Natu dimbulukweni ekuliloyambo laJesus nolupandu
1, 2. Omolwashike tu na okudimbulukwa ekuliloyambo laJesus nolupandu?
1 Metwokumwe nelombwelo laJesus Kristus li na sha nokudimbulukwa efyo laye, Ovakriste mounyuni aushe otava ka ongala mo 22 Marsa 2008, mOlomakaya konima eshi etango la ningina, opo va dimbulukwe efyo laye. (Luk. 22:19; 1 Kor. 11:23-26) Otu na olupandu linene omolwoshiningwanima osho sha ningilwe omido 1 975 da pita. Jesus okwa li a kanyatela oudiinini waye fiyo osheshi a fya efyo liudifa omwenyo munyenye komuti womahepeko. Kungaho, okwa li a yapulifa edina laXe nokunyaneka pomutenya omalundilo aSatana. — Job 1:11; Omayel. 27:11.
2 Ohonde yaJesus ya tika oya shilipaleka ehangano lipe, nomolwehangano olo Kalunga okwa hoolola ovanhu vonhumba inava wanenena va ninge ovana vaye vopamhepo nova ka pangele pamwe naJesus mOuhamba womeulu. (Jer. 31:31-34; Mark. 14:24) Ngaashi Jesus a li a yelifila Nikodemus, Kalunga okwa ulika yo kutya oku hole ovanhu aveshe neenghono eshi a yandja Omona waye omuholike a ninge oikulila. — Joh. 3:16.
3. Ouwa ulipi ovapwilikini tava ka mona pEdimbuluko?
3 Shiva vamwe kEdimbuluko: Okafo kUukalele wetu wUukwanilwa kaJanuali oka li ke na eetepo kutya natu shangeni omisholondodo domadina ovanhu aveshe ovo twa hala okushiva kEdimbuluko. Mbela owa hovela ngoo okushiva ovanhu ovo ve li momusholondodo woye? Mbela owa hovela ngoo okuninga omalongekido opo u ka kufe ombinga pauyadi moshikonga shokushiva ovanhu kEdimbuluko osho tashi ka hovela mulo-1 Marsa? Ouyelele wopamishangwa oo tau ka yandjwa pEdimbuluko otau ka pameka eitavelo lovapwilikini mekuliloyambo laJesus, naasho otashi dulu oku va kwafela va ka mone omwenyo waalushe. — Rom. 10:17.
4. Omolwashike twa pumbwa okufika kuyele pokwoongala kwEdimbuluko?
4 Ngeenge otashi shiiva, natu fikeni kuyele pokwoongala kwEdimbuluko opo tu dule okuhambelela nohamu ovo twa shiva ve uye kEdimbuluko. Molwaashi pEdimbuluko ohapa kala ovanhu vahapu, osha fimanenena okuyandja elitulemo unene tuu kwaavo vape nosho yo ovo hava holoka pokwoongala omalufe.
5. Ongahelipi hatu dulu okulongekida omitima detu shi na sha nEdimbuluko?
5 Longekida omutima woye: Mokambo Konakona Omishangwa keshe efiku — 2008 nosho yo mokalindeli kEendombwedi daJehova ko 2008 (2008 Calendar) omu na elandulafano lelesho lOmbibeli le likalekelwa li na sha nEdimbuluko. Elesho otali ka hovela nomafiku 17 Marsa. Okukonakona oiningwanima ya fimana oyo ya ningwa lwopexulilo longhalamwenyo yaJesus yokombada yedu otaku ke tu kwafela tu longekide omitima detu shi na sha nEdimbuluko. (Esra 7:10) Okudilonga pamwe neilikano kombinga yomahokololo oo otaku ka kulika olupandu letu okupandula ohole oyo Jehova nosho yo Omona ve tu ulikila mokuyandja ekuliloyambo. — Eps. 143:5.
6. Okukulika olupandu letu li na sha nekuliloyambo laJesus otaku ke tu kuma ngahelipi notaku ke tu linyengifa tu ninge shike?
6 Natu lilongekideni nawa nokukwafela yo vamwe ve lilongekide opo va dule oku ka kala pokwoongala oko kwa fimanenena. Okudimbulukwa ekuliloyambo nolupandu otaku ka pameka ekwatafano letu naJehova nosho yo nOmona waye. (2 Kor. 5:14, 15) Otashi ke tu linyengifa yo tu va hopaenene mokukala hatu ulikile vamwe ohole yokuhelihola mwene. — 1 Joh. 4:11.