Uuna omunegumbo inaa ulika ohokwe petameko, inatu shuna omutse miipeta nziya.

Nkene tatu vulu oku shi ninga:

Manga inoo ya miilonga yegumbo negumbo, dhiladhila kombinga yaamboka taya vulu okukankeka oonkundathana nokutala nkene to ke ya yamukula.
Uuna omunegumbo a tindi, kambadhala okutsikila oonkundathana momukalo omwaanawa. Otashi vulika wu ninge ngaaka moku mu pandula. Pashiholelwa, ngele okwa ti oku na elongelokalunga lye, oto vulu wu mu yamukule to ti: “Onda kala ndi na einekelo kutya otandi mono gumwe ngaashi ngoye ngoka e na ohokwe miinima yopambepo.” Omathimbo gamwe okuuva ko omaiyuvo nenge oonkalo dhomunegumbo otaku ke ku kwathela wu tsikile okugandja uunzapo. Pashiholelwa ngele okwa ti kutya okwi ipyakidhila, oto vulu wu tye: “Ondi ku uvite. Ihe manga inaandi ya, onda hala ndi ku pe oshileshomwa shika.” Omukalo gulwe okupula omunegumbo epulo ngele okwa ti kutya ke na ohokwe. Oto vulu okutya, “Mbela owa hala okutya ku na ohokwe metumwalaka lyOmbiimbeli, nenge kuu na ohokwe momalongelokalunga?”
Longitha oondunge dhokuyoolola. Dhimbulukwa kutya Jehova iha thiminike aantu ya pulakene. (Deut. 30:19) Kehe gumwe oku na okuhumbata omutengi gwe gwoshinakugwanithwa shiinima yopambepo. (Gal. 6:5) Ngele omunegumbo ina halelelela, oshi li nawa wu mu thige po. Mokuulika kutya otwa simaneka omaiyuvo ge, otashi vulika tu ke shi ninge oshipu komuuvithi gulwe a vule okugandja uunzapo monakuyiwa. — 1 Pet. 3:15.

Kambadhala oku shi ninga momwedhi nguka:

Uuna ngoye naangoka to longo naye mwa tsakanene nomuntu ngoka a kankeke oonkundathana, ngele mwa zi po puye, kundathaneni nkene tashi vulika wa li wu na oku mu yamukula momukalo gu li hwepo.