Uumbapila wehiyo lyEdhimbuluko otawu tameke okugandjwa mu 2 Apilili
1. Uumbapila wehiyo lyEdhimbuluko nuumvo otawu ka gandjwa uunake, nomolwashike oshikonga shika shokomumvo sha simanenena?
1 Okuza mu 2 sigo 17 Apilili, otatu ka gandja uumbapila wehiyo lyoshiningwanima sha simanenena shokomumvo, sha hala okutya, Edhimbuluko lyeso lyaKristus. Monakuziwa, aantu oyendji mboka ya li yu ulika ohokwe oya li yi inyengithwa koshikonga shika shokomumvo. Pashiholelwa, mesiku lyEdhimbuluko, omukiintu gumwe okwa li a dhengele koshitayimbelewa e ta ti: “Sho nde ya pegumbo, onda adha okambapila kehiyo ke li kohi yomweelo gwegumbo lyandje. Onda hala okuya, ihe kandi shi kutya opongapi.” Omumwatate okwa yelitha kutya uuyelele mboka otawu adhika peni kokambapila kehiyo. Sho ya mana oonkundathana, omukulukadhi oku uvaneke a ti: “Otandi ya koshiningwanima sheni kongulohi.”
2. Oshike tatu vulu okutya uuna tatu gandja okambapila kehiyo?
2 Nkene tatu ke shi ninga: Molwaashoka otu na ethimbo lya ngambekwa okulonga oshitopolwa ashihe, oshi li nawa ngele tatu popi paufupi. Otatu vulu okutya: “Mwa lala po. Onde ku etela okambapila kehiyo opo ngoye nuukwanegumbo woye mu ka kale poshiningwanima sha simana shokomumvo shoka tashi ka ningwa muuyuni auhe mOsoondaha, 17 Apilili. [Gandja okambapila kehiyo komunegumbo.] Esiku ndyoka otatu ka dhimbulukwa eso lyaJesus. Otapu ka gandjwa oshipopiwa oshali sha kankamena kOmbiimbeli shoka tashi ka yelitha kutya ongiini tatu vulu okumona uuwanawa mekuliloyambo lyaJesus. Mokafo haka kehiyo otamu ulikwa ehala nethimbo mpoka tapu ka ningilwa okugongala huka moshitopolwa shetu.”
3. Ongiini tatu vulu okuhiya aantu oyendji ngaashi tashi vulika?
3 Ngele egongalo oli na oshitopolwa oshinene, aakuluntugongalo otaya ka gandja elombwelo opo momagumbo moka kaamu na aantu, okambapila kehiyo ka tulwe mpoka itaaka vulu okumonika kaaendipo. Shilipaleka ngele owa hiya aatalelwa po yoye, aapambele, aaniilonga pamwe nangoye, aanasikola ooyakweni naatseyikile. Uuna to kutha ombinga mokugandja okambapila kehiyo momahuliloshiwike, gandja iileshomwa mpoka tashi opalele. Mbela oto vulu okukutha uukwathelikokolindjila muApilili nokukala wu na ombinga onene moshikonga shika shinyanyudha?
4. Omolwashike twa hala mboka ye na ohokwe ye ye kEdhimbuluko?
4 Mboka taya ka kala po itaya ka mona tuu uunzapo wa kola! Otaye ku uva kombinga yohole onene yaJehova mokugandja ekuliloyambo. (Joh. 3:16) Otaye ki ilonga nkene Uukwaniilwa waKalunga tawu ke etela aantu uuwanawa. (Jes. 65:21-23) Otaya ka lombwelwa wo ya popye naayakuli nokupula ekonakonombiimbeli ngele oya hala yi ilonge oshindji. Egalikano lyetu olyo kutya oyendji mboka ye na ohokwe okwiilonga kombinga yaJehova otaye ki inyengithwa koshikonga shika e taye ya ya kale pamwe natse pEdhimbuluko.