Okambapila kokuhiya aantu kedhimbuluko hoka taka gandjwa muuyuni auhe
1. Oshikonga shi ikalekelwa shini tashi ka ningwa muuyuni auhe manga edhimbuluko inaali thika?
1 Jesus okwa lombwele aalanduli ye a ti: “Shi ningeni nokudhimbulukwa ndje.” (Luk. 22:19) Mokuvulika kelombwelo ndika aalongeli yaJehova naamboka ye na ohokwe otaya ka gongala mo 30 gaMaalitsa 2010 ya dhimbulukwe eso lyaJesus. Oshikonga shehiyo ndika lyi ikalekelwa otashi ka tameka mo 13-30 gaMaalitsa.
2. Ongiini tatu vulu okugandja okambapila kehiyo?
2 Nkene shi na okuningwa: Oto vulu okupa omunegumbo okambapila kehiyo opo a tale ethano ndyoka li li ko e to ti: “Aantu omamiliyona muuyuni auhe otaya ka gongala okudhimbulukwa eso lyaJesus kongulohi mo 30 gaMaalitsa. Onde ku etela okambapila kehiyo opo ngoye nuukwanegumbo woye mu ka kale po. Oto vulu wo okuya nookuume koye. Ndhindhilika ethimbo nehala mpoka edhimbuluko tali ka ningilwa.” Ngele ompito otayi shi pitike oto vulu okulesha Lukas 22:19 wu ulike kutya Ombiimbeli oyo tayi ti kutya nashi ningwe. Ihe dhimbulukwa kutya molwaashoka otu na ethimbo lya ngambekwa otu na okupopya paufupi opo tu vule okumana ko oshitopolwa.
3. Oolye tatu vulu okuhiya?
3 Ngele egongalo lyeni oli na oshitopolwa oshinene, aakuluntugongalo otaye ke mu lombwela mu thige okambapila kehiyo pomagumbo ngoka kaamu na aantu. Ngele otashi opalele okambapila kehiyo oto vulu oku ka gandja pamwe niifo. Sa oshimpwiyu wu hiye aatalelwapo yoye, aakonakonimbiimbeli, mboka ho longo nayo, aanasikola ooyakweni, aakwanezimo, aashinda naatseyikile.
4. Oshike tatu ka ninga ngele otu na olupandu omolwohole yaJehova sho e tu kulila?
4 Kala wi ilongekidha wu ka kuthe ombinga pakuudha: Oomwedhi dhEdhimbuluko odhi li ethimbo ewanawa noonkondo okutamununa mo uukalele wetu. Mbela oto vulu okuninga omalongekidho wu kuthe uukwathelikokolindjila? Mbela owu na aanona nenge aakonakonimbiimbeli taya ningi ehumokomeho pambepo? Ngele osho, mona aakuluntugongalo ya tale ngele nayo oya gwana okukutha ombinga moshikonga shika shi ikalekelwa ye li aauvithi inaaya ninginithwa. Ngele otu na olupandu omolwohole yaJehova sho e tu kulila otashi ke tu inyengitha tu kale pEdhimbuluko nokuhiya wo aantu oyendji ngaashi tatu vulu yaka ka kale po. — Joh. 3:16.