Nyanyudha omwenyo gwoye niilonga yoye yuudhiginini
1. Oshike tashi vulu oku tu ningitha tu kale kaatu shi we aalaadhi muukalele?
1 Aantu oya shitwa ya kale haya ‘nyanyudha oomwenyo dhawo niilonga yawo’ yuudhiginini. (Omuuv. 2:24) Ihe ngele ihatu mono iizemo iiwanawa miilonga yetu yuukalele, otashi vulu oku tu teya omukumo noku tu kanithitha enyanyu e tatu kala kaatu shi we aalaadhi. Oshike mbela tashi vulu oku tu kwathela kaatu teke omukumo?
2. Omolwashike tu na okukala tu na etaloko li li pandjele kombinga yankene aantu hayi inyenge muukalele?
2 Kala wu na etaloko li li pandjele: Dhimbulukwa kutya nonando mboka ya li ya taamba ko etumwalaka lyaJesus kaya li oyendji, Jesus okwa li a pondola thiluthilu muukalele we. (Joh. 17:4) Jesus meyele lye lyomukuni, okwa li a popi kutya oyendji itaya ka taamba ko etumwalaka lyUukwaniilwa ndyoka lya yelekanithwa noombuto. (Mat. 13:3-8, 18-22) Ihe nonando ongaaka, oonkambadhala dhetu dha mana mo otadhi pondola oshindji.
3. Ongiini tatu vulu ‘okweeta iiyimati’ nenge tu tye okwiimika iiyimati ngele aantu ihayi inyenge naanaa ketumwalaka ndyoka hatu uvitha?
3 Nkene tatu vulu okwiimika iiyimati oyindji: Jesus meyele lye okwa ti kutya mboka taya taamba ko etumwalaka otaye ke “eta iiyimati” nenge tu tye otaye ki imika iiyimati. (Mat. 13:23) Konima ngele iilya ya piti mo e tayi koko, ihayi vala iihenguti, ihe ohayi vala iilya iipe. Ano iiyimati mbyoka Omukriste hi imike kayi shi aalongwa aape, ihe oombuto oompe dhUukwaniilwa mboka hatu uvitha. Okuuvitha huka otaku vulu okweeta iizemo oyindji ‘yinyanyudha,’ kashi na nduno mbudhi kutya aantu otayi inyenge ngiini. Ohatu yapulitha edhina lyaJehova. (Jes. 43:10-12; Mat. 6:9) Otu na uuthembahenda wokukala aalongi pamwe naKalunga. (1 Kor. 3:9) “Iiyimati yomilungu” (OB-1954) mbyoka hatu imike ohayi nyanyudha Jehova. — Heb. 13:15, 16.
4. Iizemo yini tashi vulika yi ze muukalele wetu inaatu shi tseya?
4 Kakele kaashono, iilonga yetu yuudhiginini otayi vulu okweeta iizemo mbyoka ihaatu mono. Otashi vulika yamwe mboka ya li yu uvu Jesus tu uvitha inaaya ninga aalongwa sigo oosho a mana uukalele we kombanda yevi. Sha faathana, oombuto dhUukwaniilwa ndhoka tatu kunu otashi vulika itaadhi mene omidhi e tadhi koko momutima gwomuntu ngashingeyi, ihe konima yethimbo omuntu ngoka otashi vulika e ke ye moshili inaatu shi tseya. Ano uukalele wetu ohawu pondola lela. Onkee ano, natu kaleni ‘nokwiimika iiyimati oyindji’ nokuulika kutya otu li aalongwa yaJesus. — Joh. 15:8.