Nkene tatu vulu okunyanyukilwa omaimbilo gUukwaniilwa (Kingdom songs)
Aapiya yaJehova Kalunga oye wetu kutya omusika oyi li omagano omawanawa ga za kuye. (Jak. 1:17) Omagongalo ogendji ohaga nyanyukilwa okupulakena omaimbilo gUukwaniilwa manga okugongala inaaku tameka nongele kwa piti mo. Okupulakena komusika ndjoka yopalongelokalunga ohaku tu ningitha tu kale tu uvite twa thuwa pokugongala kwetu. Ohayi tu kwathele pamadhiladhilo tu kale tu li mombepo yelongelokalunga. Natango, okupulakena koongowela oompe dhomaimbilo getu ohaku tu kwathele tu tseye oongowela ndhoka oompe nohaku tu kwathele tu kale hatu imbi mondjila. Omusika ndjoka hayi pulakenwa konima yokugongala ohayi tu ningitha tu kale tu li mombepo ombwanawa ndjoka hayi tu ningitha tu nyanyukilwe eendathano nokutsaathana omukumo. Onkee ano, aakuluntugongalo oye na okuninga omalongekidho opo egongalo li kale hali pulakene komusika ndjoka ya hikwa nokahumba (Sing to Jehovah — Piano Accompaniment) manga okugongala inaa ku tameka nongele kwa piti mo. Oye na okushilipaleka kutya kayi li pombanda unene nokayi na okuningitha aantu ya kale kaayi iyuvite sho taya popi.