Omikalo ndatu ndhoka tadhi ke ku kwathela wu hwepopaleke uunkulungu woye wokulonga
1. Omolwashike tu na okukambadhala aluhe okuhwepopaleka uunkulungu wetu wokulonga?
1 Aauvithi ayehe aalongi. Kutya nduno otatu longo egumbo negumbo, tatu ningi omaishunoko, nenge tatu ningi omakonakonombiimbeli, otatu pe yalwe uuyelele. Nuuyelele mboka hatu gandja kawu shi wanathangwa. Tse ohatu fatulula “Omanyolo omayapuki” ngoka haga vulu okupa aantu ‘oondunge ndhoka tadhi ya thikitha mehupitho.’ (2 Tim. 3:15) Mbuka kawu shi tuu uuthembahenda wa dhenga mbanda! Mpaka otapu landula omikalo ndatu ndhoka tadhi vulu oku tu kwathela tu kale aalongi ya pyokoka.
2. Oshike tashi ke tu kwathela kaatu popye iinima ya kitakana?
2 Ino popya iinima ya kitakana: Ngele oshinima shoka tatu kundathana otu shi shi nawa, oshipu okudhimbwa kutya uuyelele mboka otashi vulika wu kale wa kitakana kuyalwe mboka kaaye wu shi nawa. Nomolwaashono ngele to ningi ekonakonombiimbeli ino ndumbila omuntu uuyelele mboka inaawu pumbiwa. Pehala lyaashono, tsa omuthindo iitsa mbyoka ya simana. Itashi ti kutya otatu longo omuntu nawa ngele otatu popi oohapu odhindji. (Omayel. 10:19) Olundji oshiwanawa ngele tatu lesha owala oovelise ndhoka dhi na okutsuwa omuthindo. Ngele wa lesha ovelise, tsa owala omuthindo oshitsa shoka tashi kundathanwa movelise moka. Euvitho lyokondundu ndyoka lya nyolwa muMateus ontopolwa 5 sigo 7 oli na oshili ya simana, ihe nonando oongawo Jesus ina popya iinima ya kitakana, ye ina popya oohapu odhindjidhindji.
3. Omolwashike omathaneko ga simana, na ogeni po olundji omawanawa?
3 Omathaneko: Omathaneko ohaga kwathele omuntu a dhiladhile, ohaga gumu omutima nohaga kwathele omuntu kaa dhimbwe. Ino pumbwa okukala omupopi omwaanawa opo wu vule okukala ho gandja omathaneko omawanawa. Jesus okwa li ha longitha omathaneko omafupi noinaga kitakana. (Mat. 7:3-5; 18:2-4) Omathano ganathangwa ga thanekwa pombapila nago otaga vulu okukwathela omuntu. Ngele otwa kala hatu ilongekidha nawa kuyele otashi ke tu kwathela tu vule okumona omathaneko omawanawa.
4. Ongiini tatu vulu okulongitha omapulo momukalo ngoka tagu pondola?
4 Omapulo: Ngele wa pula epulo ohashi ningitha omukonakoni gwoye a dhiladhile. Onkee ano, kala ho tegelele ngele wa pula epulo. Ngele owa kala ho endelele wu yamukule epulo ndyoka wa pula, ito ka mona ngele omukonakoni gwoye oku uvite ko. Ngele okwa yamukula epuko otashi ka kala shi li hwepo wu mu pule omapulo ga gwedhwa po ngoka tage ke mu kwathela a thike pehulithodhiladhilo lyomondjila pehala lyoku mu pukulula owala. (Mat. 17:24-27) Uushili owo kutya, kapu na nando ogumwe gwomutse e li omulongi a gwanenena. Onkee ano, Ombiimbeli otayi tu ladhipike tu tonatele elongo lyetu. Ngele tatu shi ningi otatu ka mona uuwanawa tawu kalelele naamboka taye tu pulakene otaye ke wu mona wo. — 1 Tim. 4:16.