Ilongekidhila Edhimbuluko nenyanyu
1. Oomwedhi dhEdhimbuluko odho ethimbo lyi ikalekelwa lyokuninga shike?
1 Edhimbuluko ndyoka tali ka ningwa mEtiyali mo 26 Maalitsa oli li ompito ya ombwanawa yokunyanyukilwa shoka Kalunga e tu ningila, opo e tu hupithe. (Jes. 61:10) Ombepo yenyanyu otayi ke tu kwathela nokuli tu ilongekidhile nawa edhimbuluko ndyoka twa tegelela manga inaali thika. Ngiini mbela?
2. Oshike hashi tu inyengitha tu ninge omalongekidho omolwEdhimbuluko?
2 Ilongekidhila Edhimbuluko: Uulalelo wOmuwa oshiningwanima sha simana nonando ihapu ningwa iinima oyindji. Ihe owa pumbwa okwiilongekidhilwa nawa kuyele, opo iinima ya simana kaayi dhimbiwe. (Omayel. 21:5) Ethimbo nosho wo ehala li li nawa mpoka tawu ka ningilwa olya pumbwa okukongwa. Opu na okulongekidhwa omandhindhiliko tago opalele. Ehala mpoka tawu ka ningilwa oli na okwoopalekwa nokulongekidhwa. Omupopi ngoka a hogololwa oku na okwiilongekidha nawa nopu na wo okuunganekwa aayakuli. Osha yela kutya oyindji yomiinima mbika oya ningwa nale. Molwaashoka otwa pandula ekuliloyambo, ohashi tu inyengitha tu ilongekidhile nawa oshituthi shika oshiyapuki. — 1 Pet. 1:8, 9.
3. Ongiini tatu vulu okulongekidha omutima gwetu omolwUulalelo wOmuwa?
3 Longekidha omutima gwoye: Osha simana wo okulongekidha omitima dhetu okuuva ko nawa eityo lyEdhimbuluko. (Esra 7:10, OB-1954) Otu na okwiitulila po ethimbo lyokukonakona omanyolo gi ikalekelwa kombinga yEdhimbuluko nokutedhatedha kombinga yonkalamwenyo yaJesus yahugunina yokombanda yevi. Ngele otwa tedhatedha kombinga yombepo yaJesus yeiyambo, otashi ke tu inyengitha tu mu holele. — Gal. 2:20.
4. Omauwanawa geni gekuliloyambo hage ku nyanyudha noonkondo?
4 Eso lyaKristus olya yukipalitha uunamapangelo waJehova. Olye tu mangulula muulunde neso. (1 Joh. 2:2) Olye tu egululila ondjila yokukala nekwatathano lyombili naKalunga nosho wo okumona omwenyo gwaaluhe. (Kol. 1:21, 22) Otali tu kwathele wo tu kale twa tokola toko okudhiginina eiyambo lyetu kuJehova notu kale aalongwa yaKristus ya kola pambepo. (Mat. 16:24) Ano kala wa nyanyukwa noonkondo sho to ilongekidhile Edhimbuluko ndyoka twa tegelela naasho to ka kala po.