Oshikonga shokuhiya aantu kEdhimbuluko otashi tameke me 1 lyaMaalitsa
1. Oshikonga shokuhiya aantu kEdhimbuluko otashi ka tameka uunake nomolwashike tashi ka kutha ethimbo ele nuumvo?
1 Otatu ka tameka noshikonga shokomumvo shokuhiya aantu kEdhimbuluko mEtitano, 1 Maalitsa. Oshikonga otashi ka kutha ethimbo ele nuumvo shi vulithe shito, molwaashoka Edhimbuluko oli li ko owala 26 Maalitsa. Shika otashi ke tu pa ompito tu hiye aantu oyendji ngaashi tashi vulika, unene tuu ngele egongalo lyetu oli na oshitopolwa oshinene.
2. Elongekidho lini lya ningwa po lyokupewa uufo wehiyo nosho wo lyokulonga oshitopolwa sigo sha pu ko?
2 Ningeni omalongekidho: Aakuluntugongalo yomegongalo lyeni otaye ke mu pa omalombwelo gankene tamu vulu okulonga oshitopolwa sheni mu shi mane ko nosho wo ngele otamu vulu okuthiga okafo kehiyo pomagumbo ngoka kaamu na aantu. Ngele oshitopolwa sheni omwe shi mana ko manga uufo inaawu pwa po otamu vulu oku wu gandja miilonga yepandaanda. Omutonateli gwiilonga oku na okushilipaleka kutya uufo wehiyo wa nyolwa esiku, ehala nethimbo owa tulwa mpoka hapu tulwa iileshomwa nenge iifo yaayehe, opo aauvithi ya vule oku wu ikuthila, ihe inawu tulwa po awuhe poshikando, napu tulwe owala wa gwana. Otu na owala okukutha mboka twa pumbwa oshiwike shoka.
3. Otu na okukaleka shike momadhiladhilo uuna tatu gandja uufo wehiyo?
3 Otatu ka tya shike? Onawa ngele tatu popi paufupi, opo tu vule okupopya naantu oyendji ngaashi tashi vulika. Ihe inatu pumbwa okweendelela tu ze po pomunegumbo ngele omunambili noku na omapulo. Pepandja etine opu na oshiholelwa shefalomo shoka tatu vulu okupopya miitya yetu yene, opo shi opalele aantu moshitopolwa shetu. Uuna tatu hiya aantu mehuliloshiwike, otatu vulu okugandja wo iifo ngele onkalo otayi shi pitike. Omasiku 2 Maalitsa otaga ka kala esiku lyi ikalekelwa lyokugandja iifo, onkee ano otatu ka gandja iifo pamwe nokafo kehiyo pehala lyokutameka omakonakonombiimbeli ngaashi hatu ningi shito mOlyomakaya yotango yomwedhi.
4. Omolwashike tu na okulonga nuulaadhi moshikonga shokuhiya aantu?
4 Otwi inekela kutya oyendji otaye ke ya ya gongale pamwe natse pEdhimbuluko. Oshipopiwa otashi ka yelitha kutya Jesus oye naanaa lye. (1 Kor. 11:26) Otashi ka yelitha nkene eso lye tali tu kwathele. (Rom. 6:23) Otashi ka tsa omuthindo kutya omolwashike sha simana tu mu dhimbulukwe. (Joh. 17:3) Natu kutheni ombinga nuulaadhi moshikonga.