‘Kaleni noku shi ninga’ Edhimbuluko tali ningwa mu 5 Apilili
1. Omolwashike okudhana Edhimbuluko kwa simana?
1 “Shi ningeni nokudhimbulukwa ndje.” (Luk. 22:19) Noohapu ndhoka, Jesus okwa li a lombwele aalanduli ye ya kale haya dhimbulukwa eso lye. Molwaashoka ekulilo olya ninga oshindji tashi wapa, kaku na nando esiku limwe lya simana kOmukriste li vule esiku lyEdhimbuluko ndyoka hali ningwa kehe komumvo. Otatu ka ulika ngiini kutya otwa pandula Jehova sho omasiku 5 Apilili moka tamu ka ningwa Edhimbuluko taga hedha popepi? — Kol. 3:15.
2. Sho tatu konakona Ombiimbeli nosho wo sho tatu tedhatedha kwaashoka twi ilonga, otatu ulike ngiini kutya otwa pandula sho twa longekidhilwa Edhimbuluko?
2 Ilongekidha: Olundji ohatu ilongekidhile iinima mbyoka tu wete kutya oya simana. Pamwe nuukwanegumbo wetu otatu vulu okwiilongekidhila Edhimbuluko, tatu shi ningi mokulesha nokutedhatedha kombinga yiiningwanima mbyoka ya ningwa lwopehulilo lyonkalamwenyo yaJesus yokombanda yevi. (Esra 7:10) Omusholondondo gwoovelise dhi ihwa po nosho wo oontopolwa dhembo Omuntu omunenenene moka oovelise ndhoka dha fatululwa otadhi adhika mOshungolangelo yOshiingilisa ye 1 Febuluali 2011 pepandja 23-24, omanga oovelise dhimwe po tadhi adhika mokalindeli ketu nosho wo membo Konakona Omanyolo esiku kehe.
3. Ngele otwa kutha ombinga muukalele shi vulithe shito, otashi ka ulika ngiini kutya otu na olupandu omolwEdhimbuluko?
3 Uvitha: Otatu vulu wo okuulika olupandu lwetu mokulongitha ethimbo olindji muukalele ngaashi tashi vulika. (Luk. 6:45) Olyomakaya, 10 Maalitsa otali ka kala Esiku lyOkulonga nIifo li ikalekelwa, nomOlyomakaya, 17 Maalitsa otatu ka tameka noshikonga shokuhiya aantu kEdhimbuluko shoka tashi ka ningwa muuyuni auhe. Mbela ito vulu okuninga elongekidho opo wu longe oowili odhindji muukalele, tashi vulika to shi ningi wu li omukwathelikokolindjila? Omolwashike itaamu shi kundathana pElongelokalunga lyUukwanegumbo weni?
4. Okukala pEdhimbuluko otaku vulu oku tu etela uuwanawa wuni?
4 Okukala po pEdhimbuluko omumvo kehe ohashi tu etele uuwanawa. Kenyanyu lyetu nosho wo kohole yetu ohaku gwedhwa, uuna tatu dhiladhila kombinga yaasho Jehova e tu pa Omwana epona awike opo e tu kulile. (Joh. 3:16; 1 Joh. 4:9, 10) Shika ohashi tu inyengitha opo kaatu ikalele we tse yene. (2 Kor. 5:14, 15) Ohashi tu inyengitha wo tu kale tu na ehalo lyokutanga Jehova montaneho. (Eps. 102:19-21) Aapiya yaJehova mboka ye na olupandu oya tegelela nondjuulukwe ompito ‘yokuhokolola eso lyOmuwa’ pEdhimbuluko muga 5 Apilili. — 1 Kor. 11:26.